میدیاكانی توركیا: هیچ لایەنێکی دەرەکی دالیا مەحموودی ڕادەستی تورکیا نەکردووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

میدیاكانی توركیا: هیچ لایەنێکی دەرەکی دالیا مەحموودی ڕادەستی تورکیا نەکردووە

خۆی ڕادەستی ئاسایشی مێرسین کردووە

ڕێکەوتی ١٥/٧/٢٠٢ (دالیا مەحموود موسلیم) برازای ساڵح موسلم، بەرپرسی پەیوەندیەكانی دەرەوەی تەڤدەم، خۆی رادەستی بەڕێوەبەرایەتیی ئاساییشی مێرسین لە باکووری کوردستان كرد، ئەمەش بووە هۆی باسوخواسی میدیاكانی توركیا و هەرێمی كوردستان، بەڵام میدیاكانی توركیا شرۆڤەی جیاجیا بۆ خۆ رادەستكردنی دالیا دەكەن.

رۆژنامەی (حوڕیەت)ی توركی، لەسەر زاری چەند بەرپرسێكی ئاساییشی "مێرسین"ەوە بڵاوی كردووەتەوە، دالیا كاتێك خۆی رادەستی پۆلیس كردووە، دووگیان بووە. هەروەها ئاشكرای دەكات تەنیا لە ساڵی٢٠٢٠دا ١١٠ كەسی سەر بە یەپەگە لە سووریاوە خۆیان رادەستی توركیا كردووە و وازیان لەو رێكخراوە هێناوە.

هاوکات تەلەفزیۆنی (CNN)ی توركی راپۆرتێكی لەسەر (دالیا موسلیم) بڵاو كردووەتەوە و، لەوێدا روونی دەكاتەوە كە دالیا خۆی رادەست كردووەتەوە و هیچ لایەنێك یان حیزبێكی كوردی ئەوی رادەستی توركیا نەكردووە.

هەمان ماڵپەر بۆچوونی (عەبدوڵا ئاغار)ی وەرگرتووە كە شارەزای بواری سەربازییە لە توركیا و ئەو پێیوایە ئافرەتێك بتوانێت لەناو یەپەگە رابكات زۆر گرنگە، چونكە راكردنی ئافرەت لەو رێكخراوە زۆر ئەستەمە.

ئاغار دەڵێت: "پیاو لەناو ئەو رێكخراوەدا ئاسانە رابكات و دەستبەرداری چەك بێت، چونكە ئەوان ئەگەر خۆیان رادەستی دەوڵەتیش نەكەن، بە جۆرێك لە جۆرەكان دەتوانن لە شوێنێكی‌تر و بوارێكی‌تردا درێژە بە ژیان بدەن، بەڵام بۆ ئافرەت بابەتەكە جیاوازە و دەورووبەر بە چاوێكی‌تر سەیری ئافرەت دەكات كاتێك لە رێكخراوەكە جیا دەبێتەوە، ئەستەمە بتوانێت جارێكی‌تر لەناو كۆمەڵگەدا بژێت، بۆیە راكردنی ئافرەت زۆر كەمە لەناو یەپەگەدا و لەو ڕووەوە راكردنی دالیا و خۆبەدەستەوەدانی بابەتێكی زۆر گرنگە".

چەند میدیایەكی سەر بە یەكێتیی نیشتیمانیی كوردستان و لایەنەكانی‌تر، پارتی دیموكراتی كوردستان تۆمەتبار دەكەن بەوەی دالیای رادەستی توركیا كردووە، بەڵام میدیاكانی توركیا هەموو ئەو دەنگۆ و چەواشەكارییانە رەت دەكەنەوە.

میدیاكانی سەر بە ئۆپۆزسیۆن و ئەوانەش کە بێلایەنن، ئەگەر سەرەداوێكیان دەست بكەوێت لەبارەی ئەوەی پارتی دالیای رادەستی توركیا كردووەتەوە، رەحم بە پارتی ناكەن و بە مانشێتی گەورە بڵاوی دەكەنەوە. ئەوان شەرم لە میتی توركیا ناكەن بۆ بڵاوكردنەوەی راستییەكان. هەر بۆ نموونە لە ٢٠١٦ ئێردەم گوور لە رۆژنامەی (جومهوریەت) بە بڵاوكردنەوەی چەند وێنەیەك ئاشكرای كرد كە توركیا بە نهێنی چەكی بۆ گرووپی تیرۆریستیی داعش ناردووە.

