ژ 16 ئۆكتۆبه‌را 2017ڤه‌ هه‌تا ئه‌ڤرۆ كوردستان كه‌تیه‌ به‌ر هه‌وه‌كا هێرشێن له‌شكه‌رى و ئابوورى و سیاسی و راگه‌هاندنێ، نیشانا وان هه‌موو هێرشان تنێ ل حكومه‌تا هه‌رێما كوردستانێ و (پارتى دیموكراتى كوردستان)ه‌، د ڤان هێرشاندا ژى و تنێ پارتى به‌رگریكاره‌.

ده‌ملده‌ست پشتى 16 ئۆكتۆبه‌رێ سۆپایێ ئیراقێ و هێزێن حه‌شدا شه‌عبى ب پشته‌ڤانییا ئیرانێ و (حزب الله) شیعى به‌رێ هێرشێن خوه‌دا كوردستانێ، سه‌رۆكوه‌زیرێن ئیراقێ یێ وى چاخى ب هیڤیێ بوو پشتى رۆژه‌كێ دووان د رێكا ئیبراهیم خه‌لیل را به‌ره‌ف تركیا بچیت، تنێ پارتى و پێشمه‌رگه‌یێن بارزانى بوون هێرش به‌ره‌ف پاش زڤراندینه‌ڤه‌ و دفنا هێرشكاران شكاندى و سه‌رۆكوه‌زیران نه‌گه‌هشته‌ وێ مرادێ، ژ ده‌وله‌ت سه‌رێ وێ به‌رخوه‌دانێ هه‌رێما كوردستانێ ما ئازاد و كورد تێدا سه‌رفراز ..

د به‌رامبه‌ردا تنێ ئێك كه‌سى ژ حزبه‌كا دى یا كوردستانێ پشكدارى د ڤێ به‌رگرییا پیرۆزدا نه‌كر و ئالیگرێن هنده‌ك حزبان چه‌پك بۆ هێرشكاران د قوتان.

ل 15 كانوونا دووێ 2024ێ ئیرانێ باژێرێ هه‌ولێرا پایته‌خت مۆشه‌كباران كر، تنێ پارتى ل سه‌ر ئاستێن راگه‌هاندنێ و په‌یوه‌ندیێن سیاسیێن ناڤخۆیى و ده‌رڤه‌ كه‌ته‌ د به‌رگریێدا و هه‌لویست به‌رامبه‌رى ڤێ زێده‌گاڤیێ وه‌رگرت.

د ڤان چه‌ند سالێن چووییدا ده‌سته‌لاتێ به‌غدا ب هه‌موو ره‌نگان یا شه‌رێ ئابوورى به‌رامبه‌رى خه‌لكێ كوردستانێ دكه‌ت، تنێ پارتى یه‌ و مه‌زنه‌ به‌رپرسێن پارتى نه‌ به‌رده‌وام یێ ل به‌رۆكا پێشیێ و به‌رسینگێ سیاسه‌تا برسیكرنا خه‌لكێ یێ گرتى و ب سینگفره‌هى و رێكێن یاسایى و به‌لگه‌ و داتا یێ به‌رگریێ ژ قویتێ خه‌لكێ دكه‌ن، حزبێن دی یێن كوردستانى نه‌ تنێ به‌رگریێ ناكه‌ن، به‌لكى هانده‌ر و پشته‌ڤانێن ده‌سته‌لاتێ به‌غدانه‌.

داوى هێرش ب رێكا دادگه‌ها فیدرالآ ئیراقێ كرنه‌ سه‌ر په‌رله‌مانێ كوردستانێ و سازیێن یاسایێن كوردستانێ و سیسته‌مێ هه‌لبژارتنێن كوردستانێ، هێرش ل ئاسته‌كى بوو سازیێن یاسیێن كوردستانێ بكه‌نه‌ چنه‌ و كه‌مینه‌یێن نه‌ته‌وه‌یى ئایینى ژ هه‌رمافه‌كى بێ به‌ش بكه‌ن و هنده‌ك ل ده‌رڤه‌ى كوردستانێ بریارێ ل سه‌ر ئه‌نجامێن هه‌لبژارتنێن كوردستانێ بده‌ن.

ل ڤێرێ ژى تنێ پارتى هاته‌ده‌نگ و هه‌لویست وه‌رگرت و بایكۆتا هه‌رهه‌لبژارتنه‌كا ده‌رڤه‌ى ویستا خه‌لكێ كوردستانێ گرت و هه‌تا ئاسته‌كى ئه‌نجام ده‌ستڤه‌ئینان.حزبێن دى یێن كوردستانێ چ هه‌لویست وه‌رگرت..؟ هه‌كه‌ د خوه‌را دبینن بلا به‌رسڤێ بده‌ن.

هه‌ر هه‌موو ئه‌ڤێن خوه‌ ب حزبێن كوردستانى دده‌ن نیاسین د هه‌ر ته‌نگاڤییه‌كێدا نه‌تنێ بێ ده‌نگ و بێ هه‌لویستن، به‌لكێ به‌رێ ره‌خنه‌ و تومه‌تبارانكرن و جنێودانێ و زماندرێژییان یێ دایه‌ حكومه‌تا هه‌رێمێ و ژ پێش هه‌موو دوژمن و نه‌یار و داگیركه‌رێن كوردستانێڤه‌ یێ دژایه‌تییا حكومه‌تا هه‌رێمێ دكه‌ن... به‌لێ چه‌ند زمان درێژن هند ده‌ستكورتن.