بانگهشه و ئهنجامدانا ههلبژارتنێن خۆلا شهشێ یا پهرلهمانێ كوردستانێ ب داویهاتن، ئهم ئهڤێن مه دهنگ داین ژ ئهندام و ئالیگرێن حزبان ئهم ههموو حزبى بووین، ههرئێكى ژ مه یا ژ دهستان هاتى بانگهشه بۆ حزبا خوه كر، مه ههمووان وهسان دراگههاند گهل و وهلات پێدڤى سهركهتنا حزبا مهنه، د ئهنجامدا پترییا حزبێن بهشدار د ههلبژارتناندا ههرئێك ب رێژهیهكێ و ل دووڤ ئاستێ خهبات و بهرههم و دلسوزییا خوه ئهنجام دهستڤهئینان، بێ گومان شێواز و ئامرازێن بانگهشهیێ ژى باندۆرا خوه ههبوو.
ههروهكى مه دگۆت: گهل و وهلات پێدڤى سهركهتنا حزبا مهنه، كوردستانییان ژ ههرحزبهكێ هندهك ههلبژارتن، ئانكو پێدڤى شیانێن مه ههمووانه، لهوما ژى یا پێویست ئهوه ئهم ههموو ههكه ههتا 20 چریا ئێكێ حزبى بووین، ژ وێ رۆژێڤه ههرههموو كورد بین و د خهما كوردستانێدا بین، ئهگهر د ههڤگرتى نهبین و دۆزا وهلاتى نهبیته دۆزا مه ههمووان، ئهڤه ئهمێ ل ژێر سیبهرا دیوارهكى ژ ههرچهند رێزهكان كهرپویچهك یان بهرهكێ خهلهت هاتییهدانان و زوو یان نێزیك ئهو دیوار دێ ب سهرێ مه ههموواندا ههرفیت، وى چاخى نه كهس ژ مه مفادار دبیت، نه ژى وهلات ئاڤادبیت، تنێ مفادار داگیركهرێن ڤى وهلاتینه، ئهوێن ههررۆژێ پیلانهكێ دژى مه دگێرن.
ئهزموونێن دو بهرهكى و چهند بهرهكیێ یێن ژ نیڤا ئێكێ یا سهدسالییا چوویى ب سهرێ بزاڤا رزگاریخوازا خهلكێ كوردستانێدا هاتین، ئهو چهنده یا بۆ خۆیانى و بیانییان سهلماندى د ئهنجامدا دڤێت لههڤ بزڤرینهڤه، روو بروو پێكڤه بروونین و ب دانوساندنی و ژبهرئێكدانانێ و ب گرنگتروهرگرتنا بهرژهوهندییا نهتهوهیى و وهلاتینى بگههینه خالێن ههڤپشك، ئهگهر مه ئهڤه كر، ئهڤه مه سهركهتن و سهرفرازییا خوه گرهنتیكر، ههروهك مه ل ژێر یهكگرتنا بهرهیێ كوردستانێ سهركهتنا سهرهلدانا 1991ێ گرهنتیكرى، و ئهو یهكگرتنا مه ل سالا 2003ێ دشهرێ ئازادییا ئیراقێیدا ئهم شیاین تهڤایى خاكێ باشوورێ كوردستانێ بگرینه دهست و د پهسهندكرنا دهستوورێ ئیراقێ یێ سالا 2005ێدا فیدرالیزما ههرێما كوردستانێ ب چهسپبنن و باوهریپێئینانهكا قانوونى بدهینێ.
ل داویێ دێ مافى دهمه خوه پێشنیازهكێ بدهمه بهرێز بافل تالهبانى و بێژمێ: بهرێز دێ سهركهتنهكا مهزن تۆمار كهى ئهگهر تو ب ههر 23 سهركهتیێن یهكێتى نیشتمانى كوردستان بۆ خۆلا نوویا پهرلهمانێ كوردستانێ بهرهف سهلاحهدین بكهڤنه رێ و ل مامێ خوهیێ گهوره مهسعود بارزانى ببنه مێڤان و بێژیێ زا بخودێ ئهز و ههر 23 سهركهتیێن یهكێتیێ ل ژێر فهرمانا تهینه بۆ خزمهتا كوردستانێ.بلا ئهڤ دهسپێشخهرییه ژ ئالیێ تهڤه بیت، ههروهك د هندهك دهمێن دژواردا رهحمهتى مام جهلالى پێنگاڤێن ب ڤى رهنگى هاڤێتین.
ب هیڤییا كوردستانهكا یهكگرتى ل ژێر سیبهرا پهرلهمان و حكومهتهكا یهكگرتییا ههرێمێ.
1
2
3
4
5
6
7
8
