وەزارەتا دارایی و ئابوورییا حكوومەتا هەرێما كوردستانێ، بۆ چاوانیا خانەنشینكرنا پێشمەرگایەتیێ، بڕیارەکا نوی دەرخست و د دەمێ خانەنشینكرنێدا، پلەکا بلندتر دێ بۆ پێشمەرگەی هێتە دان.
لگورەی نڤیسارەکا وەزارەتا دارایی و ئابوورییا حكوومەتا هەرێما كوردستانێ كۆ وێنەیەك دەست (باسنیوز) كەفتیە، وەزارەتا دارایی لسەر داخوازا جڤاتا وەزیران، بۆ بەرژەوەندییا پێشمەرگەی، رێنماییەک هەموار کریە.
د وێ نڤیسارێدا کۆ رێنماییا دارایی ژمارە 7ێ ساڵا 2024ە، هاتیە: "ب پشتبەستن ب مادەیا 46 ژ یاسایا 38ێ خزمەت و خانەنشینییا پێشمەرگەی، ئەگەر پێشمەرگە پشتی دوو ساڵان ژ رێكەفتێ شایستەبوون بۆ پلەبلندکرنێ پلەیا وی نەهاتە بلند کرن، وی دەمێ دێ هێتە خانەنشین کرن ب پلەیەكا بلندتر ژ پلەیا خۆ."
لگورەی نڤیسارا، وێ ڕێنمایێ، رێنماییەکا ساڵا 2012ێ هەموار كریە كۆ بەری نوکە چار ساڵ بوون بۆ رێكەفتێ شایستەبوونێ، بەلێ نوکە بۆ دوو ساڵان هاتە کێم کرن.
ژێدەرەکێ ئاگەهدار ژ ڕێڤەبەراتیا گشتییا خانەنشینییا پێشمەرگەی بۆ (باسنیوز) راگەهاند: "مادەیا 46 ژ یاسایا ژمارە 38ێ ساڵا2007دا هاتیە، لگورەی وێ مادەیێ، مفا ژ یاسایا ژمارە 3ێ ساڵا 2010ێ یاسایا خزمت و خانەنشینییا سەربازییا عێراقی هێتە وەرگرتن و رێنماییا دارایی ل بەرژەوەندییا پێشمەرگەی هاتیە کرن."
وی ژێدەری زەلالکریە: "ئەگەر دەمێ خانەنشینبوونا پێشمەرگەی هات و پلەیا وی ژی ب ئەگەرێ نەبوونا میلاكی نەهاتبوو بلند کرن، یان پلەبلندکرن هاتبوو راگرتن، ل دەمێ خانەنشینبوونێ ب پلەیەكا بلندتر دهێتە خانەنشین کرن، ل وی دەمی مووچەیێ وی بۆ خانەنشینیێ دێ زێدە کەت."