BBC نهێنییەكی گەورەی مستەفا كازمی ئاشكرا دەكات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

BBC نهێنییەكی گەورەی مستەفا كازمی ئاشكرا دەكات

جیاوازی حكوومەتی نوێی عێراق تەنها بانگەشەی میدیاییە


ئەمڕۆ یەكشەممە تۆڕی هەواڵی BBCی بەریتانی لە راپۆرتێكی ڤیدیۆییدا نهێنییەكی گەورەی حكوومەتی نوێی عێراقی بە سەرۆكایەتی مستەفا كازمی ئاشكرا كرد و رایگەیاند كە تاكە جیاوازی لەگەڵ حكوومەتەكانی پێش خۆی، ئەو بانگەشە میدیاییەیە كە كازمی بۆ خۆی دەیكات، بەبێ ئەوەی هیچ هەنگاوێكی بەرەو چاكسازی و چارەسەری كێشەكان نابێت.


ئەمەش لە كاتێكدایە كە مستەفا كازمی لە سەرەتای دەستبەكاربوونیەوە لە هەڵسوكەوتەكانیدا دەردەكەوت كەسایەتییەكی میدیاییە و زیاتر خەریكی نمایشە لە ڕێگەی تۆڕە كۆمەڵایەتییەكانەوە، بۆ ئەمەش پشتی بە فۆتۆگرافەری پرۆفیشناڵ و هێزێكی گەورە لە ناو تۆڕە كۆمەڵایەتییەكان بەستووە.


BBC لەمبارەیەوە راپۆرتێكی ڤیدیۆیی لەسەر فۆتۆگرافەری مستەفا كازمی بڵاو كردەوە و تیایدا ئاماژەی بەوە كردووە كە سەرۆك وەزیرانی نوێ زیرەكانە لە ڕێگەی وێنەی سەرنجڕاكێشەوە رووخساری خۆی بەو شێوەیە پێشانی گەلی عێراق دەدات كە خزمەتكاری هاووڵاتییانە و كار و پرۆژەی زۆری بەدەستەوەیە، لە كاتێكدایە تا ئێستا بە گوێرەی BBC و ڕای هاووڵاتییانی عێراق لە تۆڕە كۆمەڵایەتییەكاندا، هەڵوێست و ئیشەكانی كازمی زیاتر خۆیان لە وێنەی فۆتۆگرافی و ڤیدیۆی دروستكراودا دەبیننەوە.


تۆڕە هەواڵە بەریتانیەكە بە دیاریكراوی باسی لە چەند وێنەیەكی كازمی كردووە كە ناشێ هیچ فۆتۆگرافەرێك بە شێوەی ئاسایی بیانگرێ، بە پێچەوانەوە پێویست دەكات فۆتۆگرافەر لەسەر زەوی ڕابكشێ بۆ ئەوەی وێنەیەكی كازمی لە ژێرەوە بگرێ، یان پێویست دەكات بەسەر دیوارێكی بەرزدا هەڵبگەڕێ بۆ ئەوەی وێنەی كۆبوونەوەیەكی كازمی بگرێ و مێزی كۆبوونەوەكەی فرەوانتر لە قەبارەی خۆی بخاتە پێش چاو، هەروەها لێنزی بەرفرەوانی كامێرا "wide lens" بەكاردێنێ، بۆ ئەوەی كازمی لەسەر مێزەكەیدا زلتر بخاتەڕوو وەك لە شێوەی ئاسایی خۆی.


لەم ڕووەوە BBC ژمارەیەك پۆست و كۆمێنتی هاووڵاتییانی عێراقی لە تۆڕە كۆمەڵایەتییەكانی فەیسبووك و تویتەر خستووەتەڕوو، هەریەكە بە شێوەی سەرنجڕاكێش تەنزیان لە كازمی داوە، یەكێك بە ناوی ئەسما كوبەیسی دەڵێ "تاكە گۆڕانكاری راستینە كە لە دەسەڵاتی عێراقدا لە ماوەی حكوومەتەكەی كازمیدا رووی دابێت، تەرخانكردنی فۆتۆگرافەرێكی پرۆفیشناڵە لەلایەن كازمییەوە، ئەویش تەنها بۆ ئەوەی وێنەی سەرنجڕاكێش و نائاسایی سەرۆك وەزیران بگرێ".


كەسێكی تریش بە پێكەنینەوە هەڵسوكەوتەكانی كازمی بە هی مرۆڤێكی كلاوچی بەراورد كردووە و نووسیویەتی "وێنەیەكم بگرە كاتێ دوعا دەكەم! كاتێ دەستم بەرز دەكەمەوە! وێنەیەكم بگرە ئاگام لەخۆم نەبێ!".


یەكێكی تریش بە ناوی ئەمین لە (تویتەر) نووسیویەتی "فۆتۆگرافەری كازمی شایەنی وەرگرتنی خەڵاتی باشترین فەرمانبەری ساڵە، چونكە لەوەتەی راسپاردنی مستەفا كازمییەوە، تاكە كەسە لە حكوومەتەكەی كازمیدا پارەكەی خۆی حەڵاڵ كردبێت".


سەرەڕای ئەمانەش، ڤیدیۆیەكی دروستكراوی مستەفا كازمی لە رۆژەكانی یەكەمی دەستبەكاربوونیدا، بۆ ماوەیەك بووە جێی گاڵتەی هاووڵاتییانی عێراق لە تۆڕە كۆمەڵایەتییەكاندا و زوو نازناوی بەوە دەركرد كە سەرۆك وەزیرانێكی فەیسبووكاویە، ئەمەش بە هۆی ئەوەی لە كاتی پەیوەندییەكی تەلەفۆنیدا لە نووسینگەكەی دەردەكەوێ، گوایە بە تەلەفۆن براكەی خۆی سەركۆنە دەكات، چونكە داواكاری لێ هەبووە، پرسیارە گەوهەرییەكەی هاووڵاتییانی عێراقیش ئەوە بوو داخۆ كێ لە ناو نووسینگەی كازمی بە بێ ئاگاداری كازمی، بە كامێرا پەیوەندیی تەلەفۆنی كازمی و براكەی تۆمار كردووە و بڵاویشی كردووەتەوە؟