ئەو تیرۆیستانەی لە كەركووك دەستگیر دەكرێن بە بڕیاری پارێزگاری سەپێندراو هاتوون
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەو تیرۆیستانەی لە كەركووك دەستگیر دەكرێن بە بڕیاری پارێزگاری سەپێندراو هاتوون


چاودێرێكی سیاسی ئاشكرای كرد كە ئەو تیرۆیستانەی لە شاری كەركووك دەستگیر دەكرێن، پێشتر بە بڕیاری پارێزگاری سەپێندراوی شارەكە لە كەركووك نیشتەجێ كراون.


بە پێی زانیارییەكانی (باسنیوز)، ماوەی چەند رۆژێكە لە گەڕەكە جیاجیاكانی شاری كەركووك، هێزە ئاسایشییە عێراقییەكان چەند تیرۆیستێكی داعشیان دەستگیر كردووە كە یەكێكیان ئەمیری داعشە و دەستی هەیە لە رووداوەكەی سپایكەری پارێزگای سەڵاحەدین.


پۆلیسی فیدڕاڵیی عێراقیش ئەمڕۆ هەینی لە بەیاننامەیەكدا ئاشكرای كرد كە دوو تیرۆریستیان لە كەركووك دەستگیر كردووە، كە دەستیان لە كردەوەی تیرۆریستیدا هەیە.


فەرمان ئەحمەد چاودێرسی سیاسی بە (باسنیوز)ی ڕاگەیاند بەشێك لەو چەكدارانەی داعش كە خەڵكی حەویجە و تكریت و مووسڵ و سنووری پارێزگای دیالەن، بە ڕەزامەندی پارێزگاری سەپێندراوی كەركووك بە خۆیان و خێزانەكانیانەوە نیشتەجێی شاری كەركووك بوون، چونكە ئەوەی كە ئێستا لە شوێنەكانی ترەوە بیەوێت لە كەركووك نیشتەجێ بێت، رەزامەندی پارێزگاری دەوێت، ئەویش بۆ تەعریب یەكسەر رەزامەندی دەردەبڕێت لەسەر نیشتەجێكردنی ئەو عەرەبانە.


گوتیشی تیرۆریستێكی زۆری داعش خۆیان خزاندووەتە ناو كەركووكەوە و ئەوان كار بۆ ئەوە دەكەن لە ناوەندی شاری كەركووكیش كردەوەی تیرۆریستی ئەنجام بدەن، وەك چۆن ئێستا لە بەشێك لە ناوچەكانی دەوروبەری كەركووك باڵادەستن.


هەروەها بەشێك لەو تیرۆریستانە بە خێزانەوە لە گەڕەكە كوردنشینەكانی وەكو رەحیم ئاوا و پەنجا عەلی و كوردستان نیشتەجێبوونە، لەمبارەیەوە ئەدهەم جومعە بەرپرسی بزووتنەوەی مافی كورد كە ئەو بزووتنەوەیە دوای خیانەتی 16ی ئۆكتۆبەری 2017 دروست كراوە، بە (باسنیوز)ی ڕاگەیاند بە داخەوە هەندێك لە هاووڵاتییانمان هەیە لەو گەڕەكە كوردیانە خانوو بە كرێ دەداتە عەرەب، ئیتر بیر لەوە ناكەنەوە كە ئەوان دەبنە كێشە بۆ سنووری ئەو گەڕەكانە.


گوتیشی ئەوەتا ئێستا بە بیانووی ئەوانەوە هێزە ئاسایشیە سەپێندراوەكان هەڵدەكوتنە سەر گەڕەكە كوردییەكان.


لە 16ی ئۆكتۆبەری 2017 میلیشیاكانی حەشدی شەعبی كەركووكیان داگیر كرد و لەو كاتەوە جگە لەوەی دۆخی ئاسایشی پارێزگاكە نالەبارە، جموجۆڵی داعشیش دەستی پێكردووەتەوە و هەروەها ئێستا بەبیانووی جۆراوجۆرەوە هێزی زیاتر هێنراون بۆ ناو كەركووك.