دیرۆكی هەزاران ساڵەی نەتەوەی كورد، لەسەر ئاستی كوردستانی مەزن، تژیە لە كارەسات و ئاشووب و مەرگەسات و جینۆساید و شۆڕش و راپەڕین و ئاوارەیی و سەركوتكردن و وێرانكردنی خاك و نیشتمانەكەی، پڕ لە رووبەرووبوونەوەی ستەم و رێگری و لەمپەر و قەدەغەكردنی زمان و كولتوورەكەی لەلایەن داگیركەران و دوژمنانیەوە، مەخابن خیانەت و ناپاك و خەنجەر لەیەكدان و شەڕی ناوخۆ و براكوژییش، هەمیشە هەبوون، جیا لەوەی هەمیشە خاك و نیشتمانی كوردان، بە دوژمن و هێزی دڕندە و داگیركەر دەورە دراوە. لێ هەمیشە هەواڵی خۆش ئەوەیە كە كورد ماوەتەوە، كورد له هونهری خۆراگری و دان بهخۆداگرتن و بهرگریكردن و مانهوهی زمان و كولتوور گێڕانەوەی بەشێك لە مێژووی دزراویدا، شارەزایی و ئەزموونی گرنگی پەیدا گردووە. بۆیە هەر هەوڵێك بۆ تواندنەوەی كورد و نەهێشتنی، چ بەدرێژایی مێژوو و چ ئەو بانگەشە و دەنگە نەشازانەی ئێستا كە باسی نەهێشتنی قەوارەی هەرێمی كوردستان دەكەن، رەنگە بۆ ماوەیەك زیانیان لە كاروانی ئازادیخوازانەی كورد دابێت، بەڵام خۆشبەختانە هەوڵەكان شكستیان هێناوە كورد هەر ماوە.
وهك دهگوترێت تهنیا كهس و لایەنە بههێزهكان ناتوانن بمێننهوه، ئهوانهشی كه زرنگ و شارەزان لە هونەری مانەوەدا، دەمێننەوە، خۆ گەلانێك هەبوون زۆر بەدهسهڵاتیش بوون، بەڵام ئێستا یان نەماون یان هێزێكی ئەوتۆ نین لە جیهاندا، ئیمپراتۆریەت و لەشكركێشییە زۆر فراوان و گەورەكانی جەنگیزخان و تەیمووری لەنگ و مەغۆل كە گەیشتنە ئەم ناوچەیەی ئێمەش هێندە بەهێز بوون، كەچی ئێستا تەنیا وڵاتێكی بچووكی وەكوو مەنگۆلیایان لێ ماوەتەوە، هونەری مانەوە و خۆ گونجاندن كاری ئەو میللەتانەیە كە ئەزموون فێری هەرمانیان دەكات.
رەنگە بۆ ژیانی ئێستای هەر گەلێكی دونیا، تەنیا مانەوە گرنگ نەبێت، بەڵكوو خۆسەلماندن لەسەر ئاستی كۆمەڵگەی مرۆڤایەتی لە هەر رووێیكەوە، ئەویش گرنگە، بەڵام بۆ كورد ئەگەر مێژووی بخوێنینەوە و سەرنج لە دۆخی تا ئێستای بدەین، گرنگە بڕوامان بە خۆمان هەبێت و بە خۆمان سەرسام بین كە چۆن سەرەڕای ئەو هەموو ستەمەی لە كورد دەكرێت، ئەم نەتەوەیە هەر ماوەتەوە.
ئێستاش سهرهڕای ئهو ههموو بهربهستانەی دیێنە پێشی، كورد ههر له ههوڵی خۆگونجان و هەرمانەوەدایە. له خهمی ئهوهدایه كه بهكهمترین زیان لەم زوڵم و دەستدریژییانە رزگاری بێت، دڵنیاشم كە سەر دەكەوێت، چونكە كورد وەك داربهڕوو قایمە و رەگی خۆی لهسهر خاك و زێدی خۆی داچهقاندووه، كورد دهستبهرداری نیشتمانێك نابێت كه رووبارێك خوێنی بۆ رشتووە، ئەوانەی خیانەت لە نەوەی خۆیان و خاكی كوردستان دەكەن، نازانم مێژوویان خوێندووەتەوە یان نا! بەڵام دەزانم دواجار شەرمەزاری و شكستیان بۆ دەمێنێتەوە.
