گوتەبێژی نەخۆشخانەی لەدایكبوون و منداڵان لە سۆران، ڕەتی دەكاتەوە كە دوای تووشبوونی چەند پزیشكێكی نەخۆشخانەكەیان بە پەتای كۆرۆنا، نەخۆشخانەكەیان داخرابێت.
رێزان باڵەك، گوتەبێژی نەخۆشخانەی لەدایكبوون و منداڵان لە سۆران، بە (باسنیوز)ی راگەیاند: "دوای ئەوەی لەم دوو ڕۆژەدا پشكنینمان بۆ پزیشك و كارمەندانی نەخۆشخانەكەمان کرد، بەداخەوە ئەنجامی پشكنینەكانی سێ لە پزیشكانمان پۆزەتیڤ دەرچوون، بۆیە بە ڕشاندنی نەخۆشخانەكەمان بە دەرمانی دژە ڤایرۆس لەلایەن بنكەی بەرگری شارستانی سۆران، هەروەها چاودێریی زیاتری پزیشك و كارمەندانمان و ئەوانەی سەردانی نەخۆشخانە دەكەن، بە گرتنەبەری رێنماییە تەندروستییەكان، رێكاری توندترمان گرتووەتە بەر".
گوتەبێژی نەخۆشخانەی لەدایكبوون و منداڵان لە سۆران ئەوە دەنگۆیانەشی ڕەت كردەوە كە گوایە بەهۆی تۆماركردنی ئەم چەند تووشبووەی كۆرۆنا نەخۆشخانەكەیان كەرەنتی كرابێت و گوتی: "بە گرتنەبەری رێكارە خۆپارێزییەكان رۆژانە نەخۆش بەپێی پێویست بەڕێ دەكەین".