رۆژنامەی (خەبەر تورك) لە راپۆرتێكدا باس لەوە دەكات، (دالیا موسلیم) یەكێك بووە لەو ئافرەتانەی چەند جارێك لە كۆبوونەوەی پەكەكەدا بەشداریی كردووە، كە هەریەك لە (جەمیل بایك، دوران كاڵكان و موراد قەرەیلان) بەشدارییان تێدا كردووە و دالیا گوتوویەتی ئەوان بەردەوام بە توركی قسەیان كردووە و نامە و بەیاننامەكانیشیان هەر بە زمانی توركی بڵاو كردووەتەوە.

هەمان رۆژنامە دەنووسێت: "دالیا یەكێك بووە لەو ئافرەتانەی بیر و بۆچوونی جیاوازی هەبووە و لە كۆبوونەوەكاندا بەردەوام بە توندی دژی هەر بڕیارێك بووە كە بە دڵی نەبووە و یەكێك بووە لەو ئافرەتانەی خاوەن بۆچوونی خۆی بووە".

بە گوێرەی زانییاریەكانی (خەبەر تورك)، باوكی دالیا بە ناوی مەحموود موسلیم، بەردەوام گوتوویەتی یەكێك لە منداڵەكانی دەكاتە دیاری بۆ یەپەگە، بۆیە دالیای لە تەمەنی ١٤ ساڵییەوە خستە ریزی شەڕوانان.

هەموو میدیاكانی توركیا ئەو راستییەیان بڵاو كردووەتەوە، كە دالیا بەهۆی خۆشەویستیی بۆ كوڕێك وازی لە یەپەگە هێناوە و ئەوان دەڵێن لەلایەن كەسێكەوە بڕوای پێ هێنراوە بێتە توركیا و بە ئارەزووی خۆی خۆی رادەست بكات.

هاوکات تەلەفزیۆنی (NTV) توركی بڵاوی كردووەتەوە، دالیا بە ئارەزووی خۆی هاتووەتە مێرسین و لەوێ خۆی رادەستی بەڕێوەبەرایەتیی ئاساییش كردووە.

هەمان تەلەفزیۆن بە پشتبەستن بە زانیارییەكانی حكوومەت، ئاشكرای دەكات لە سەرەتای مانگی٢٠٢٠ەوە تاوەكو ئێستا١١٠ ئەندامی یەپەگە و پەكەكە خۆیان رادەستی توركیا كردووەتەوە.

ئەو میدیایانەی لە میدیاكانی هەرێمی كوردستان، کە پارتی تۆمەتبار دەكەن بەوەی دالیای رادەستی توركیا كردووەتەوە، هیچ میدیایەكی توركیایان وەكوو سەرچاوە بەكار نەهێناوە، لە كاتێكدا بۆ وەرگرتنی زانیاریی دروست، دەبێت بگەڕێنەوە بۆ میدیاكانی توركیا، بە تایبەت ئەو میدیایانەی سەر بە ئۆپۆزسیۆن و بێلایەنن، چونكە سڵ لە گوتنی راستی ناكەنەوە.

دەبێت ئەوەش باس بكرێت، ئەگەر راست بوایە کە هەر لایەنێکی دەرەکی دالیای رادەستی توركیا كردبا، ئۆپۆزسیۆنی توركیا وەكوو سووكایەتییەك بۆ حكوومەتی ئاكەپە باسیان دەكرد و دەیانگوت حكوومەتی ئاكەپە ئەوەندە لاوازە بەرامبەر بە پەكەكە، بۆیە داوای لە لایەنی دەرەکی كردووە ئەندامێكی سەر بە یەپەگە رادەستی توركیا بكاتەوە.

ئەگەر دالیا لە هەر لایەنێكی دیكەی دەرەكییەوە دەستگیر بكرایە و رادەستی توركیا بكرایە، ئەوا ئاكەپە و حكوومەتەكەی دەیانگوت لە ئۆپەراسیۆنێكدا دەستگیریان كردووە و وەكوو دەستكەوتێك لێیان دەڕوانی، بەتایبەت بۆ ئێستای ئاكەپە بابەتێكی لەو شێوەیە زۆر گرنگە، چونكە دەنگەكانی بەرەو كەمبوونەوە دەچێت، بەڵام میدیاكانی سەر ئاكەپەش نەیانشاردەوە كە دالیا خۆی رادەست كردووە.