ل دیف وان زانیاریێن کۆ ل وەزارەتا دارایی و ئابووریا حکوومەتا هەرێما کوردستانێ دەست (باسنیوز) کەفتنە، پشتی چارەسەرکرنا هەمی ئاریشان، سپێدەهیا ئەڤرۆ ئێکشەمبی 21/7/2024، لیستا مووچەیێ هەیڤا حەفت یا فەرمانبەران و مووچەخۆرێن هەرێما کوردستانێ بۆ بەغدا هاتە هنارتن و ب سیدی و کاغەزی گەهشتیە داراییا عێراقێ.

هەیڤا بووری، ل رۆژا 27/6/2024، وەزارەتا داراییا هەرێما کوردستانێ لیستا مووچەیێ هەیڤا شەش بۆ بەغدا هنارت و رۆژا شەمبی 29/6/2024 لیست گەهشتە داراییا فیدراڵ.

رۆژا 4/7/2024، وەزارەتا داراییا عێراقێ کوژمێ 231 ملیار دینار تەمویلا مووچەخۆرێن هەیڤا شەش بۆ هەرێما کوردستانێ هنارت و دەست ب دابەشکرنا مووچەی هاتبوو کرن.

بەری نوکە، د. محەمەد زراری، رێڤەبەرێ گشتی ل دیوانا چاڤدێریا داراییا هەرێما کوردستانێ، بۆ (باسنیوز) راگەهاندبوو:" هەیڤانە لیستا مووچەیێ فەرمانبەران و مووچەخۆران و هێزێن ئەمنی ژلایێ مە هویربینی بۆ دهێتە کرن و پاشی بۆ بەغدا دهێتە هنارتن."

ژلایێ خۆڤە، د. شێروان دووبەردانی، ئەندامێ پەرلەمانێ عێراقێ، بۆ (باسنیوز) راگەهاند:" بڕیارە ڤێ هەفتیێ ل عێراقێ دەست ب دابەشکرنا مووچەیێ هەیڤا حەفت بهێتە کرن، پشتی گەهشتنا لیستا مووچەخۆرێن هەرێما کوردستانێ بۆ داراییا عێراقێ، ئێکسەر هویربینی دێ دەست پێکەت و پاشی تەمویل دهێتە هنارتن."

گوتژی، هەیڤا بووری داراییا عێراقێ ل 23ێ 6 دەست ب دابەشکرنا مووچەیێ هەیڤا شەش یێن سازیێن عێراقێ کر.