ب تنێ پارتى ديموكراتى كوردستان نه‌چوويه پاڵ وى پرۆژه‌ى يێ كو ئيمزا بۆ هاتينه كۆمكرن كو به‌غدا ب رێيا بانكێ و راسته‌وخو مووچێ مووچه‌خۆرێن هه‌رێمێ بهنێريت ژبه‌ركو پارتى باش دزانيت كو به‌غدا نيازێن هنارتنا مووچێن فه‌رمانبه‌رێن هه‌رێمێ نينه، ب تنێ ياريكرنه ب هه‌ستێن خه‌لكى دهێته كرن، ئه‌گه‌ر نه ما بۆچى ئيراق پشتى قانوونا بۆدجه‌ى په‌سه‌ند بووى پشكا هه‌رێمێ ژ بۆدجێ ناهنێريت؟ كه‌نگى بۆدجه ب رێك و پێكى ژ به‌غدا هاتيه و هه‌رێمێ دابه‌ش نه‌كريه؟ ژ 2014 وه‌ره به‌غدا بۆدجه ژ هه‌رێمێ بڕيه، ژ 2014 وه‌ره به‌غدا هه‌رێمێ سزا د دده‌ت، به‌غدا يا دژى ب پارێزگه‌هبوونا هه‌له‌بجه بيت، ئه‌م ب ژڤان بين خه‌ما وێ مووچێ فه‌رمانبه‌رێن هه‌رێمێ بيت! .
- دڤێت باش بزانين ل ئيراقێ هيچ سه‌رۆك وه‌زيره‌كێ شيعه نه‌هاتيه كو نيازا وى ئاڤاكرنا ده‌وله‌ته‌كێ بيت، چاره‌كرنا كێشان بيت، سه‌رۆك وه‌زيرێ به‌رى کازمی چ بۆ ئيراقێ كر؟ هه‌تا سوودانى تشته‌كێ بۆ گه‌لێن ئيراقێ بكه‌ت؟ كازمى چوو و ل پاش خۆ ناڤه‌ك هێلا كو ب دزيا سه‌دساليا ديرۆكا ئيراقێ دهێته بناڤكرن كو دبێژنێ "سرقة القرن" و ب ملياره‌ها دۆلارێن ئيراقێ دزين و به‌رزه كرن ما خه‌ما وى هه‌رێم بوو!
- نوكه هه‌رێم نه‌فتێ ناهنێريت و ئيراق ژى 400 هزار به‌رميلێن نه‌فتێ ژ هه‌رێمێ ناوه‌رگريت و ناهێليت هه‌رێم نه‌فتا خوه ژى بفرۆشيت، له‌وما پشت راستم هه‌رێم هه‌مى داهاتێ خوه ژى راده‌ست بكه‌ت، فايده ناكه‌ت ژبه‌ر كو شيعه د برێڤه‌برنا ده‌وله‌تێ دا ل سه‌ر بنه‌مايێ تولڤه‌كرنێ كار دكه‌ت و نيازا وێ نينه ئاریشێن هه‌رێمێ چاره بكه‌ت.
- ب باوه‌را من ئه‌گه‌ر ب هيمه‌ت و فشارێن نێڤده‌وله‌تى نه‌فتا هه‌رێمێ بهێته هنارتن بۆ ڤێ قوناغێ دێ باش بيت، ژبه‌ر كو به‌غدا ئاریشێن مه چاره ناكه‌ت، ولات ب دانا مووچه‌ى برێڤه ناچيت، هه‌رێم سالانه پێدڤى ب هزاره‌هان پرۆژێن خزمه‌تگوزارى هه‌يه، ئاریشا مووچان چاره ببيت ژى هه‌كه ئاریشا بۆدجه‌ى چاره نه‌بيت، چ مفايێ خۆ نينه.
- گه‌له‌ك گرنگه بۆ قوناغێن بهێت رێكخستنا ناڤ مالا كوردى بهێتە بهێز کرن ژبه‌ر كو قوناغێن دژواتر ل پێشيا مه‌نه و دڤێت ب ئێك ده‌نگ روى ب روى ببين.
1
2
3
4
5
6
7
8
