كوردی ک.بادینی عربي
Kurdî English

نووچە گـۆتـــار راپۆرت هه‌ڤپه‌یڤین ئابووری مه‌ڵتیمیدیا لایف ستایل چاند و هونەر
×

ل قەزا به‌رده‌ڕه‌ش 250 هزار تەنێن پتاتا دهێنە به‌رهه‌مئینان

ڕێڤەبەرێ چاندنا بەردەڕەش راگەهاند، بەرھەمێن پتاتا ل قەزا بەردەڕەش دگەهیتە نزیکێ 250 ھزار تەنان، کۆ پشکا مەزن یا پێدڤیێن ھەرێما کوردستانێ تژی دکەت و پشکەک ژی دێ تێرا دەرڤە کەت.

ئەندازیار تەحسین گۆران ڕێڤەبەرێ چاندنا قەزا بەردەڕەش بۆ (باسنیوز) راگەهاند، ل قەزا بەردەڕەش د ساڵا بووریدا نزیکێ 250 ھزار دۆنەمێن زەڤیان بۆ پتاتا هاتینە چاندن، بەرھەم ژی نزیکێ 250 ھزار تەن بوون کۆ بەرھەمەکێ مەزنە و نزیکە ژ وێ کۆ پێدڤیێن نافخۆ یا ھەمی ھەرێما کوردستانێ دابین بکەت. گۆتژی، ئەگەرێ ڤێ سەرکەفتنێ بۆ وێ ڤەدگەریت کۆ کابینا نەهێ یا حکوومەتا ھەرێما کوردستانێ گرنگی پێدایە و شیایە ل نافخۆ و دەرڤە بازاڕی بۆ پەیدا کەت و جووتیار زێدەتر گرنگیێ ب چاندنا پتاتا بدەن.

ئەندازیار تەحسین گۆران دیار ژی کر، بەرێ ل سنوورێ قەزا بەردەڕەش تنێ حەفت کۆگەهێن ساردکرنێ ھەبوون بۆ کۆگەهکرنا پتاتێ، بەلێ نوکە بۆ 27 کۆگەهان زێدە بوویە و شیانێن کۆگەهکرنا 270 ھزار تەنان هەیە، جووتیاران ترسا ساغبوونا پتاتێ نینە و ئەگەر بازاڕ ژی نەبیت دێ کۆگەهـ کەن.

ئاشکرا ژی کر، ل قەزا بەردەڕەش نزیکێ نەهـ ھزار جووتیاران کار دکەن و ل بەرھەمئینانا پێدڤیێن چاندنێدا رۆلێ کارا دگێڕن، ساڵانە ژبەر بەرھەمێن مەزن یێن پتاتا، هژمارەکا دەلیڤێن کاری راستەوخۆ و ناڕاستەوخۆ پەیدا دبیت، ب جۆرەکێ د دەمێ پێگەهشتنا پتاتاندا رۆژانە ھزار دەلیڤێن کاری بۆ خەلکێ بەردەڕەش و دەڤەرێن دی پەیدا دبیت.