بەرپرسەکێ وەزارەتا دارایی و دیوانا چاڤدێرییا دارایی، زانیارییان دەربارێ کۆمبوونان ددەت و دبێژیت ئەڤڕۆ پێنجشەمبی 29/8/2024، دێ کۆمبوونەک هێتە کرن، دەربارێ هنارتنا پارەیێ مووچەیێ دوو هەیڤان ژی زانیارییان ددەت.

بەرپرسەکێ وەزارەتا دارایی و ئابوورییا حكوومەتا هەرێما كوردستانێ، بۆ (باسنیوز) راگەهاند: "دوهی ئەو کۆمبوونا دگەل داراییا فیدڕاڵ هاتیە کرن ئەرێنی بوو، هندەک دۆسییە هەنە، ب تایبەتی بایۆمەتری و دوومووچەیی و فەرمانبەر و مامۆستایێن کەرکووکێ، ئەوە ل کۆمبوونا ئەڤڕۆ دێ بڕیار بۆ هێتە وەرگرتن."

ئاماژە بۆ وێ ژی کر: "کۆمبوونا دوهی زێدەتر بابەتێ هونەری بوو و بەحسا تێبینیان کر، تێگەهشتنا باش هەیە و ئومێد هەیە کۆ ئەڤرۆ بگەهینە ئەنجامێن باش، یان چارەسەریێ بدەنە لژنا هەڤبەش"

ژلایێ خۆڤە د. محەمەد زراری، رێڤەبەرێ گشتی ل دیوانا چاڤدێریا دارایی یا هەرێما کوردستانێ و ئەندامێ شاندێ، بۆ (باسنیوز)ێ راگەهاند:" کۆمبوونا سەرەکی دێ ئەڤرۆ پێنجشەمبیێ بیت، کۆ شاندێن هەردوو لا ب سەرپەرشتیا دکتۆر فوئاد حسێن و تەیف سامی بیت."

ئاماژە بۆ وێ ژی کر:"کۆمبوونا دوهی یا هەردوو وەزارەتێن دارایێن هەرێمێ و فیدراڵ کۆمبوونەکا باش بوو و لێکتێگەهشتنا گەلەک باش هەبوو، کۆمبوون زێدەتر هونەری بوو و تێدا بابەت هاتنە بەحس کرن، نەکۆ بریار پێ بهێنە دەرکرن."

ژلایەکێ دیڤە، ژێدەرەکێ وەزارەتا دارایی یا هەرێما کوردستانێ بۆ (باسنیوز)ێ راگەهاند:" دوهی ئێڤاری نڤیسارا خەرجکرنا هەردوو مووچەیێن هەیڤا حەفت و هەشت یێن پێشمەرگەی و هێزێن ئەمنی ل ژمێرکاریا دارایی یا فیدراڵ دەرچوویە و ئەگەر رێکار تەمام ببن، چاڤەرێ دهێتە کرن کۆ ئەڤرۆ تەمویل بهێتە رەوانە کرن."

ئاشکرا ژی کر، ئەوا هەتا نوکە هاتیە خەرجکرن و ل سەر هژمارا وەزارەتا دارایی یا هەرێما کوردستانێ تنێ 36 ملیار دینارێن مووچەیێ هەیڤا حەفت و 549 ملیار دینارێن مووچەیێ هەیڤا هەشت و چاڤەرێنە تمامکەرا وێ بهێتە خەرجکرن.