گهر زۆر دوور نهڕۆین، تهنیا پهنجا ساڵی رابردووی مێژووی ئەم بەشەی كوردستان وهربگرین وهك نموونه، ئهو نهوانەی لەم پەنجا ساڵەدا ژیاون، بزانە چییان نەدیوە؟! بزانە بە چەند رووداو و مەرگەساتدا تێپەڕیون، هەموومان تەعریب و ئەنفال و جینۆساید و كیمیاباران و كۆڕەوی ملیۆنی و تەنانەت شەڕی براكوژیشمان لە یادە، جینۆسایدی شنگال و شەڕی داعشمان لەبیرە، خیانەتی گەورەی 16ی ئۆكتۆبەری 2017مان بینی و تیای ژیاین، هێرشی حەشدی شەعبیمان لەبیرە، چەندین جار گەمارۆی ئابووری و بودجە و مووچە لێبڕینمان بینی، تا ئێستاش لە هەندێ لەم كارەساتانەدا دەژین، ئەی ئێمە چۆن ماینەوە؟ ئەوەی كوردە و خیانەت لەم نەتەوەیە و لە كوردستان دەكات، گرنگە ئەو پرسیارە لە خۆی بكات.
بێگومان ئهم ههموو نههامهتی و كارهساتانه كه بهسهر ئهم بەشەی كوردستاندا هاتوون، وا بهسانایی و ئاسانی تێنهپڕیون، سەدان هەزار ڕۆڵهی كورد و خێزانی كورد شەهید بوون و بوونهته قوربانیی ئهو ستەم و زۆرهی بهرامبهر به كورد كراوه، وهلێ سهرباری ههموو ئهوانهش دواجار كورد ههر بهردهوامه له خۆپارێزی و داكۆكی له مافهكانی و ههر دهمێنێت، دۆزی نەتەوەیەكی چل پەنجا ملیۆنی، بە هەڕەشە و بۆردومان و مانۆڕ و هێرشی سەربازی و خیانەت و خاكفرۆشی و بودجە بڕین كۆتایی نایە، ئێستا خوانەكردە ئەگەر هەر چل پەنجا ملیۆن كوردەكەی جیهان ئاوارە بن و پەنا بۆ چیاكان بەرن، دیسان كۆتایی بە دۆزی رەوای ئەم نەتەوەیە و ئازادیخوازییەكەی نایە.
دەبینین، ئێستا توركیا و ئێران لەشكركێشی و بۆردومانی كوردستان دەكەن، حكوومەتی بەغدا به نهفهسێكی پڕ كینە و ئیرادە سەپاندن مامهڵه لهگهڵ ههرێمی كوردستاندا دهكات، زوڵم و ناحەقی و دەستدرێژی بەردەوامە، ناپاكیی هەندێك كورد لە دژی باشووری كوردستان هەر بەردەوامە، بەڵام ئەمە ئەوپەڕی كورتبینی و خەیاڵپڵاویە كە پێیان وابێ بەم كارانە، كۆتایی بە دۆزی رەوای كورد و بوونی ئەم نەتەوەیە دێت، ژیان و ئەزموونە تاڵەكان، كارەساتەكان، ئازارەكان، شۆڕش و بەرخۆدان و قوربانیدانە مەزنەكان، فێری ئەوەیان كردین، كە چۆن بمێنینەوە، نەوەی ئێستای باشووری كوردستان تەنانەت زمانی عەرەبییش نازانن و لە خەمی ئەوەشدا نیین فێری بن، ئەمە چاكە یان خراپ من رای تایبەتم لەسەری هەیە، بەڵام داگیركەران پێیان خۆش بێت یان نا، ئیدی نەوەی داهاتوو تەسلیمی كولتوور و زمانی داگیركەر نابێت و بەئاسانی خۆی ناكاتەوە بە بەشێك لە جوگرافیای عەرەبیی عێراق، كورد و كوردستان هەر دەمێنن، لێ ئەوانەی جنێوی پێدەدەن و خیانەتی لێدەكەن و دەیانەوێ پێگەی لاواز بەن، ئەوان نامێنن.