ل دەمێ شاند و سەفەر بۆ چەند پارێزگەهان، شایستەیێن دارایێن جۆراوجۆر بۆ فەرمانبەر و هێزێن نافخۆ دهێتە مەزاختن و وەزارەتا دارایی ژی بۆ ڤێ پرسێ رێنماییەک دەرخست.
ل دیف نڤیسارەکا وەزارەتا داراییا حكوومەتا هەرێما كوردستانێ، كۆ تایبەتە ب رێنماییا داراییا هژمارە 2 و كۆپییەك دەست (باسنیوز) كەفتیە، دەربارێ مەزاختنا پارێ شاند و سەفەرێ، چەند رێكارەك زەلال کرن.
ئاماژە بۆ وێ كر، بۆ مەزاختنا شایستەیێن دارایێن فەرمانبەران، تایبەت ب شاند و سەفەر بۆ پارێزگەهێن دەرڤەی هەرێما كوردستانێ ل سنوورێ عێراقا فیدراڵ، بۆ هەمی فەرمانبەرێن راژەیا شارستانی و سەربازی دڤێت چەند رێكاران بگریتە بەر.
ل دیف رێنمایێ، دەرمالەیا ئاکنجیبوونێ ل دیف پۆلین و پلەیا فەرمانبەران دهێتە مەزاختن، كۆ د ناڤبەرا 100 بۆ 250 هزار دینارایە.
هەروەسا دەرمالەیا بەلیکی دهێتە مەزاختن، كۆ د ناڤبەرا 25 هزار بۆ 50 هزار دینارایە، ئەو ژی ل دیف پلە و پۆلینا فەرمانبەران دهێتە مەزاختن.
وەزارەتا دارایی ژی زەلال کر، یێن بۆ خول یان ژی هەر كارەكێ دی بۆ دەمەکێ درێژ دهێنە ئیفاد کرن، ئەگەر 10 رۆژ بیت شایستەیێن وان دێ بۆ هێتە مەزاختن، زێدەتر ژ وێ بیت، دڤێت رەزامەندییا وەزارەتا دارایی وەربگریت.
تەکەز ژی کر، بۆ شاند و ئیفاد، بەری وەخت فەرمانا وزاری، یان كارگێڕی بهێتە دەرخستن و ئەگەرێ ئیفادێ و رۆژێن وێ بهێتە زەلال کر.
د رێنماییاندا ئەو ژی هاتیە: "ئەگەر فەرمانبەرەك بۆ كارەكێ پێتڤی بهێتە ئیفاد کرن و هەر هەمان رۆژ ژی بگڕیتەڤە، تنێ دەرمالەیا بەلیکی و خوارنێ بۆ دهێتە مەزاختن، دگەل كرێیا ترۆمبێلی بۆ دوو سەران، بەلێ ئەگەر ترۆمبێلا میری بكار بینیت، پارە بۆ ناهێتە مەزاختن، ئەگەر ب فڕۆكێ ژی بیت، ئەڤە ل دیف پلیتا فڕۆكێ بۆ هەردوو سەران دێ پارە بۆ هێتە مەزاختن."
ئەو ژی زەلال کر، ئەگەر ئەو كەسێ دهێتە ئیفاد کرن دگەل خۆ پێتڤی و تشتێن میری ڤەگوهێزیت، پارێ ڤەگوهاستنێ دێ بۆ هێتە مەزاختن.
ئاماژە بۆ وێ ژی كر، ئەگەر ل جهەکێ هۆتێل تێدا نەبیت، ل دیف پسوولێ رێژا 50%ێ دەرمالەیا ئاکنجیبوونا وان بۆ دهێتە مەزاختن.
وەزارەتێ زەلال کر، د دەمێ شاندكرنا فەرمانبەرێن گرێبەست، كرێیا دوو كورسییا بۆ چوون و ڤەگەڕاندنێ بۆ دهێتە مەزاختن.
تەکەز ژی کر، فەرمانبەر و كارمەندێن هێزێن ئاسایشا نافخۆ ژی شایستەیێن دارایی شاند و سەفەرا وان بۆ دهێتە مەزاختن.
1
2
3
4
5
6
7
8
