بەڕێوەبەری سایلۆی هەولێر: لە پارێزگای هەولێر 110 هەزار تۆن گەنم لە جووتیاران وەردەگیرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

بەڕێوەبەری سایلۆی هەولێر: لە پارێزگای هەولێر 110 هەزار تۆن گەنم لە جووتیاران وەردەگیرێت

"پرۆسەی وەرگرتنی گەنم هەتا کۆتایی ئەم مانگە بەردەوام دەبێت"

بەڕێوەبەری سایلۆی هەولێر لەبارەی پرۆسەی وەرگرتنی گەنم لە جووتیارانی پارێزگای هەولێر زانیاریی خستە ڕوو و گوتی لە ١٤ی مانگی ڕابردووەوە و دەستمان کردووە بە پرۆسەی وەرگرتنی گەنمی جووتیاران و پێشبینی دەکەین هەتا کۆتایی ئەو مانگە بەردەوام بێت.

هێمن موراد، لەمبارەوە بە (باسنیوز)ی ڕاگەیاند: "هەرچەند پرۆسەی وەرگرتنی گەنمی جووتیاران حکوومەتی عێراق وەئەستۆی گرتووە، واتە کاتی کۆتایی هەر ئەوان دەستنیشانی دەکەن، بەڵام پێشبینی دەکەین کە هەتا کۆتایی ئەم مانگە پرۆسەی وەرگرتنی گەنم هەر بەردەوام بێت و ئێستا گەنمی جووتیارانی سنووری فەرمانگەی کشتوکاڵی سەڵاحەدین وەردەگیرێت و هەتا ئێستا گەنممان لە جووتیارانی سنووری شەش فەرمانگەی کشتوکاڵی وەرگرتووە".

ڕاشی گەیاند: "پاش وەرگرتنی گەنمی جووتیارانی سەڵاحەدین، دەست دەکەین بە وەرگرتنی گەنمی جووتیارانی ناحیەی حەریر".

بەڕێوەبەری سایلۆی هەولێر ئاماژەی بەوەش کرد: "لە سنووری پارێزگای هەولێر دەسەڵاتی ئەوەمان پێ دراوە کە 110 هەزار تۆن گەنم وەربگرین، بەڵام هەتا دوێنێ شەممە 2020.7.11 بڕی 64 هەزار تۆن گەنممان لە جووتیاران وەرگرتووە."

هیوا موراد، لەبارەی چۆنەتی وەرگرتنی گەنمی جووتیارانەوە گوتی: "بەدڵنیاییەوە ئێمە پشکنینی تەواو بۆ ئەو گەنمانە دەکەین کە وەریان دەگرین، بۆ ئەم مەبەستەش تاقیگەیەکی پێشکەوتوومان هەیە و کەسی شارەزا و لێهاتوو تێیدا کار دەکەن بەدڵنیاییەوە ئێمە ناهێڵین گەنمی زیانبەخش و پیس تێکەڵی گەنمی پاک بکرێت، چونکە ئەو گەنمە لەلای ئێمە وەک ئەمانەت وایە ناهێڵین هیچ کەموکۆڕییەکی هەبێت".

بەڕێوەبەری سایلۆی هەولێر لەبارەی پەیوەندییان لەگەڵ وەزارەتی بازرگانیی عێراق ڕای گەیاند: "کارمەندانی وەزارەتی بازرگانیی عێراق هەفتانە دێن و سەردانی سایلۆی هەولێر دەکەن و پشکنینی شێوازی وەرگرتنەکە و چاودێریی پرۆسەکە دەکەن و هەتا ئێستا هیچ سەرنجێکیان نەبووە و پرۆسەکە هەتا ئێستا بێ کەموکۆڕی دەڕوات و توانیومانە میکانیزمێکی زۆر گونجاو و سەرکەوتوو بگرینە بەر و بە هاوکاریی لێژنەی باڵای بە بازاڕکردنی گەنم لە پارێزگای هەولێر ئەو پلانەی کە دامانڕشتووە، بە شێوەی سەرکەوتوانە جێبەجێی بکەین".

هێمن موراد لە کۆتاییدا ئاماژەی بەوەش کرد: "ئەو بڕە ١١٠ هەزار تۆنەی کەلە جووتایران وەردەگیرێت، زۆر کەمترە لەو بڕرەی کە لەلایەن جووتیارانی هەولێرەوە بەرهەم هاتووە و جووتایران زۆر نیگەرانن بەو بڕە کەمە و دەتوانین بڵێین ئەوە غەدرێکی ئاشکرایە لە جووتایرانی هەرێمی کوردستان و بەتایبەتی سنووری پارێزگای هەولێر دەکرێت، ئەو ڕێژەش بۆ هەر جووتیار کە دیاری کراوە، بە هەماهەنگی لەگەڵ کشتوکاڵی هەولێر بووە و بەپێی ئەو هەماهەنگییەی کە کراوە ١٤٪ی گەنمی بەرهمهاتووی لێ وەردەگیرێت، بەدڵنیاییەوە ئەو بڕە زۆر کەمە، بەڵام ئێمەش لە چوارچێوەی ئەو بڕیارەی حکوومەتی عێراقدا دەجووڵێینەوە کە دەسەڵاتی بە ئێمە داوە کە وەری بگرێن"