سۆلۆی حزبەکان لە تۆن دەرچوون
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

سۆلۆی حزبەکان لە تۆن دەرچوون

 

لەم دۆخەی ئێستای هەرێمی كوردستاندا، هه‌ر لایه‌ن و گرووپێك ده‌دوێنیت یان گوێی لێ دەگریت، بە حسابی خۆی، شمشاڵێكی سحراوی لێ دەدات و بانگه‌شه‌ی دڵسۆزی بۆ هەرێمی كوردستان و خەڵكە ستەمدیدەكەی دەكات، لێ كەم لایەنیان توانای لەئەستۆگرتن و رووبەڕووبوونەوەی بەرپرسیارێتییەكەیان هەیە، كەمیان بەرچاوڕوونی و پلان و ستراتیجیان هەیە بۆ ئایندەی هەرێمی كوردستان و خەڵكەكەی. هەموویان میدیایان هەیە، هەریەكەیان لە میدیاكانیانەوە لەبارەی ئەم دۆخەوە دەدوێن، بەڵام هەندێكیان یان بڵێم زۆربەیان، كاریگەریی زۆر خراپیان لەسه‌ر سایكۆلۆژیای خەڵك و بینه‌ر و لایەنگرانیان هەیە، تەنانەت هەندێكیان به‌‌ ئاوازێك ده‌خوێنن خۆیان باش دەزانن نەشازە، بەڵام هەوادارانیان باوەڕیان پێدەكەن، لاوازیی ئاستی هۆشیاری و فكریی تاكیش له‌و دەمەدا دەبێت كە سۆز زاڵ بێت بەسەر ئاوەز و لۆژیكدا.

داواكاریی حزبەكان
هه‌موو له‌ یه‌ك كه‌شتیداین، به‌ڵام هه‌ریه‌كه‌و دەیەوێ ئاراسته‌ی كه‌شتییه‌كه‌ بەو لایەدا بگۆڕێت كە خۆی پێی خۆشە، ئەگەرچی زۆربەیان نازانن ئەو ئاراستەیەی ئەوان دەیانەوێ كەشتییەكەی بۆ بەرن، راستە یان هەڵە، دەمانگەیەنێتە ئامانج یان نا، یاخود زۆریان دەزانن هەڵەیە و مەترسیدارە، بەڵام سەرنشینان چەواشە دەكەن!

‌ئێستا هه‌موو ئه‌و داواكارییانه‌ی كه‌ له ئه‌جێندای سیاسیی حزبه‌كانی هه‌رێمی كوردستاندان،‌ لای هه‌موان زۆر روون و ئاشكران، هەندێكیان وه‌ك بالۆن به ‌ئاسماندا به‌رز ده‌كرێنه‌وه، ماوەیەك خەڵكی پێوە سەرقاڵ دەكەن و دۆخی دەروونییانی پێ تێك دەدەن، كەچی له‌پڕ دیار نامێنن، بەداخەوە كەمیان لە خەمی یەكخستن و یه‌كده‌نگی و گه‌یشتن به ‌پێکھاتن و سازانێكدان، كەمیان ستراتیجێكی نیشتمانییان هەیە، بەشێكی زۆریان ئینشائیات و دروشم و قسەی سواو و سەدبارەن، بۆیە بۆ خەڵكیش روون نییە كه‌ داخۆ ئه‌م گرووپ ‌و حزبه‌ سیاسییانه‌ی هه‌رێمی كوردستان چیان ده‌وێت؟

بۆ نموونه:
تاقمێك داوا ده‌كه‌ن مووچه‌ راسته‌وخۆ له‌ به‌غداوه‌ دابه‌ش بكرێت! بەبێ ئەوەی لە گرنگی و پێگەی مێژوویی قەوارەی هەرێمی كوردستان حاڵی بووبن، بەبێ ئەوەی بیر لەوە بكەنەوە، ئاخۆ دەستوور و یاساكانی ئێستای عێراق رێ بە جێبەجێكردنی ئەم بانگەشە بێ بنەمایە دەدەن یان نا؟!

تاقمێكی دی له‌ فه‌زایه‌كی نه‌زه‌ریدا ده‌سووڕێنه‌وه‌ باسی لامه‌ركه‌زییه‌ت دەكەن، بەڵام تەنیا پرۆژەی بێ بنەما و بانگەشەیە بۆ بەرژەوەندییە‌ سیاسییه‌كانی خۆیان به‌كاری ده‌هێنن!

