كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

نارین فەقێ بە (ژن ژیانە) رۆژی هەشتی مارس پیرۆز دەكات

 

نارین فەقێ، خانمە هونەرمەندی رۆژئاوای کوردستان، نوێترین ڤیدیۆکلیپی خۆی لە رۆژی هەشت مارس بەبۆنەی رۆژی ژنان بڵاودەکاتەوە.

هونەرمەند نارین فەقێ ئەم گۆرانییەی بەناوی "ژن ژیانە" بڵاوکردووەتەوە، وەکو رێزلێنانێک لە خەبات و تێکۆشانی ژنانی کورد، بۆیە لە نێو کلیپەکەیدا چەند خانمە خەباتکارێکی کورد بەشداریان تێدا کردووە، سینەم بەدرخان، یەکێکە لەو ژنانەی بەشداری لەم کلیپەدا کردووە.

لەم بارەوە نارین فەقێ رایگەیاند: "گۆرانی (ژن ژیانە) وەك زۆربەی بەرهەمەكانی دیكەم، گۆرانییەكی نیشتمانییە باس لە خەباتی ئافرەتی كورد دەكات و تیشك دەخاتە سەر ئەو خەباتە، پەیامی من لەو گۆرانییەدا ئەوەیە كە خودی ژن ژیانە، ژنی كورد خاوەن خەباتێكی بێ وچانە لە گشت بوارەكانی ژیاندا و شان بە شانی پیاو رۆڵی خۆی هەبووە، بۆیە پێویستە رێز لە ئافرەتی كورد بگیرێت و بە ئازادی بژیت".

ئەم گۆرانییە لە تێکستی ئەدیب چەلکییە، میلۆدی و کاری دابەشكردنی میوزیک لەلایەن عەلی شاکر ئەنجامدراوە، کاری دەرهێنانی ڤیدیۆکلیپەکەش لەلایەن هەژار دهۆکی لە سوێد جێبەجێکراوە.

نارین فەقێ، لە ساڵی 1980 لە شاری دێرك لە رۆژئاوای كوردستان لە بنەماڵەیەكی هونەری لەدایكبووە و باوك و باپیریشی هونەرمەند بوون، دیوەخانی ماڵباتەكەشیان هەمیشە شوێنی كۆبوونەوەی هونەرمەندە بەنێوبانگە كۆچكردووەكان بووە و كاریگەریی زۆریان لەسەری دروستكردووە. لە ساڵی 1991 وە لە سوێد نیشتەجێیە، خاوەنی بڕوانامەی ماستەری مافناسیی ئەوروپییە، جگە لە كرمانجی بە سۆرانیش گۆرانی گوتووە، خاوەنی چوار ئەلبوومی گۆرانییە.