عێراق.. هەوڵی دووبارە کارکردن لە پرۆژەی هاوردەکردنی کارەبا لە کوێت دەدرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

عێراق.. هەوڵی دووبارە کارکردن لە پرۆژەی هاوردەکردنی کارەبا لە کوێت دەدرێت

کۆبوونەوەکانی حکوومەتی عێراق و کوێت بۆ دووبارە کارکردن لە پرۆژەی هاوردەکردنی کارەبا لە کوێت، دەستیان پێکردووەتەوە.

ئەمڕۆ یەکشەممە 26-7-2020، ئەحمەد عەبادی، گوتەبێژی وەزارەتی کارەبای عێراق لە بەیاننامەیەکدا رایگەیاندووە، پرۆژەی بەستنەوەی کارەبای عێراق بە کەنداوی عەرەبی 300 کیلۆمەترە، 80 کیلۆمەتر لە عێراقە و ئەوەی دیکە لە کوێتە.

ئەحمەد عەبادی هەروەها رایگەیاندووە، عێراق %80ـی کارەکانی دروستکردنی وێستگەیەک بۆ وەرگرتنی کارەباکە و دامەزراندنی هێڵی گواستنەوەی، تەواو کردووە.

گوتەبێژی وەزارەتی کارەبای عێراق ئاماژەی بەوەش کردووە، کە بڕیاربوو لە مانگی 10ـی ئەمساڵ بڕی 500 مێگاوات لە کەنداوەوە بگاتە بەسرە، بەڵام بەهۆی پەتای کۆرۆنا و دابەزینی نرخی نەوت، کارکردن لە پرۆژەی هێنانی کارەبا لە کەنداو، سستی تێکەوت و وەستا.

بە گوتەی عەبادی، کۆبوونەوەکان بۆ دەستکردنەوە بە کارکردن لەو پرۆژەیە دەستیان پێکردووە و گەیاندنی کارەبای کەنداو بۆ عێراق، 12 تا 14 مانگی پێویستە.

گوتەبێژی وەزارەتی کارەبای عێراق ئاشکرای کردووە، کە لەگەڵ کۆمپانیایەکی ئیتاڵی رێککەوتوون بۆ تاوتوێکردنی گرنگیی ئابووریی پرۆژەی بەستنەوەی کارەبای عێراق و سعودیە.