پاش تێپەڕبوونی پازدە ڕۆژ بەسەر خنکانی گەنجێکی کوردی خەڵکی چەمچەماڵ، لە دوورگەی خیوسی یۆنان، تەرمەکەی گەڕێندرایەوە ھەرێمی کوردستان.
ئاری جەلال، سەرۆکی دەزگای لووتکە بۆ کاروباری ئاوارە و پەنابەران، بە (باسنیوز)ی ڕاگەیاند "پاش تێپەڕبوونی ١٥ ڕۆژ بەسەر خنکانیدا، بە ھاوکاریی دەزگای لووتکە بۆ کاروباری ئاوارە و پەنابەران، تەرمی گەنجێکی دانیشتووی قەزای چەمچەماڵ لەڕێگەی فڕۆکەخانەی نێودەوڵەتیی ھەولێرەوە گەڕێندرایەوە ھەرێمی کوردستان و لە گۆڕستانی سەیوانی شاری سلێمانی بە خاک سپێردرا".
گوتیشی "گەنجەکە ناوی (ڕاڤیار عوسمان) ەو تەمەنی ٢٠ ساڵە و خەڵکی شارۆچکەی چەمچەماڵە و وەک پەنابەرێک لە دورگەی خیۆسی وڵاتی یۆنان ژیاوە و ڕۆژی ١٠/٥/٢٠٢٠ بەمەبەستی گەشتکردن ڕوو لە دەرەوەی کەمپەکە دەکات و لە کاتی مەلەکردندا و بە گوتەی پزیشکی داد دەماری قاچی وەستاوە و بەوھۆیەوە خنکاوە".
ڕوونیشی کردەوە: "لەسەر داوای کەسوکارەکەی، دەزگای لووتکە لە یۆنان حیجزی خستەر تەرمی ئەو پەنابەرە و ڕێگەی نەدا تەرمەکەی لەو وڵاتە بە خاک بسپێردرێت، بەھۆی دۆخی ڤایرۆسی کۆرۆنا و کەرەنتینەکردن لەو وڵاتە و وەستانی گەشتە ئاسمانییەکان ، تەرمی ناوبراو نەتوانرا لەکاتی ئاساییدا بگەڕێتەوە ھەرێمی کوردستان".