ل دەشتا مووسڵ پشتی هژمارەكا خێزانێن ئاوارە زڤریەڤە سەر جهێن خوە دەست ب كارێ خوەیێ چاندنێ كریەڤە و دوو سالە ب گشتی گەنمی دچینن، لێ ترس هەیە گەنمێن وان بهێنە سووتن بەریا دوورینێ.
جەلال خەتاری، جوتیارەكێ كوردە ل دەشتا مووسڵ بۆ (باسنیوز) راگەهاند: "ئەو چەند ساڵ بوو ئەم ل ئاوارەیێ و پشتی ئەم زڤریەڤە سەر جهێن خوە مە دەست ب كارێ چاندنێ كر وی دەمێ پێشمەرگە ل دەڤەرێ بوو، بەلێ پشتی حەشدا شەعبی ل دەشتا مووسڵ بەڵاڤبوویی مە چۆ خوشی نەماینە و نوكەژی دەمێ دوورینا گەنمیە و ترسین چەكدارێن داعش و حەشدا شەعبی وەك لایێ كەركووكێ گەنمێ مە بسوزن و دێ زیانێن مەزن گەهنە مە.
سەفا چیچۆ، چالاكڤانەكێ مەسیحیە ل دەشتا مووسڵ بۆ (باسنیوز) راگەهاند: "پشتی خێزانێن مەسیحی ل ناڤ كەمپا زڤریەڤە سەر جهێن خوە ل دەشتا مووسڵ دەست ب كارێ چاندنێ كریەڤە رێژەكا باش ب روبەرەكێ مەزن گەنم چاندیە ل دەشتا مووسڵ".
گوتژی: "پشتی خیانەتا 16 ێ ئوكتوبەرێ هاتنا چەكدارێن حەشدا شەعبی بۆ دەشتا مووسڵ و دەڤەرێن مەسیحیا مەترسیا سوتنا بەرهەمێن وان یێن چاندنێ هەیە و دخوازن كو حەشدا شەعبی ل دەڤەرێن وان دەركەڤن و پێشمەرگە ب زڤرنەڤە دەڤەرێن وان ، ئەگەر گەنمێن وان بهێنە سوتن بەریا دوورینێ دێ زیانێن مەزن بەر ب وان جوتیارێن مەسیحی كەڤن ئەوێن ل دەشتا مووسڵ گەنم چاندی و ئەڤسالە مەترسی هەیە وەك دەڤەرا كەركووك گەنمێن مەسیحیا ژی ل دەشتا مووسڵ بهێنە سوتن ب دەستێ چەكدارێن حەشدا شەعبی".