ڤیدیۆ... پزیشكێكی كورد هۆكاری توندبوونی كۆرۆنا لە هەرێمی كوردستان ئاشكرا دەكات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ڤیدیۆ... پزیشكێكی كورد هۆكاری توندبوونی كۆرۆنا لە هەرێمی كوردستان ئاشكرا دەكات

هادی شوانی لە بێرمینگهامەوە زانیاریی گرنگ دەخاتەڕوو


پزیشكێكی كوردی خاوەن دكتۆرا لە مایكرۆبایۆلۆجی، لە بەریتانیاوە تۆمارێكی ڤیدیۆیی پڕ لە زانیاریی گرنگی لەسەر مەترسییەكانی ئەم شەپۆڵەی ئێستای كۆرۆنا لە هەرێمی كوردستان بڵاو كردەوە، تیایدا بە وردی باسی ئەوە دەكات كە لە كوردستان ڕوودەدات.


د.هادی حسێن شوانی پزیشكی كورد لە شاری بێرمینگهامی بەریتانیا و هەڵگری بڕوانامەی دكتۆرا لە مایكرۆبایۆلۆجی و مۆلیكیولەجەنەتیك، هۆیەكانی شەپۆڵی نوێی پەتای ڤایرۆسی كۆرۆنا لە هەرێمی كوردستان ئاشكرا دەكات و دەشڵێ هەموو كەس تووشی پەتاكە دەبن، بەڵام دەبێ وا بكەین كە بە سووكی تووشی بن و مەترسییەكانی كەم بكەنەوە.


پزیشكە كوردەكە دەڵێ كێشەی گەورەی پەتای كۆرۆنا ئەوەیە لە هەموو جیهاندا تێكەڵی سیاسەت كراوە، ئەمەش وای كردووە توێژینەوە زانستییەكانیش ناكۆكیان تێبكەوێت و شێوەی ڤایرۆسەكە وەكو خۆی ئاشكرا نەبێت.


هەروەها باسی ئەوە دەكات كە بۆچی پەتایەكە لە كۆمەڵگەكانی ئەورووپا كۆنترۆڵ كرا و لە كوردستان نەكرا، بە پێچەوانەوە لە هەرێمی كوردستاندا تازە پەرە دەستێنێ و مەترسیی گەورەشی لەگەڵ خۆیدا هێناوە.


شوانی لە بەشێكی تۆمارە ڤیدیۆییەكەیدا دەڵێ ئەگەر چینییەكان وەكو هاووڵاتییانی هەرێمی كوردستان هەڵسوكەوتیان كردبا، ئەوا چین كەسی تێدا نەدەما و هەموویان لەناودەچوون.


ئەو پزیشكە كە بڕوانامەكەی تایبەتە بە ڤایرۆسی و مایكرۆبایۆلۆجی ئاماژە بەوەش دەكات داخۆ ئەوەی ئێستا لە كوردستان ڕوودەدات بۆچی زۆر مەترسیدارە؟ ئایا شەپۆڵی دووەمی ڤایرۆسەكەیە یان هی یەكەمە؟


هەروەها دەشڵێ مەرج نییە ئەوانەی ئەنجامی پشكنینیان نێگەتیڤ دەردەچێ، هەڵگری پەتایەكە نەبن، بە پێچەوانەوە ئەگەری زۆرە خەڵكێكی زۆری هەرێمی كوردستان ئێستا هەڵگری پەتایەكە بن، بەبێ ئەوەی بەخۆیان بزانن.


د.هادی شوانی وەڵامی ئەم پرسیارەش دەداتەوە كە ئێستا لە مانگی شەشدا دەژین، بۆچی لەبری كەمبوونەوە و لەناوچوونی ڤایرۆسەكە، ئێستا توندتر بڵاودەبێتەوە و مەترسیدارتر بووە؟