كەركووك تەسلیم دەكەن و داعش ئازاد دەكەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كەركووك تەسلیم دەكەن و داعش ئازاد دەكەن


ئەگەر بۆ خەڵك ئەوە كارێكی نائاسایی و سەیر بێت كە گرووپێكی ناو یەكێتی، كۆمەڵێك لە بەرپرسانی گەورەی داعش و تێوەگلاوانی كردەوەی تیرۆریستی تەسلیم بە كەسوكار و دۆست و ئەحبابی خۆیان بكەنەوە، بەڵام لای من ھەر زۆر ئاساییە ئەوان ئەو كارە بكەن... بۆچی؟

1- لای من، خاك بە مانای نیشتمان، موقەدەسە چونكە كە نیشتمانت نەبوو، سەرگەردان و بێ ناسنامەش دەبیت. تۆ بیھێنە پێش چاوی خۆت كەسێك پرسیارت لێ بكات خەڵكی كوێیت؟ بەڵام نیشتیمانت نەبێت چی وەڵام دەدەیتەوە؟ بۆیە ئەوەی دەربەستی خاك بە مانای نیشتمان نەھات، گوێ بە ھیچ شتێكی تر نادات، كە دەڵێم ھیچ شتێك یەعنی ھیچ شتێك!

2- بەقەدەر ئەوەی من سەرم لە مێژووی نەتەوە و شۆڕشەكانی كوردستان دەردەچێت، شۆڕشێكی بە قەبارەی شۆڕشی ئەیلوول لەسەر كەركووك و لەبەر كەركووك و لەپێناوی كەركووكدا دانرا، ئەگینا ئەگەر نەك بە تەسلیمكردنی ھەموو كەركووك، بگرە ئەگەر سەركردایەتیی شۆڕشی ئەیلوول لە ساڵی 1970 بە ئیدارەدانی ھاوبەش و دەستھەڵگرتن لە بەشێكی كەركووك لەگەڵ حكوومەتی ئەوكاتی عێراق ڕازی بوایە، نە رێككەوتننامەی شوومی جەزائیر بۆ لێدانی كورد دەكرا و نە كارەسات دروست دەبوو و نە شۆڕش بەو گەورەییە هەڵدەگیرسایەوە، ئێ تەبعەن كە ئەمانەش ڕوویان نەدایە ئەو كاتە شتێكیش نەدەبوو بە ناوی یەكێتیی نیشتیمانیی كوردستان و كە یەكێتیی نیشتیمانیی كوردستانیش دروست نەبوایە دیسان تەبعەن ھیچ گرووپێك نەدەبوو بەناوی (گرووپی خیانەتكارانی 16ی ئۆكتۆبەر) لەناو یەكێتیدا!

3- بەڵام كاتێك شۆڕشی ئەیلوول لەپێناوی كەركووكدا تووشی ئەو كارەساتە گەورەیە دەبێت و كارەساتەكەش قبووڵ دەكات، بەڵام چۆكی بۆ دانادات و واز ناھێنێت و دەیگەیەنێتە ڕیفراندۆم بۆ سەربەخۆیی كوردستان و زۆرمان نامێنێت بۆ ئەوەی بگەینە سەر لوتكەی چیا، كەچی لەپڕ بە خیانەتێكی گەورە نیوەی باشووری كوردستان بە كەركووكیشەوە تەسلیم بە داگیركەرانی كوردستان دەكرێتەوە و ئەسڵەن كەرامەتی بەشێك لە پێشمەرگەكانی خۆیشیان دەشكێنن، ئیتر بۆچی بەلامەوە ئاسایی نەبێت كە ھەواڵی تەسلیمكردنەوەی كۆمەڵێك لە بەرپرسانی گەورەی داعش لەلایەن ھەمان گرووپی خیانەتكارانی 16ی ئۆكتۆبەری ساڵی 2017 بە كەسوكار و دۆست و ئەحبابی خۆیان ببیستم؟! ئەی خۆ لە سەرەتای ئەم وتارەدا بە گاڵتە نەمنووسیوە ئەوەی دەربەستی خاك بە مانای نیشتمان نەھات، گوێ بە ھیچ شتێكی تر نادات، كە دەڵێم ھیچ شتێك یەعنی ھیچ شتێك بە ئازادكردنی داعشیشەوە!