حكوومەتا هەرێما كوردستانێ ب مەبەستا خۆپارێزی ژ ڤایرۆسێ كۆرۆنا، چەندین بریار بەڵاڤ كرینە بۆ وێ چەندێ قەرەبالغی دروست نەبیت داكۆ چو ڤایرۆس و نەخۆشی بەڵاڤنەبن و بۆ ڤێ مەبەستێ سەرەدانا گرووپێن گەشتیاری بۆ ئاكرێ هاتە راگرتن.
دیدار رەمەزان، رێڤەبەرێ گەشت و گوزارا ئاكرێ بۆ (باسنیوز) راگەهاند: "ل گۆر بریارو رێنمایێن وەزارەتا ساخلەمیێ و ناڤخۆە یا حكوومەتا هەرێما كورستانێ كۆ چەندین بریارو رێنمایی بەڵاڤكرینە ب مەبەستا خوە پارێزی ل ڤایرۆسێ كۆرۆنا كۆ لسەر ئاستێ جیهانێ بەڵاڤبوویە، ل ئاكرێ ژی هەموو ئەو رێنمایی هاتینە بجهكرن بۆ سەلامەتیا هاووڵاتیان و گەشتیاران".
گۆتژی: "ب مەبەستا خوپارێزیێ سەرەدانا گرووپێن گەشتیاری بۆ ئاكرێ هاتە راگرتن ژبەر وان رێنمایێن حكوومەتا هەرێمێ بەڵاڤكری بۆ خوە پاراستنێ و سەلامەتیا گیانێ گەشتیارو هاووڵاتیان تایبەت ئەو گرووپێن ل خوارویا عیراقێ سەرەدانا كوردستانێ دكەن و د هەماندەمدا هەموو چالاكیێن گەشتیاری ژی هاتن راگرتن كۆ بریاربوو ل هەیڤا ئادارێ دا ئەنجامبدەین، تایبەت ڤیستەڤاڵا نەورۆزێ ل ئاكرێ".
ئاشكرا كر: "رێنمایێن تایبەت هاتینە بەڵاڤكرن بۆ خارنگەه و جهێن گوزاری لێژنەیەك بۆ ڤێ مەرەمێ هاتیە پێك ئینان ب شەڤ و رۆژ كاردكەن بۆ ساخلەمیا هاووڵاتی و گەشتیاران. ئەڤ بریارە هەتا هەیڤا نیسانێ دێ بەردەوام بن".