لە سنووری پارێزگای كەركووك جارێكیتر ئاگر لە دەغڵودانی جووتیارانی كورد بەر درا.
سالار موحسین، جووتیارێكی گوندی (ساری تەپە)ی كوردنشینی سەر بە ناحیەی لەیلانە لە سنووری پارێزگای كەركووك، بە (باسنیوز)ی ڕاگەیاند: "ئێوارەی دوێنێ پێنجشەممە 4/6/2020 ئاگر لە دەغڵودانی جووتیارانی سنووری گوندی (ساری تەپە) سەر بە ناحیەی لەیلان بەر درا و بەو هۆیەوە چەندین دۆنم دەغڵودانی جووتیاران سووتا".
گوتیشی: "تیمەكانی ئاگركوژێنەوە بە هانای جووتیارانەوە نەهاتن بۆ ئەوەی ئاگرەكە بكوژێننەوە، بەڵام جووتیاران خۆیان بە ئاو و چەند كەرەستەیەكی دیكە ئاگرەكەیان كوژاندەوە".
هاوكات ئەو جووتیارە، ئاماژەی بۆ ئەوەش كرد، تا ئێستا ڕوون نەبووەتەوە كە چ لایەنێك ئاگری لە دەخڵدانی سنووری گوندەكەیان تێ بەر داوە".
ماوەیە لە سنووری پارێزگای كەركووك و ناوچە كوردستانییەكانیتر، لەلایەن داعش و عەرەبە هاوردەكانەوە ئاگر لە دەغڵودانی جووتیارانی كورد بەر دەدرێت و بەو هۆیەوە جووتیاران زیانی گەورەیان پێ گەیشتووە".