وێستگەی هەڵمی خەبات بە تەواویی توانای خۆیەوە دەستی بە بەرهەمهێنانى كاره‌با كرد
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

وێستگەی هەڵمی خەبات بە تەواویی توانای خۆیەوە دەستی بە بەرهەمهێنانى كاره‌با كرد

 

لێژنەی سەرپەرشتیاری پرۆژەی وێستگەی 300 مێگاواتیی هەڵمی خەبات له‌ ڕاگه‌یاندراوێكدا ئاماژه‌ به‌وه‌ ده‌دات، وێستگەی 300 مێگاواتیی هەڵمی خەبات بە تەواویی توانای خۆیەوە دەستی بە بەرهەمهێنانى كاره‌با كرد.

شه‌وى ڕابردوو 1/8/2020، لێژنەی سەرپەرشتیاری پرۆژەی وێستگەی 300 مێگاواتیی هەڵمی خەبات ڕاگه‌یاندراوێكى له‌ په‌یجى فه‌رمیی وه‌زاره‌تى كاره‌باى حكوومه‌تى هه‌رێمى كوردستان، له‌ تۆڕى كۆمه‌ڵایه‌تیی (فه‌یسبووك) بڵاو كرده‌وه‌، تێیدا هاتووه‌: "ئێوارەی دوێنێ ئەندازیار كەمال محه‌مه‌د ساڵح، وەزیری كارەبا سەرپەرشتیی ئیشپێكردنی یەكەی دووەمی وێستگەی 300 مێگاواتی هەڵمی خەباتی كرد و توانرا بە سەركەوتوویی وێستگەكە بە تەواویی توانای خۆیەوە بەكار بخرێت، بەمەش ئاستی بەرهەمهێنانی كارەبا لە هەرێمی كوردستان گەیشتە سێ هه‌زار و 400 بۆ سێ هه‌زار و 500 مێگاوات، بەم بڕە كارەبایەش توانرا بەتێكڕا 20 تا 21 كاتژمێر كارەبا بە هاووڵاتییان بدرێت".

باس له‌وه‌ش كراوه‌: "وەزیری كارەبا وێڕای دەستخۆشی لە ستافی لێژنەی سەرپەرشتیاری پرۆژەكە داواشی لێ كردن، بە هەماهەنگی لەگەڵ تیمی ئیشپێكردنی وێستگەكە و سەرجەم فەرمانبەرانی ئیشكگر لە كۆنترۆڵ و وێستگەكان و چاكسازییەكان هەموان پێكەوە پارێزگاری لەم دەستكەوتە بكەن و كارەبای پێویست بدەنە هاونیشتمانیان".

مەسرور بارزانی، سەرۆكی حكوومەتی هەرێمی كوردستان لە 14ی مانگی ڕابردوودا لە مەراسیمێكدا وێستگەی 300 مێگاواتیی هەڵمی خەباتی كردەوە و لەقۆناغی یەكەمدا بەتوانای 150 مێگاوات وێستگەكە كاری كرد، ئەم وێستگەیەش جیاوازە لە وێستگەكانی دیكەی كارەبا و بە یەكێك لەپرۆژە گەورە و ستراتیژییەكان دادەنرێت، كە بۆ یەكەمین جارە لەسەر ئاستی كوردستان بە تەكنەلۆژیایەكی بەرز لەڕێگەی نەوتی ڕەش و گەرمكردنی ئاوەوە وزەی كارەبا بەرهەم دەهێنرێت و لەڕووی تێچوونەوە، سوودێكی ئابووریی زۆرى هەیە.