لیژنا دارایی دوماهیک پەرەسەندنێن هەموارا بودجە و هنارتنا پەترۆلا هەرێما کوردستانێ دانە دیار کرن و تەکەز کر، کۆمبوونا ئەرێنی و باش د ناڤبەرا لیژنا دارایی و پەترۆل و وەزارەتا پەترۆلیدا کر، دبێژیت: "پەترۆل بهێتە هنارتن، هنارتنا مووچەی و بودجەیێ کوردستانێ دێ باشتر بیت."

خەلیل دۆسکی، ئەندامێ لیژنا دارایی ل پەرلەمانێ عێراقێ بۆ (باسنیوز) ڕاگەهاند: "چاڤەڕێ خواندنا دووێ بۆ هەموارکرنا یاسایا بودجەیا 2025 دکەین، کۆ بڕگەیەکا تایبەتە ب تێچوویا هنارتنا پەترۆلا هەرێما کوردستانێ، پشتی کۆدەنگی لسەر بهێتە دان و بچیتە بوارێ جێبەجێکرنێ و هنارتنا پەترۆلا کوردستانێ دەست پێ بکەت، کار زەحمەتی هەیە، بەلێ دبیت و دەرباز دبیت."

لگورەی ڕێککەفتنەکا هەولێر و بەغدا، کۆ تایبەتە ب هەموارکرنا یاسایا بودجەی، تێچوویا دەرخستن و ڤەگوهاستنا پەترۆلێ ل کێلگەهێن پەترۆلا هەرێما کوردستانێ بۆ نزیکێ 16 دۆلاران دهێتە زێدە کرن؛بەلێ پاشی کۆمپانیایەکا شیرەتکارییا نێڤدەوڵەتییا بێ لایەن، هویربینی ل دیاریکرنا تێچوویا دەرخستن و هنارتنا پەترۆلێ دکەت و دەمێ 60 ڕۆژان دەستێری هەیە ئەو کۆژمێ ڕاستەقینە بهێتە دیاری کرن.

خەلیل دۆسکی ئاشکرا کر: "ئەو 16 دۆلار دێ ب شێوەیەکێ دەمکی بیت، دەمێ هەفتیا بوری ل پەرلەمانی خواندنا ئێکەم بۆ هەموارا یاسایا بودجەی کر، ڕەزامەندییەکا زۆر لسەر وێ برگەیا هەمواری نەبوو، کۆ بەحسا تێچوویا دەرخستن و بەرهەمئینانا پەترۆلێ دکەت و پشکەکا پەرلەمانتاران ژی سەرنج و تێبینی لسەر هەبوو؛ بۆ چارەسەرکرنا وان تێبینییان، ڕۆژا 1ێ12 کۆمبوونا ئەرێنی و باش دناڤبەرا لیژنا دارایی و پەترۆل و وەزارەتا پەترۆلێدا کر."

جێگرێ وەزیرێ پەترۆلێ بۆ کاروبارێن دەرخستنا پەترۆلێ، ڕێڤەبەرێ کۆمپانیا سۆمۆ، ڕێڤەبەرێ پشکا ئابووری ل وەزارەتا پەترۆل و ڕێڤەبەرێ پشکا یاساییا وەزارەتا پەترۆلێ؛ د کۆمبوونا ڕۆژا 1ێ12 پشکدار بوون.

ئەندامێ لیژنا دارایی گوت: "بریکارێ وەزیرێ پەترۆلا فیدراڵ، کۆ د کۆمبوونێدا پشکدار بوو، پشتەڤانیا خۆ بۆ هەموارا یاسایێ دووپات کر، ب پێدڤی ژی زانی کۆ خواندنا دووێ بۆ بهێتە کرن و پاشی ل پەرلەمانێ عێراقێ بهێتە پەسەند کرن، وەزارەتا پەترولا عێراقێ و لایەنێن پەیوەندیدارێن دی گەهشتینە وێ باوەرێ، کۆ پەسەندکرنا هەموارا یاسایا بودجەی، تاکە چارەسەریا ئاریشا هنارتنا پەترۆلا کوردستانێیە."

ئەنجامێ کۆمبوونێ دێ کەنە ڕاپۆرتەک و ئاراستەی پەرلەمانێ عێراقێ هێتە کرن، هەتا پاشی خواندنا دووێ بۆ هەموارا بودجەی بهێتە کرن و پەسەند کرن.

وی پەرلەمانتاری ئاشکرا کر، هنارتنا پەترۆلێ بۆ مووچەی و بودجەیا عێراقێ و هەرێما کوردستانێ ژی یا گرنگە، گوتژی: "پەترۆل بهێتە هنارتن، مووچه و بودجەیا کوردستانێ دێ باشتر هێتە هنارتن و رەنگە ئاریشە کێمتر بن."

ل 25ێ ئادارێ 2023 هنارتنا پەترۆلا هەرێما کوردستانێ بۆ دەرڤە هاتیە ڕاگرتن.

رۆژا 26ێ11ێ2024، شاخەوان عەبدوڵا، جێگرێ سەرۆکێ پەرلەمانێ عێراقێ، ڕاگەهاند: "تێچوویا بەرهەمئینانا پەترۆلا هەرێما كوردستانێ، کۆ هاتیە هەموار کرن و بۆمە هاتیە، پشتی دەنگدانێ ل پەرلەمانی، هیچ بەربەستەک بەرامبەر هنارتنا پەترۆلا هەرێما کوردستانێ نامینیت و دێ چیتە بارێ جێبەجێکرنێ."

ئاماژە بۆ وێ ژی کر: "هەتا نوکە هیچ لایەنەک و کوتلەکا سیاسی بەحسا بابەتێ تێچوویا بەرهەمئینانا پەترۆلێ نەکریە، یان نیگەرانێن خۆ نیشان نەداینە، ژبەرکۆ سەرۆک وەزیری د کۆمبوونا هەڤپەیمانییا دەولەتێ گوت، ژلایێ وان گەلەک یا گرنگ بوو کۆ ئەو پرۆژە بهێتە دەرباز کرن، ژبەرکۆ نە هنارتنا پەترۆلا هەرێما كوردستانێ زیانەکا مەزن دگەهینیتە عێراقێ."