نوێنەری حکوومەتی هەرێمی کوردستان لە بەریتانیا: له‌ په‌رله‌مانی به‌ریتانیا گرووپی دۆستایه‌تیمان هه‌یه
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

نوێنەری حکوومەتی هەرێمی کوردستان لە بەریتانیا: له‌ په‌رله‌مانی به‌ریتانیا گرووپی دۆستایه‌تیمان هه‌یه

"به‌ریتانیا دەخوازێت په‌یوه‌ندییه‌ بازرگانییه‌کانی له‌گه‌ڵ هه‌رێمی کوردستان له‌ گه‌شه‌کردندا بێت"

کاروان جەمال، نوێنەری حکوومەتی هەرێمی کوردستان لە بەریتانیا، کە لەسەر پشکی (یەکێتیی)یە، لە گفتوگۆیەكی تایبەتی (باس)دا قسە لەسەر چەند پرسێکی پێوەست بە نوێنەرایەتییەکەیان دەکات و رای دەگەیەنێت، سە‌رۆک وه‌زیرانی بەریتانیا کوردی خۆش ده‌وێت و هه‌رێمی کوردستان به‌ دوورگه‌یه‌کی ئارامی و دیموکراسی وه‌سف ده‌کات. ئەوەش دەخاتە ڕوو، لە پەرلەمانی بەریتانیا لە هەموو پارتەکان گرووپێکی دۆستایەتی بۆ هەرێمی کوردستان دروست بووە.


سەرەتا باسی لە ئیشوکارەکانی نوێنەرایەتییان لە بەریتانیا کرد و ئاماژەی بەوە دا، کاره‌کانیان له ئاستێکی باشدایه‌ و ئامادەبوونێکی دیبلۆماسیی به‌رچاویان هه‌یه‌ له‌ناو سلکی دیبلۆماسی له‌ به‌ریتانیا، گوتی: "نوێنه‌رایه‌تیی حکوومه‌تی هه‌رێمی کوردستان له‌ به‌ریتانیا، په‌یوه‌ندییه‌کانی له‌سه‌ر ئاست و بواری جیاجیایه‌، له‌سه‌ر ئاستی په‌رله‌مان و ئه‌نجوومە‌نی لۆرده‌کان، نوێنه‌رایه‌تیی به‌رده‌وام و ڕۆژانه‌ی له‌گه‌ڵ ژماره‌یه‌کی زۆر په‌رله‌مانتار و لۆرد هه‌یه‌ و به‌ به‌رده‌وامی پرس و بابه‌ته‌کانی تایبه‌ت به‌ هه‌رێمی کوردستان له‌ په‌رله‌مان باس ده‌کرێت، به‌ ئامانجی به‌ده‌ستهێنانی پشتیوانیی زیاتر بۆ هه‌رێمی کوردستان".


زیاتر گوتیشی: “له‌ په‌رله‌مانی به‌ریتانیاش گرووپی دۆستایه‌تیمان هه‌یه،‌ که‌ پێکهاتووه‌ له‌ په‌رله‌مانتارانی گشت پارته‌کانی په‌رله‌مان بۆ دۆستایه‌تیی هه‌رێمی کوردستان و ساڵانه‌ سه‌ردانی هه‌رێم ده‌که‌ن، به‌ مه‌به‌ستی له‌نزیکه‌وه‌ ئاگاداربوون له‌ ڕه‌وشی سیاسی و ئابووری و پێشکه‌وتنه‌‌کانی هه‌رێمی کوردستان".


ئەوەشی خستە ڕوو،. له‌سه‌ر ئاستی حکوومه‌ت په‌یوه‌ندییان له‌گه‌ڵ وه‌زاره‌تی ده‌ره‌وه‌ی به‌ریتانیا له‌ ئاستێکی زۆر باشدایه‌: "هه‌میشه‌ ده‌یانه‌وێت گوێیان له‌ تێڕوانین و بۆچوونه‌کانی هه‌رێمی کوردستان بێت، له‌مه‌ڕ بابه‌ته‌کانی ناوچه‌که‌ و ڕۆڵی هه‌رێمی کوردستان به‌رز ده‌نرخێنن".


دووپاتیشی کردەوە، نوێنه‌رایه‌تیی حکوومه‌تی هه‌رێمی کوردستان په‌یوه‌ندییه‌کی زۆر باشی له‌گه‌ڵ ناوه‌نده‌کانی هزریدا هه‌یه‌ له‌ به‌ریتانیا، که‌ ڕۆڵ و گرنگیی تایبه‌تی خۆیان هه‌یه‌ له‌ داڕشتنی سیاسه‌ت و وه‌ک ئامرازێکی دروستکردنی بڕیار لێیان ده‌ڕوانرێت.


کاروان جەمال، هاتە سەر ئەوەی، کە سەرۆک وەزیرانی ئێستای بەریتانیا دۆستی کوردە و گوتی: "سه‌رۆک وه‌زیرانی بەریتانیا کوردی خۆش ده‌وێت، که‌ شاره‌داری له‌نده‌ن بوو سه‌ردانی هه‌رێمی کوردستانی کرد، په‌یوه‌ندییه‌کی باشی هه‌یه‌ له‌گه‌ڵ سه‌رکردایه‌تیی سیاسیی هه‌رێمی کوردستان و هه‌رێمی کوردستان به‌ دوورگه‌یه‌کی ئارامی و دیموکراسی وه‌سف ده‌کات، ده‌خوازێت هه‌رێمی کوردستان به‌هێز بێت، بۆ ئه‌وه‌ی بتوانێت ڕۆڵی خۆی له‌ چوارچێوه‌ی عێراقدا بۆ ئاشتی و ئارامی و به‌ره‌و پێشه‌وه‌چوون ببینێت".


