تۆمەتەكانی سەدان سەربازی بەریتانیی تۆمەتبار بە تاوانی جەنگ لە عێراق پووچەڵ كرانەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

تۆمەتەكانی سەدان سەربازی بەریتانیی تۆمەتبار بە تاوانی جەنگ لە عێراق پووچەڵ كرانەوە


ئەمڕۆ سێشەممە لێكۆڵەرەوەیەكی سەربەخۆی بەریتانیا رایگەیاند سەدان سەربازی بەریتانی كە تۆمەتبار بوون بە تاوانی جەنگ لە عێراق لە نێوان ساڵانی 2003 و 2009دا، تەواوی تۆمەتەكانیان لەسەر هەڵگیرا و بێتاوان دەرچوون، تەنها یەكێكیان نەبێت.


ئەندرۆ كایلی لێكۆڵەری سەربەخۆی بەریتانی و بەڕێوەبەری دەستەی سكاڵا سەربازییەكان بە تۆڕی هەواڵی (بی بی سی) راگەیاند چاو لەو سەدان تۆمەتە دەكات كە ئاراستەی سەربازەكانی بەریتانیا كراوە بە تۆمەتی تاوانی جەنگ، كە هەموو تۆمەتەكان لە قۆناغی یەكەمدا پووچەڵ كراونەتەوە، تەنها تۆمەتی سەر یەك سەرباز نەبێت.


كایلی رایگەیاندووە كە ئەگەری زۆرە نەتوانن هیچ یەكێك لە سەربازە تۆمەتبارەكانی بەریتانیا وەكو تۆمەتبار ببەنە بەردەم دادگا.


هەروەها گوتوویەتی زۆرینەی دۆسیەكان لە قۆناغی یەكەمی لێكۆڵینەوەدا، پووچەڵ كراونەتەوە، ئەمەش بە هۆی ئەوەی تۆمەتەكان بە گوتەی ئەوان لە ئاستێكی زۆر نزمدا بوون.


لێكۆڵەرەوەكە رایگەیاند كە تۆمەتەكانی سەر یەك سەرباز ماوەتەوە، بەڵام هیچ وردەكارییەكی لەبارەوە ئاشكرا نەكرد.


جێی باسە هێزەكانی سوپای بەریتانیا لە پاڵ هاوپەیماناندا لە 2003دا لە باشووری عێراق نیشتەجێ بوون و زیاتر لە 400 هاووڵاتی عێراقی سكاڵایان لەسەر سەدان سەرباز كردووە كە دەستدرێژی سێكسییان كردووەتە سەر هاووڵاتییانی عێراق، لەگەڵ ئەشكەنجەدان و كوشتنی ساختە و تاوانی تر.