هه‌ندێكی تر به‌ ئەجیندای دوژمنان و داگیركەران، بانگەشەی هەڵوەشاندنەوەی قەوارەی هەرێمی كوردستان دەكەن.

تاقمێكی تر داوا دەكەن وەك سەردەمی بەعس و خیانەتی ١٦ی ئۆكتۆبەر، عێراق لەشكركێشی بكاتە سەر خاكی هەرێمی كوردستان.

له‌م نێوه‌نده‌شدا به‌دڵنیاییه‌وه‌ چه‌ند حزب و خه‌مخۆرێكی ئه‌م نیشتمانه‌ هه‌ن كه‌ ده‌یانه‌وێت كوردستان وه‌ك سۆمای چاو بپارێزن، له ‌خه‌می دابینكردنی رێكخستنەوە و زۆركردنی داهات و رێكخستنەوە و كەمكردنی خەرجییەكان و دابینكردنی خزمەتگوزاری و مووچه‌ی مووچەخۆران و رووبەڕووبوونەوەی كۆرنا و لێكەوتەكانیدان.

راسته‌ هەرێمی كوردستان چاره‌كه‌ سه‌ده‌یەك زیاتر‌ توانیویە‌تی لەرووی یاسایی و دەستوورییەوە بگاتە ئاستی هه‌رێمێكی فیدراڵیی دانپێدانراو له‌ چوارچێوه‌ی عێراقی فیدراڵدا، بەراورد بە ناوچەكانی تری عێراقیش، هەرێمی كوردستان لە هەموو روویێكەوە زۆر لەپێشترە، بێ گومان ئەگەر كەموكوڕی و گەندەڵی و ناعەدالەتی و شەڕ و كێشەی سیاسی نەبوایە، ئێستا هەرێمی كوردستان زۆر بەهێزتر دەبوو، بەڵام دەبێ بشزانین كە هەرێمێكی خۆڕاگر بوو، لەچاو گەورەیی ئەو هەموو دوژمنەی كە هەیەتی.

هه‌نگاوی چاره‌سه‌ر
ئەگەر ئه‌و تاقم و لایەنانه‌ی كه‌ ده‌نگ و ره‌نگیان له‌م هه‌رێمه‌دا هه‌یه،‌ لۆژیكمه‌ندانه‌ و بەڕاستی بیانەوێت خزمەتی خەڵكی كوردستان و قەوارەی هەرێمی كوردستان بكەن، دەبێ باش بزانن كە بەهێزیی هەرێمی كوردستان و حكوومەت و ئەزموونەكەی، بەهێزیی ئەوانیشی بەدوادا دێت، دەبێ بەر لە هەموو شت، چه‌تری سەرۆكایەتیی هەرێم و پەرلەمان و حكوومه‌تی هه‌رێم و دەسەڵاتی دادوەری، وەك چوار دەسەڵاتی باڵا قبووڵ بكەن.

پێویستە دوای رازیبوون بە بەهێزیی ئەم دەسەڵاتە باڵایەنە، ئنجا لە رێی لێدوان و گوتار و هەڵوێست و میدیا و هەوڵەكانیانەوە، كار بۆ یەكڕیزی و بەهێزی و یەك گوتاری و سازان و پێكهاتنی سیاسی بكەن، تاكوو به‌رنامه ‌و كارنامەی هه‌ر یه‌كێك له‌م گرووپ و حزبانه‌ تاوتوێ بكرێن و ئه‌وه‌ی كه‌ سوودمه‌نده‌ بۆ ئه‌م گه‌ل و نیشتمانه‌ له‌ ئه‌جیندای كاركردندا جێگای خۆی بگرێت.

ده‌رگا داخراوه‌كان به ‌كه‌لێن و ترازان ناكرێنەوە، بەڵكوو بە گفتوگۆ و لێك تێگەیشتن دەكرێنەوە، هه‌نگاونان به‌ره‌و كوردستانێكی بەهێز كە هەموان تیایدا بەهێز بن، وامان لێ دەكات بەرامبەر هەڕەشە دەرەكی و ناوخۆییەكان بەهێزتر و خۆڕاگرتر بین، ئەوەی ئەمڕۆ لە بەغداوە بەرامبەر كورد دەكرێت، پێویستی بە هێز و ئیرادە و یەكڕیزی هەیە، تا یەك خواست و یەك دەنگ نەبین، بەغدا و هەموو نەیارەكان، لاواز دەمانبینن و هەوڵی رووخاندنمان دەدەن.