کوڕە کوردێک چیرۆكی دانانی ئاڵای كوردستان لەسەر پەیكەری سەید ڕەزای دەرسیم دەگێڕێتەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

کوڕە کوردێک چیرۆكی دانانی ئاڵای كوردستان لەسەر پەیكەری سەید ڕەزای دەرسیم دەگێڕێتەوە

جێم ڤازۆ: توركیا دەیەوێ ناسنامەی کوردبوونی شاری دەرسیم بگۆڕێت

جێم ڤازۆ، ئەو كوڕە گەنجە كوردەی باكووری كوردستان، كە لە ساڵیادی كۆمەڵكوژییەكەی پارێزگای دەرسیمی باكووری كوردستان، ئاڵای كوردستانی لە دەوری پەیكەری سەید ڕەزای دەرسیم ئاڵاند، چیرۆكەكەی بۆ (باسنیوز) دەگێڕێتەوە.

جێم ڤازۆ، تەمەنی ٤٠ ساڵە و خەڵكی ناوچەی خوزاتی دەرسیمە، بەڵام لە ئەدەنا لەدایك بووە. لەگەڵ كۆمەڵێك هونەرمەندی كورد لە دێرسیم، وەك ڕاوێژكاری کولتووری و هونەری كوردی تایبەت بە دەرسیم كار دەكات.

 ئەو گەنجە كوردەی باكووری كوردستان، لە ڕۆژی ٤ی ئەم مانگە، كە یادی ٨٣یەمین ساڵڕۆژی كۆمەڵكوژیی شاری دەرسیمی باكووری كوردستان بوو، بڕیاری دا وەك هەڵوێستێك بۆ خۆڕاگریی و ڕەتكردنەوەی ئەو زوڵمەی لە خەڵكی دەرسیم كراوە، لەبەرچاوی هەموو خەڵك، ئاڵای كوردستانی لە پەیکەری سەید ڕەزای دەرسیم ئاڵاند و لە چەند خولەكێكدا ئەو گوتارانەی دووبارە گوتنەوە، كە كاتێك سەید ڕەزا دەرسیم پێش ئەوەی لەسێدارەی بدەن، گوتبوونی.

جێم ڤازۆ، سەرەتا باسی لەوە كرد، كە بۆچی ئەم كارەی كردووە و چ شتێك بووەتە هۆكاری بۆ ئەم هەڵوێستەی، "چەند ڕۆژێك بەرلە هاتنی ساڵڕۆژی كۆمەڵكوژیی شاری دەرسیم، كە ساڵانە یادی دەكەینەوە، كوڕە گەنجێكی پەنابەری سووری تەمەن ١٧ ساڵان، لەو شارەدا بە دەستی پۆلیسێكی تورك كوژرا، دوای بڵاوبوونەوەی هەواڵەكە و لێكۆڵینەوە لە هۆكاری كوشتنەكە، كاتێك پرسیاری ئەوەی لێ دەكەن، كە ئاخۆ بۆچی ئەم گەنجەت كوشتووە و بۆچی گوللەكەت لە دڵی داوە؟ پۆلیسەكە لە وەڵامدا دەڵێت، وامزانی كوردە، بۆیە كوشتم".

جێم دەڵێت: "ئەو هەواڵە منی تاساند و زۆر كاری تێكردم، بۆچی كورد بكوژرێت؟ بۆیەش بڕیام دا لە ساڵڕۆژی كۆمەڵكوژییەكەی دەرسیمدا بە ئاڵای پیرۆزی كوردستانەوە هەستی خۆم دەربڕم و دەروونم ئارام بكەمەوە".

ڤازۆ بەردەوام بوو لەسەر گێڕانەوەی چیرۆكەكەی و گوتی: "بە هاوكاریی ڕۆژنامەنووسێكی هاوڕێم، كە لە كاتی ئەنجامدانی چالاكییەكە وێنەی گرتم،  كارەكەم زۆر بەپەلە ئەنجام دا و ئاڵای كوردستانم لە پەیكەری سەید ڕەزا دەرسیم ئاڵاند و هاوارم كرد، ئیتر كوشتنی كوردان بەسە".

هاوکات گوتی: "ئەو كۆمەڵکوژییە لەسەر ناسنامەی كوردبوونە، وەك هەڵەبجە و بارزان و ئاگری و شوێنەكانی تری كوردستان. وەك چۆن سەید ڕەزا دەرسیمی لە كاتی لەسێدارەدانیدا خۆی چووە بن پەتی سێدارە و خۆی پەتەكەی خستە ملی و نەترسا و چۆكی نەلەرزی، قسەی دوایی خۆی كرد و خۆیشی كورسیی ژێر پێیەكانی لابرد و كۆتایی بە ژیانی خۆی هێنا، ئەوەش بووەتە جەسارەتێك و هێزێكی بەمن بەخشیوە، بۆیە گوتم باشە بۆچی من بترسێم؟".

