بەرپرسێکی یەكگرتوو: ئێستا كاتی پڕۆژەكەی جۆ بایدن و دابەشكردنی عێراقە بۆ سێ هەرێم
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

بەرپرسێکی یەكگرتوو: ئێستا كاتی پڕۆژەكەی جۆ بایدن و دابەشكردنی عێراقە بۆ سێ هەرێم

"بەردەوام شانازی بە بەشداریكردنمان لە ریفراندۆم دەكەین و هەرگیز لێی پەشیمان نین"

ئەبووبەكر سلێمان، كە لە دوا كۆنگرەی حزبەكەی بووەتە ئەندامی سەركردایەتیی یەكگرتووی ئیسلامیی كوردستان و بەرپرسی مەڵبەندی دووی ئەو حزبە لە هەولێر، لە گفتوگۆیەكی تایبەتی (باس)دا، چەند پرسێكی گرنگی تایبەت بە هەرێمی كوردستان و عێراق دەخاتە ڕوو. رای دەگەیەنێت، ئێستا باشترین بژارە بۆ عێراق، پڕۆژەكەی جۆ بایدنە بۆ دابەشكردنی عێراق. جەختیش دەكاتەوە، پشتیوانی لە چاكسازی و پڕۆژە چاكسازییەكەی حكوومەت دەكەن.


سەرەتا باسی لە دوا كۆنگرەی یەكگرتووی ئیسلامی كرد، كە لە كۆتاییەكانی ساڵی رابردوودا ئەنجام درا، ئاماژەی بەوە دا، كۆنگرەكەیان بۆ ئەوە بوو لەگەڵ گۆڕانكارییەكان هەڵبكەن و ئامادەكاری بۆ قۆناغی تازەی كاركرن بكەن، گوتی: "خاڵی ستراتیژیمان لە كۆنگرە پەسند كرد، لەوانە خاڵێكی نوێ بوو، ئەویش چۆنیەتیی پەروەردەكردنی تاكە لەنێو كۆمەڵگا، بۆ ئەوەی لە رووی نەتەوەیی و ئایینی و كۆمەڵایەتییەوە، بتوانێت رۆڵی خۆی بگێڕێت".


زیاتر گوتیشی: "رۆحی نەتەوەییبوون لەنێو یەكگرتوو بە جۆرێكە، شانازیی پێوە دەكەین، لەو كۆنگرەیەدا یەكێك لە خاڵە ستراتیژییەكانمان پرسی سەربەخۆیی بووە بۆ قەوارەی هەرێمی كوردستان، ئێمە بەردەوام دەبین لەسەر پەیڕەوی نەتەوەیی و كوردایەتی و لەم بوارەدا پێشڕەو دەبین".


جەختیشی كردەوە: "شانازی بە بەشداریكردنمان لە ریفراندۆمدا دەكەین و هەرگیز لێی پەشیمان نین، بەردەوام شانازی بەو رۆژانە دەكەین، بەو رۆحەی هەوڵمان بۆ سەرخستنی ریفراندۆم دا".


پەیوەست بەو دەنگانەی لەنێو كۆنگرەدا هەبوون بۆ دەستكاریكردن یان لێكردنەوەی پاشگری ئیسلامی لە یەكگرتوو، گوتی: "لە كۆنفرانسە ناوخۆییەكان زۆر باس لە هەڵگرتنی پاشگری ئیسلامی كرا لە یەكگرتوو، بەڵام ئەو دەنگانە زۆر نەبوون و خرانە دەنگدان و دەنگی پێویستی نەهێنا، لە كۆنگرەش ئەو دەنگانە زۆر كەم بوون، خەڵكێك هەبوو لەگەڵ لێكردنەوەی پاشگری ئیسلامی بوو، بەڵام هیچ بیانوویەكی وا نەبوو، چونكە نە بە قانوون قەدەغە كراوە، نە فشارێك لە ناوخۆ و دەرەوە هەیە تاوەكوو ئەو كارە بكرێت".


ئەو بەرپرسەی یەكگرتوو هاتە سەر دۆخی هەرێمی كوردستان و پێویستیی یەكدەنگیی لایەنە سیاسییەكان و گوتی: "ناوچەکە و عێراق و هەرێمی كوردستان بە كۆمەڵێك گۆڕانكاریی زۆر خێرادا تێدەپەڕن، ئەو گۆڕانكارییانە كاریگەریی نەرێنییان لەسەر هەرێمی كوردستان دەبێت، بۆیە تاكە خاڵ بۆ بەرەنگاربوونەوەی ئەو خاڵە نەرێنییانە، بریتییە لە یەكڕیزی، یەكڕیزی زامنی پاراستنی كیانی هەرێمی كوردستانە لە هەر هەڕەشە و ئەگەرێك لە ناوچەكەدا، با لە بیروبۆچوون جیاواز بین، بەڵام بۆ بەرەنگاربوونەوەی هەڕەشەكان دەبێ یەكگرتوو و یەكڕیز بین".


