هەدەپە لە هاوپەیمانیی شاراوەوە بۆ هاوپەیمانییەكی ئاشكرا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

 هەدەپە لە هاوپەیمانیی شاراوەوە بۆ هاوپەیمانییەكی ئاشكرا

جەهەپە دەیەوێت هەدەپە بێنێتە ناو هاوپەیمانیی میللەتەوە

لە ٣٧ ەمین كۆنگرەی جەهەپەدا كە گەورەترین پارتی ئۆپۆزیسیۆنی توركیایە، كەمال كلیچدارئۆغلۆ سەرۆكی ئەو پارتە، بۆ یەكەمجار بە ئاشكرا گوتی ئەگەر پێویست بكات هەدەپەش دەخەینە ناو هاوپەیمانیی خۆمانەوە، كە مەبەستی هاوپەیمانی (میللەت) بوو. سەركردەیەكی باڵای ئەو پارتەش پێیوایە هیچ پارتێك بەبێ هاوپەیمانی ناوتوانێت ٥٠+١ بەدەست بهێنێت.

پێشتر هاوپەیمانی (میللەت) كە لە نێوان "جەهەپە و پارتی باش و سەعادەت"دا دروست ببوو، هەدەپەی تێدا نەبوو، بەڵام هەدەپە لە رێككەوتنێكی نهێنیدا لەگەڵ جەهەپە لە هەڵبژاردنی شارەوانییەكان لە ٣١_٣_٢٠١٩ بۆ شارەوانی (ئەنقەرە، ئیستانبۆڵ، مێرسین و ئەدەنا و ئەنتاڵیا) هیچ كاندیدێكی نەبوو و پاڵپشتی لە كاندیدی هاوپەیمانیی (میللەت) كرد.

ئەوكات هەدەپە نەخرایە ناو ئەو هاوپەیمانییەوە، چونكە پارتی باش رێگر بوو و دەیگوت هەدەپە باڵێكی مەدەنیی پەكەكەیە لە توركیا و نابێت بە هیچ شێوەیەك لەگەڵیدا بچینە ناو هاوپەیمانییەوە. هەڕەشەشی لە جەهەپە كرد، ئەگەر هەدەپە بێتە ناو هاوپەیمانی (میللەت) پارتی باش لەو هاوپەیمانییە دەكشێتەوە.

بەڵام ئێستا هاوكێشەكە گۆڕاوە، چونكە بۆ ئۆپۆزیسیۆن دەركەوتووە بەبێ هەدەپە هیچ پارتێكی سیاسی لە توركیا ناتوانێت لە هەڵبژاردنی داهاتوودا٥٠+١ بە دەست بهێنیت. بۆیە ئەگەر زۆرە جەهەپە بڕوا بە پارتی باش بهێنێت تا هەدەپەش بخەنە ناو هاوپەیمانی (میللەت)ەوە، ئەگەر پارتی باش رازیش نەبوو ئەوكات بەرەی ئۆپۆزیسیۆن ناتوانن ركابەری ئاكەپە و رەجەب تەییب ئەردۆغان بكەن لە هەڵبژاردنی داهاتوودا.

تونج سۆیار ئەندامی سەركردایەتیی جەهەپە و ئەندام پەرلەمانی توركیا، پێیوایە هیچ پارتێكی سیاسی لە توركیا بەبێ بوونی هاوپەیمانی ناتوانێت ببێتە زۆرینە و ٥٠+١ بەدەست بهێنیت.

سۆیار لە لێدوانێكیدا بۆ ئاژانسی (BBC) پێیوایە ئەگەر هەر پارتێكی سیاسی لە توركیا بیەوێت٥٠+١ بەدەست بهێنیت، دەبێت ئەوە بزانێت ئەو سەردەمە بەسەر چووە کە پارتێك بتوانێت بە تەنیا ئەو دەنگە بهێنێت، بەڵكوو دەبێت تەنیا لەڕێگەی هاوپەیمانییەوە رێژەی دەنگەكانی بگاتە ئەو ئاستە.

ئەو دەڵێت: "ئاكەپە، جەهەپە، هەدەپە، مەهەپە و پارتی باش، هەموویان ناچارن پارێزگاری لە٥٠+١ بكەن و ئەوەش لەڕێگەی هاوپەیمانییەوە دەبێت. جەهەپە نەیتوانی لە دەرەوەی ئەو هاوكێشەیە بێت، بۆیە رێگەی راستی هەڵبژارد و چووە ناو هاوپەیمانیی (میللەت)ەوە".

مەدحەت سینجار هاوسەرۆكی هەدەپە، لە دیمانەیەكدا باسی لە هاوپەیمانی كرد بۆ هەڵبژاردنی داهاتووی توركیا. ئەو ئاشكرای كرد ئەمجارەیان هەدەپە بە نهێنی ناچێتە ناو هیچ هاوپەیمانییەتێكەوە، بەڵكوو هەر پارتێكی سیاسی بیەوێت لەگەڵ هەدەپەدا بچێتە ناو هاوپەیمانییەوە، پێویستە بە ئاشكرا و بەبێ ترس باسی بكات.

سینجار باسی لەوەش كرد، لە هەڵبژاردنی داهاتوودا ئەگەر نەچنە ناو هیچ هاوپەیمانییەتێكەوە، ئەوكات بۆ هەڵبژاردنی سەرۆكایەتی و پەرلەمان كاندیدی تایبەت بە خۆیان دەبێت.

بە گوێرەی ئەنجامی راپرسییەكانی توركیا، هیچ پارتێكی سیاسی لە توركیا ناتوانێت بەبێ هەدەپە ٥٠+١ بەدەست بهێنیت، چونكە هاوكێشەی سیاسی گۆڕاوە و دەنگەكانی ئاكەپە لە توركیا١٠٪ كەمی كردووە.

هەدەپە خاوەنی ٦ ملیۆن دەنگە لە توركیا و١١٪ی كورسی پەرلەمانی هەیە، بۆیە بچێتە ناو هەر هاوپەیمانییەتێكەوە، ئەگەری بەهێزە ئەو هاوپەیمانییە ببێت بە زۆرینە.