رێڤەبەراتیا گشتیا ئاڤێ راگەهاند، بۆ سڤکرنا ئەرکێ سەر ملێ ولاتیان، نڤیسار هاتیە کرن، کۆ لێخوشبوونا 20% بۆ قەرێ ئاڤێ بهێتەکرن، گوت ژی، دانا قەرێ ئاڤێ ب قست دێ بەردەوام بیت.

ئاری ئەحمەد، رێڤەرێ گشتیێ ئاڤا هەرێما کوردستانێ بۆ (باسنیوز) راگەهاند:" بۆ سڤکرنا ئەرکێ سەر ملێ ولاتیان، ب فەرمی مە نڤیسارکریە بۆ لێخوشبوونا 20% ژ قەرێ ئاڤێ، ئەڤ قەرێ کۆ ل دەف ولاتیانە، بریار ژی بۆ هەمی هەڤبەشێن ئاڤێ یە."

گوت ژی :" ژ وێ روژا کۆ جڤاتا وەزیران رەزامەندیێ ل سەر وێ بریارێ ددەت، بزاڤ هاتیەکرن بۆ دەمێ دوو هەیڤان لێخوشبوونا وی قەری یا بەردەوام بیت."

ئاری ئەحمەد گوت، بەری نوکە چەند جاران لێخوشبوون ژ پارێ ئاڤێ هاتیە کرن، کۆ 15% بوویە، بەلێ ڤێ جارێ داخاز هاتیە کرن بکەنە 20%.

ئاشکراژی کر:" زێدەتر ژ 400 ملیار دینارێن قەرێن ئاڤێ ژلایێ هەڤبەشێن ئاڤێ یە ل هەمی هەرێما کوردستانێ."

رێڤەبەراتیا گشتیا ئاڤێ گوت ژی:" د دەمێ دوو ساڵێن بووریدا پێنج جاران داشکاندنا 15% بۆ کرێیا ئاڤێ ل سەر ولاتیان هاتیە جێبەجێکرن، بۆ وان یێن کۆ پێوەرێن ئاڤێ نە گرێدای، بۆ دەمێ سالەک و دوو هەیڤان داشکاندنەک بو هاتە کرن، ئەوێن کو هەیڤانە 80 هزار ل سەر هاتبوو حسابکرن، ئەوێن سەنتەرێ باژێران بوو وان کرن 20 هزار دینار، ئەوێن دەرڤەی باژێران بۆ کرن 10 هزار دینار، ب گشتی ل هەردوو داشکاندنا نزیکێ 13 ملیار دینار ژ کرێ یا ئاڤێ بۆ ولاتیان هاتیە کرن."

ئاری ئەحمەد بەحسا وێ کر، بەری نوکە قەرێ ئاڤێ کربوو چار قست، بەلێ نوکە د بەرژەوەندیا ولاتیاندا هاتیە زێدەکرن بۆ شەش قستان.