ئەبووبەكر سلێمان، باوەڕی وایە كۆمەڵێك هۆكار هەیە وای كردووە ئەمڕۆ عێراق بگاتە ناهەمووارترین دۆخ، دەشڵێت: "دەستوەردان لە كاروباری عێراق ئەوەندە زۆر بووە، كوتلە و كوتلەگەری لەنێو دەسەڵاتدارانی عێراقی دروست بووە، ئەو كوتلەبازییە وای كردووە هەر لایەك پڕۆژەی خۆی هەبێت، ئەمەش وای كردووە عێراق ئیدارەیەكی باشی نەبێت، بۆیە ئەجێندای دەرەكی عێراقی بەڕێوە بردووە، هەروەها عێراق بەستراوەتەوە بە گۆڕانكارییەكانی رۆژهەڵاتی ناوەڕاست، هەر گۆڕانكارییەك، كە روو دەدات، كاریگەرییشی لەسەرعێراق دەبێت".


زیاتر گوتیشی: "ئێستا عێراق گەیشتووەتە ئەو ئاستەی، كە بەم هەیكەل و سیستەمەی بەڕێوە دەچێت، مەحاڵە بتوانێت بگاتە ئامانج، بۆیە پێویستی بە رێگای سێیەمە، كە ئەویش دابەشبوونی عێراقە، چونكە پێكهاتەی عێراق بە جۆرێكە، ناتوانێت پێكەوە هەماهەنگ بێت، ئێستا كاتی ئەوەیە پڕۆژەكەی جۆ بایدن بۆ دابەشكردنی عێراق بۆ سێ هەرێمی شیعی، سوننی، كوردی، جێبەجێ بكرێت، دوور نییە ئەمەریكاش كار لەسەر ئەو پڕۆژەیە بكات، چونكە یەكێكە لە چارەسەرەكان".


سلێمان جەخت دەكاتەوە، یەكێك لەو هەڵانەی كراوە ئەوە بووە، هەوڵی ئەوە دراوە مەركەزیەت لە عێراق بەهێز بكرێت، گوتیشی: "هەوڵدان بۆ ئەوەی مەركەزیەت لە عێراق بەهێز بكرێت، كارێكە سەر ناگرێت و ئەزموونیش ئەوەی سەلماندووە، چونكە كورد و سوننە و شیعە گەیشتوونەتە قەناعەت، ناتوانن تاسەر بەم جۆرە حوكمڕانی بكرێت، بەڵكوو دەبێت دابەش بكرێن".


ئەندامەكەی سەركردایەتیی یەكگرتوو پێی وایە. بڕیاری دەركردنی ئەمەریكا لە عێراق، كە لە پەرلەمان دەركراوە، بڕیارێكی تەواو شیعییە و بڕیارێكی عێراقی نییە، گوتیشی: "راستە بۆ ئەو كۆبوونەوەیە نیسابی یاسایی تەواو كرا، بەڵام بنەمای تەوافوق پێشێل كرا و بە بێ كورد و سوننە ئەو بڕیارە چارەنووسسازە درا، كە تەوافوقی سیاسی نەبوو، هەر بڕیارێك بدرێت ئەوا گوزارشت لە تایەفەیەكی دیاریكراو دەکا و بڕیارێكی عێراقی نییە".


راشی گەیاند، تاوەكوو ئێستا سیاسەتی هەرێمی كوردستان لەنێو ئەمەریكا و ئێراندا سیاسەتێكی هاوسەنگ بووە و كورد نەبووەتە بەشێكی ململانێیەكان، گوتیشی: "هەڵوێستەكان بێلایەنییان پێوە دیارە و نەبووین بە لایەنگری هیچ لایەنێك، بەشداری نەكردنی سەرجەم فراكسیۆنە كوردییەكانیش لە كۆبوونەوەكەی پەرلەمانی عێراق، یەكێك بوو لە خاڵە ئەرێنییەكانی پاراستنی هاوسەنگی و پاراستنی یەكڕیزیی كوردستانی، نابێت كورد پەیوەندیی خۆی لەگەڵ هیچ وڵاتێك تێكبدات، بەڵام دەبێ لەگەڵ هەر وڵاتێك بەپێی قەبارەی وڵاتەكە پەیوەندییەكانی ببەستێت".


بەرپرسەكەی یەكگرتوو پشتیوانیی حزبەكەی بۆ پڕۆسەی چاكسازیی حكوومەت راگەیاند و گوتی: "بەگشتی ئەو پڕۆژە چاكسازییەی لە پەرلەمانی كوردستاندایە، یەكێكە لە پڕۆژە هەرەباشەكان، ئێمە پشتیوانیی لێ دەكەین، هەروەها پشتیوانیی پڕۆسەی چاكسازی دەكەین و یەكێكین لە پاڵپشتە سەرسەختەكانی چاكسازی لە هەرێمی كوردستان، لە بواری ئابووری و حوكمڕانی و كۆمەڵایەتی و بوارەكانی تریشدا".