جێم ڤازۆ دەڵێت: "ماوەیەكی زۆرە توركیا كار لەسەر ئەوە دەكات، كە ناسنامەی شاری دەرسیم بكاتە شارێكی تورك و شوناسی شارەكە بگۆڕێت، بۆیە لەو ڕۆژەدا ویستم ئەو پەیامە بگەیەنم و بڵێم دەرسیم كوردستانە".

دەشڵێت: "پێویستە هەموو كەسێك ئەوە بزانێت، ئەوە هەڵوێستی خۆمە و هیچ كەسێك و حزبێك لە پاڵ چالاكییەكانی منەوە نییە، چەندین جار چالاكیی جۆراوجۆرم کردووە، كاتێك لە ساڵی ٢٠٠٨ عەبدوڵا گوڵ، كە ئەوكات سەركۆمار بوو هاتە دەرسیم، لە بەرامبەریدا چالاكیم کرد و پێم گوت، هەژاریی قەدەری ئێمە نییە، بۆچی وامان لێ دەكەن؟"

باسی لەوەش كرد: "هەر ئەو ڕۆژەی چالاكییەكەم ئەنجام دا، كاتێك گەڕامەوە شوێنی حەوانەوەم، كە شوێنێكی تایبەتە و لەلایەن حكوومەتەوە دابین كراوە و شارەوانی بەڕێوەی دەبات و بە پارەیەكی كەمتر خەڵك دەتوانێت لەوێ بمێنێتەوە، بینیم هەموو كەلوپەلەكانی منیان خستووەتە بەر دەرگا و پێیان گوتم شوێنمان نەماوە و هەموو جانتا و شتەكانیان تەماشا كردبوو، راستەوخۆ هەستم كرد لەبەر ئەو كارەیە دەرم دەكەن. دواتر بە ناچاری كەلوپەكانم بردن و چوومە هوتێلێك، لەو كاتەشدا پۆلیس چاودێرییان دەكردم و تا بەیانی لە نزیك هوتێلەكەم مانەوە، بۆ ئەوەی فشارێكی دەروونی لەسەر من دروست بكەن، بەڵام تا دوا هەناسەم شانازیی پێوە دەكەم و لەژێر هیچ هەڕەشەیەكیش پەشیمان نابمەوە، ئەگەر بمبەنە كونجی زیندانیشەوە، هەمان هەڵوێستم دەبێت، هیچ كات لە جەوهەری خۆم دوور ناكەومەوە و لەپێناو ئازادی و سەربەخۆیی كورد، ڕێگەی شەهیدانی كوردستان بەر نادەم". 

گوتیشی: "بڵاوبوونەوەی وێنە و ڤیدیۆی چالاكییەكە، دڵی هەزاران كوردی خۆش كرد و دەنگدانەوەیەكی زۆری هەبوو، بۆیە لەلایەکەوە نامەی دەستخۆشی و پیرۆزباییم بۆ دەهات، لەلایەكی تریشەوە نامەی هەڕەشە و كوشتن، بەڵام ئەوەی دڵخۆشی كردم، لە هەموو پارچەكانی كوردستان زۆرترین نامەی دەستخۆشیم بۆ هات، بەتایبەت لە باشوور. ئەو كاتەی نامە و دەستخۆشییەكانم بینین، هیچ هەڕەشەیەكم لەبیر نەما و خەمی لێ ناخۆم و ئەوەش وای كرد دڵنیا بم ئەو كارەی كردم لەجێی خۆی بووە و هەموومان تامەزرۆی ئازادین".

لە كۆتایی قسەكانیدا، جێم ڤازۆ گوتی: "پێم خۆشە لەڕێگەی ئێوەوە، لە دوو شتدا داوای لێبوردن بكەم، یەكەمیان ئەوكاتەی ویستم ئاڵایەكە بخەمە سەر پەیكەرەكە، لەبەر ئەوەی ترسی ئەوەم هەبوو بمگرن و رێگەم نەدەن ئەو كارە بكەم، بۆیە فكرم لەسەر ئەوە نەبوو، كە ئاڵایەكەم بە هەڵە هەڵواسی، چونكە هەندێك كەس تێبینیی ئەوەیان هەبوو، بۆیە پێویستە بزانن هۆكارەكەی ئەوە بووە. دووەمیان، بەهۆی ئەوەی من شێوەزاری سۆرانی نازانم، هەموو ئەو پەیامانەی بە شێوەزاری سۆرانی بۆم هاتبوون، نەمتوانی وەڵامیان بدەمەوە، بەڵام بەڵێن بێت خۆم فێری شێوەزاری سۆرانیش دەكەم. لێرەشەوە بانگەواز دەكەم، تكایە با هەموومان یەك بین و ئێمە میللەتین و با چیتر دوژمن زەفەرمان پێ نەبات". 

لە ساڵی ١٩٣٧ بە بڕیاری مستەفا كەمال ئەتاتورك، كۆمەڵكوژیی دەرسیم ئەنجام درا و تێیدا٧٠ هەزار كوردی عەلەوی كۆمەڵكوژ کراون، لەناویاندا سەید رەزای ڕێبەری شۆڕش و سەرهەڵدانی دەرسیم و هاوڕێكانی لە باکووری کوردستان شەهید کراون.