بەهۆی پڕبوونی بەشێک لە نەخۆشخانەکانی کۆرۆنا، ژمارەیەکی زۆر نەخۆش لەماڵەوە چارەسەر وەردەگرن، بەڵام بەهۆی مەترسی لەسەر ژیانیان بەشێک لەو پزیشک و پەرستارانەی لە کەرتی تایبەتن بە بڕە پارەیەکی زۆر چارەسەری تووشبووانی کۆرۆنا دەکەن، گوتەبێژی وەزارەتی تەندروستیش دەڵێ کارێکی نایاساییە و هەر کەسێک ئەمە بکات، و سزا دەدرێت.
د. محەمەد قادر، گوتەبێژی وەزارەتی تەندروستی حکوومەتی هەرێمی کوردستان، بە (باسنیوز) ی ڕاگەیاند: "تا ئێستا وەکو وەزارەتی تەندروستی بابەتی کەرەنتینەکردنی ماڵەوە نەکەوتۆتە باری جێبەجێ کردنەوە و هەموو نەخۆشەکان دەبێت لە ژێر چاودێری پزیشکی دابن لەلایەن ئەو شوێن و کارمەندانەی لەلایەن وەزارەتی تەندروستییەوە دیاری کراوە".
ڕاشیگەیاند: "چارەسەرکردنی هەر حاڵەتێک بەبێ ئاگاداری وەزارەتی تەندروستی، نایاساییە و رێگەپێدراو نیە، هەر کەسێکیش ئەم کارە بکات، رووبەرووی یاسا دەکرێتەوە و سزا دەدرێت".