كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

پارێزگارێ دهۆكێ دیڤچونا كه‌یسا گیان ژده‌ستدانا ئافره‌ته‌كێ دكه‌ت

 

پشتى كۆ د رۆژێن بۆرى دا ئافره‌ته‌كا خه‌لكا قه‌زا زاخۆ، ل نه‌خۆشخانا كۆرۆنایێ ل دهۆكێ گیانێ خۆ ژ ده‌ستدایى، ل تۆرێن كومه‌لایه‌تى ره‌نگڤه‌دانێن زور په‌یدا بوون و هند ده‌زگه‌هان دا دیاركرن كۆ ژ ئه‌گه‌رێ نه‌مانا ئۆكسجینێ ئه‌وێ ئافره‌تێ گیانێ خۆ ژ ده‌ستدایه‌ و پارێزگارێ دهۆكێ ژى ل سه‌ر هه‌مان كه‌یسێ سه‌ره‌دانا زاخۆ كر و رونكرنه‌كێ به‌لاڤ دكه‌ت.

د.عه‌لى ته‌ته‌ر نێروه‌ى، پارێزگارێ دهۆكێ ئه‌ڤرۆ سه‌ره‌دانا قه‌زا زاخۆ كر و د كۆنگره‌یه‌كێ رۆژنامه‌ڤانى دا دیاركر: "سه‌ره‌خۆشیێ ل خێزانێن كه‌س و كارێن وان هه‌مو كه‌سان دكه‌ین ئه‌وێن ژ ئه‌گه‌رێ كۆرۆنایێ گیانێ خۆ ژ ده‌ستدایى و ژ دل و جان ئه‌م قه‌ردارێن ده‌زگه‌هێن ساخله‌میێ و نۆژداران و پۆلیس و هێزێن ئێمناهیێ نه‌ ژ به‌ر كۆ بێ راوستیان كار دكه‌ن ژ پێخه‌مه‌ت پاراستنا گیانێ خه‌لكێ مه‌".

گۆتژى: "ئه‌و ئافره‌ته‌ ل رێكه‌فتى 27/7/2020 ژ هه‌ولێرێ ڤه‌گه‌ریایه‌ دهۆكێ و بێ ده‌ستویرى هاتن و چوون ئه‌نجام دایه‌ و پشتى ڤه‌گه‌ریایه‌ دهۆكێ و پشكینن بۆ هاتنه‌ ئه‌نجام دان و دیار بوویه‌ كۆ تووشى په‌تایا كۆرۆنایێ بویه‌".

پارێزگارێ دهۆكێ دۆپاتى ل وێ چه‌ندێ ژى كر: "دوو لیژنێن ڤه‌كۆلینێ مه‌ پێك ئینابوون و دیڤچونا كه‌یسێ هاتیه‌ كرن و ئه‌گه‌ر كه‌مته‌ر خه‌میه‌ك هاتبیته‌ كرن مافێ وانا یه‌ لدویڤ یاسایێ داخازا مافێ خۆ بكه‌ن، لێ ئه‌م قه‌بول ناكه‌ین چ ئاخفتنێن نه‌ جوان ئاراسته‌ى نۆژدارێن مه‌ بهێته‌ كرن".

د.عه‌لى ته‌ته‌ر پارێزگارێ دهۆكێ ئه‌و چه‌نده‌ ژى روونكر: "مه‌ سه‌ردانا ده‌رۆازێ نیڤده‌وله‌تى یێ ئیبراهیم خه‌لیل كریه‌ و بۆ خه‌لكێ خۆ دۆپات دكه‌ین هه‌ر كه‌سه‌كێ ب رێكا ئه‌ڤى ده‌رگه‌هى دهێته‌ هه‌رێمێ پشكنینێن كۆرۆنایێ بۆ دهێته‌ ئه‌نجام دان و ئه‌گه‌ر دیار لبیت هه‌لگرێ كۆرۆنایێ یه‌ ناهێته‌ ناڤا پارێزگه‌ها دهۆكێ دا و ل ئه‌ڤان دوو رۆژان دا دێ تاقیگه‌ها تایبه‌ت یا پشكنینێن په‌تایا كۆرۆنایێ ل قه‌زا زاخۆ كه‌ڤیته‌ كاركرنێ دا".

حكۆمه‌تا هه‌رێما كوردستانێ هاریكاره‌ دگه‌ل خه‌لكێ مه‌ چونكه‌ بهایێ پشكنینان ل ده‌رۆزازێ ئیبراهیم خه‌لیل هاتیه‌ كێمكرن".

ئاماژه‌ ب وێ چه‌ندێ ژى دا: "پتریا كه‌سێن تۆشى په‌تایا كۆرۆنایێ بوین ئه‌و بوونه‌ ئه‌وێن ژ ده‌رڤه‌ى پارێزگه‌هێ هاتینه‌ ناڤا پارێزگه‌ها دهۆكێ دا و هه‌تا ئه‌ڤێ خۆله‌كێ مه‌ كێشا كێمیا ئۆكسجینێ نینه‌ لێ مه‌ هه‌ولدایه‌ پتر به‌رهه‌م بینین و بۆ ڤێ مه‌ره‌مێ كارگه‌هێن به‌رهه‌مئینانا كۆكسجینێ دێ هێنه‌ درۆستكرن بۆ نه‌خۆشخانێن چاره‌سه‌ریا په‌تایا كۆرۆنایێ و ژخه‌لكێ خۆ دخازین هاریكار و پشته‌ڤانێن مه‌ بن و پێگیریێ ب رێنمایێن خۆ پاراستنێ بكه‌ن تا كۆ گیانێ وان ژ هه‌ر جۆره‌ مه‌ترسیه‌كێ دویر بیت".