سەرەتاى مانگى داهاتوو دەست دەکرێت بە وەرگرتنى گەنمى جووتیاران لە سنوورى هەولێر، بەڕێوەبەرى سایلۆى هەولێریش دەڵێ ئامادەکارى تەواومان کردووە بۆ ئەوەى بە کەمترین کات گەنمى جووتیاران وەربگرین و زۆر چاوەڕێ نەکەن.
هێمن سەید موراد، بەڕێوەبەرى سایلۆى هەولێر بەوەکالەت بە(باسنیوز)ى راگەیاند: " بەپێى ئەو پلانەى لێژنەى باڵاى بەبازاڕکردنى گەنم لە پارێزگاى هەولێر دایڕشتووە، لە 1/6/2020 پڕۆسەى وەرگرتنى گەنمى جووتیاران لە سنورى پارێزگاى هەولێر دەستپێدەکات، وەرگرتنى گەنمەکەش بەپێى کاتى دروێنەکردنى دەبێت و ئەو ناوچانەى زووتر گەنمەکانیان دروێنە دەکەن، زوتر لێیان وەردەگیرێت".
راشیگەیاند: "بە هەماهەنگى لەگەڵ بەڕێوەبەرایەتى کشتوکاڵى هەولێر، خشتەیەکمان ئامادەکردووە و ناوچەکانمان دەستنیشانکردووە بۆئەوەى قەرەباڵخى دروست نەبێت و هەرناوچەیەک کاتى وەرگرتنى بەرهەمەکەى دیاربێت، بۆنموونە یەکەم شوێن کە گەنمى لێوەردەگیرێت ناحیەى قوشتەپەیە لە سنورى پارێزگاى هەولێر".
ئەوەشى خستەڕوو" دڵنایى دەدەینە جووتیاران ئەگەر هیچ گرفتێک دروست نەبێت و پێداویستییەکانى سایلۆمان بۆ دابین بکەن،ناهێڵین جووتیاران دووچارى زەحمەتى ببن لەکاتى پڕۆسەى وەگرتنى گەنمەکانیان و راستەوخۆ بارهەڵگرەکانیان بۆ خاڵى دەکەین، پێچەوانەى ئەوەى لەساڵانى رابردوو چەند رۆژێک کرێى بارهەڵگرەکانیان لەسەر هەژمار دەکرا".