دوای نیوەڕۆی ئەمڕۆ گەنجێک لە کاتی ئەنجامدانی یارییەکی ئاویدا لە زێی دوکان خنکا و قائیمقامییەتی قەزای دوکانیش زانیاری لەمبارەیەوە خستە روو.
قائیمقامییەتی قەزای دوکانی لە راگەیاندراوێکدا کە کۆپییەکی بە (باسنیوز) گەیشتووە و تێیدا هاتووە: "پاشنیوەڕۆی ئەمڕۆ لە زێی دوکاندا گەنجێکی تەمەن ٢٠ ساڵان لەکاتی ئەنجامدانی یارییەکی ئاویدا خنکا".
روونیشکراوەتەوە، ئەو گەنجە ناوی (ک - ئ) دانیشتوی قەزای دوکانە، ئەمەش سێیەمین ڕووداوی خنکانە لەم ساڵدا.
هەروەها قائیمقامییەتی قەزای دوکانیش ئاگاداری ھاووڵاتییان و گەشتیاران دەکات کە ئاوی زێی دوکان دەگیرێتەوە، تا بتوانن تیمەکانی مەلەوانی و ھاووڵاتیاین تەرمی ئەو گەنجە بدۆزنەوە.
هەر لە راگەیاندراوەکەدا داوا لە گەشتیاران و ھاووڵاتییان دەکرێت کە ئاگاداری بەرزی و نزمی ئاوی زێی دوکان بن، تا بەدوور بن لە ھەر ڕووداوێکی نەخوازراو.