بەرپرسی نوێنەرایەتیی حکوومەت لەبارەی ڕه‌وه‌ندی کوردستانی، گوتی: "ڕه‌وه‌ندی کوردستانی له‌ به‌ریتانیا ڕه‌وه‌ندێکی زۆر گه‌وره‌یه‌ و چالاکن و له‌ زۆربه‌ی کایه‌کانی ژیان به‌شدارن، تاڕاده‌یه‌ک توانیویانه‌ کاری لۆبیکردن بکه‌ن، به‌ڵام به‌دڵنیاییه‌وه‌ ئه‌م لۆبیکردنانه‌ پێویستیان به‌ ڕێکخستن و ئاراسته‌کردن هه‌یه‌، که‌ پێویسته‌ زیاتر لۆبی نیشتمانی بن، له ‌نه‌وه‌ی نوێدا زۆر که‌سی به‌هره‌مه‌ندیان تێدا هه‌ڵکه‌وتووە له‌ بواره‌کانی هونه‌ر و وه‌رزش و شێوه‌کاری و زانستی و خه‌ڵاتیان به‌ده‌ست هێناوه‌، کوردانی به‌ریتانی به‌گشتی له‌ بزنس و له‌ سیاسه‌تدا به‌شدارن".


جەختیشی کردەوە، بەریتانیا پەیوەندیی بازرگانیی باشی لەگەڵ هەرێمی کوردستاندا هەیە و دەیەوێت بەهیزتری بکات، دەشڵێت: "بەریتانیا هه‌میشه‌ خواستی هه‌یه‌ په‌یوه‌ندییه‌ بازرگانییه‌کانی له‌گه‌ڵ هه‌رێمی کوردستان له‌ گه‌شه‌کردندا بێت، به‌ڵام زۆر جار ژینگه‌ و دۆخی ناوچه‌که‌، کاریگه‌ریی له‌سه‌ر ئه‌و په‌یوه‌ندییه‌ ئابوورییەدا‌ دەبێت، ساڵانی ڕابردوو ڕووبه‌ڕووی ژماره‌یه‌ک قه‌یرانی گه‌وره‌ بووین و به‌شێوه‌یه‌کی گشتی تێمان په‌ڕاندوون و ئومێدمان هه‌یه‌ په‌یوه‌ندی و پرده‌ ئابووری و بازرگانییه‌کان گه‌شه‌ بکه‌ن".


پەیوەست بە کاروباری پێدانی ڤیزای بەریتانیا بۆ هاووڵاتییانی هەرێمی کوردستان، رای گەیاند: “ئه‌وه‌ی له‌ لایه‌نه‌ فه‌رمییه‌کانی به‌ریتانیا له‌سه‌ر پرسی ڤیزا ده‌یبیستین ئه‌وه‌یه ‌که‌ زۆر له‌ گرفته‌کان په‌یوه‌ندییان به‌ شێوازی پیشکه‌شکردنی ڤیزا‌ و به‌ڵگه‌کانەوە هه‌یه‌، به‌ڵام به‌شێوه‌یه‌کی گشتی سیستمی ڤیزا‌ی به‌ریتانیا سیستمێکی سه‌ربه‌خۆیه‌ و هه‌ندێک ئاڵۆزه‌، به‌ڵام که‌سی پێشکه‌شکار ئه‌گه‌ر به‌ته‌واوی پابه‌ندی ڕێنماییه‌کانی پیشکه‌شکردن بێت و تەواوی به‌ڵگه‌کانی، که‌ پێویستن و داوایان کردووه‌، به‌بێ که‌موکوڕی پێشکه‌ش بکه‌ن، ئه‌وا هیچ کێشه‌یه‌ک له‌ پێدانی ڤیزا‌دا نابێت، به‌ڵام بچووکترین هه‌ڵه‌ له‌ فۆڕم و به‌ڵگه‌کان، ئه‌وا یه‌کسه‌ر داواکارییه‌که‌ ڕه‌ت ده‌که‌نه‌وه‌، بۆیه‌ پێویسته‌ که‌سی پێشکه‌شکار له‌ دۆکۆمێنته‌کانیدا ورد بێت، بەڵام به‌ره‌و پێشه‌وه‌چوون هه‌یه‌ و رێژه‌ی پێدانی ڤیزا‌ به‌ به‌راورد به‌ ساڵانی پێشوو زیادی کردووه‌".


جەختیشی کردەوە، دەرچوونی بەریتانیا لە یەکێتیی ئەوروپا، کاریگەریی لەسەر کوردانی ئەو وڵاتە نابێت، کە ئیقامەیان نییە: "بەریتانیا سیستەمی تایبەت بە پەنابەریی خۆیان هەیە، لەدەرەوەی یەکێتیی ئەورووپاش بن، هەر پابەندی سیستەمی ئیقامەی خۆیانن و هیچ کاریگەرییەکی بۆ سەر ئەو کەسانە نابێت".