پارەیێ تومەنی رۆژ ل دیف رۆژێ بەرامبەر دۆلاری ل داکەفتنێ دایە و گەهشتە نزمترین ئاستێ خۆ و 100 دۆلار بەرامبەر 9 ملیۆن و 200 هزار تومەنایە.

لگورەی دیفچوونێن (باسنیوز)، بهایێ تومەنێ بەرامبەر دۆلارێ ئەمریكی ل داکەفتنێ بەردەوامە، د ماوێ سێ رۆژێن بووریدا تومەن بەرامبەر دۆلاری 800 هزار دیناران داکەفتیە.

رۆژا 6ێ 2ێ 2025، هەر 100 دۆلاران بەرامبەر 8 ملیۆن 600 هزار تومەنان مامەڵە پێ هاتیە كرن، بەلێ ئەڤڕۆ 9ێ 2ێ 2025، هەر 100 دۆلارەک بوویە 9 ملیۆن و 200 هزار تومەنان.

ئەڤ بهایێ ئەڤڕۆ نزمترین ئاستێ پارەیێ ئێرانییە ل دیرۆکا وی وڵاتیدا.

رۆژا 5ێ2ێ 2025، پشتی بڕیارێن سەرۆكێ ئەمەریكا دژی ئیرانێ، بهایێ تومەنێ ئیرانێ دەست ب داکەفتنا گەلەک بلەر کر.

داکەفتنا بەرچاڤ یا تومەنی پشتی وێ ئێکێ هات، دۆناڵد ترەمپ، سەرۆكێ ئەمەریكا هندەک بڕیار دژی ئیرانێ دەرخستن، کۆ پێکهاتبوون ژ راگرتنا هنارتنا نەفتێ و دۆسییەیا ئەتۆمیی یا وی وڵاتی.

سیامەند شێخە، شەهرەزایێ ئابووری و بانكی، بۆ (باسنیوز) ڕاگەهاند: "ڕەوشا ئابوورییا نافخۆیا ئیرانێ گەلەک یا خراپە، ب ئەگەرێ نەبوونا كەرستێن دەستپێکێ و کێمیا دۆلاری، بەرهەمێ خۆمالیێ ئیرانێ كێم کریە و خەلکێ وێ د ڕەوشەکا خراپ یا ئابووریدانە، لەورا بڕیارێن ترەمپ و سزایێن نوی، وێ ئێکێ دکەت کۆ تومەن زێدەتر داکەڤیت."