دڤان کاودانێن کو ڕۆژهەلاتا ناڤین تێدا دبوریت ب تایبەت پشتی قوناغا حەفتێ ئوکتوبەرێ ودەستپێکرنا شەڕی دناڤبەرا بزاڤا حەماسا فەلەستیینی و ئیسرائیلێ، هەلبژاردنا بێ لایەنیێ باشترین بژاردەییە بۆ گەلێ کورد ژبەرکو ئەگەر ئەم بەرپەرێن دیرۆکێ هەلدەینەڤە دەربارەی هەلویستێن وان هەردوو لایەنان بەرامبەر دۆزا رەوایا گەلێ کورد، دێ بۆ مە دیاربیت ب شێوەیەکێ ستراتیجی هەردوو لایەنان هەلویست نەبووینە ل هەمبەر گەلێ کوردستانێ ب تایبەت ل دەمێ روویدان و کارەسات و جینوسایدان، ژبەر هندێ ب بۆچونا مە ئەڤە باشترین بژاردەیە، هەرچەند شەڕێ ڤێ جارێ یا جودایە بەراورد ب هەمی وان شەڕ و ئالوزیێن بوری ئەوێن دناڤبەرا لایەنێ فەلەستینی و ئیسرائیلێ چێبووی ژبەرکو سەرەرای وان هەمی چەک و کەرەستێن جەنگی یێن پێشکەفتی و دەزگەهێن هەوالگری و سیستەمی بەرگریێ یێ بهێز لێ بزاڤا حەماس شیا دربەکا بهێز و بێ وێنە ل ئیسرائیلێ بدەت ب تەکتیکێن جودا یێن سەربازی.

ل ڤێرێ مە دڤێت ئاماژێ ب هندێ بدەین ژی کو رۆژهەلاتا ناڤین ل پاش روویدانێن حەفتی ئوکتوبەرێ دێ بەرڤ قوناغەکادی چیت و دێ گهوڕین ل بالانسێن هێزێ روویدەن کو دبیت گورانکاری هەتا ل نەخشەیێن سیاسی ژی درۆست بیت، ئەڤ شەڕە دێ بیتە ئەگەرێ بهێزکزنا ناکوکیان دناڤبەرا وەلاتێن دەڤەرێ هەتا وەلاتێن زلهێز ژی دا.

ل دوماهیێ دبێژین رۆژهەلاتا ناڤین د دەمەکێ گەلەک هەستیار دا دبوریت کو دهێتە چاڤەرێ کرن گورانکاریێن مەزن د دەڤەرێ دا چێبن کو دبیت کارتێکرنێ ل سەر هەرێما کوردستانێ ژێ بکەن، لەوما داکو هەرێما کوردستانێ یا پاراستی بیت ل هەردەمەکێ زێدەتر پێدڤی ب ئێکگرتنێ یە لەوما حزب ولایەنێن کوردستانێ داخازکری نە کو ئێکرێز و ئێکهەڵوێست بن و پێکڤە پشتەڤانیێ ل سیاسەتا ڕاست و عەقلانی سەرۆکایەتیا هەرێمێ و حکومەتێ بکەن داکو مافێن گەلێ کوردستانی بهێنە پاراستن.