میدیاکانی بەریتانیا: زیاتر لە 100 هەزار كەس لە رۆژئاوا ئاوارە بوون

"توركیا دەیەوێت عەرەب لە شوێنی كورد نیشتەجێ بكات و كورد بسڕێتەوە"

12/10/2019 - 10:51 بڵاوکراوەتەوە لە ڕاپۆرت

بە گوێرەی ئەو زانیارییانەی لە میدیاكانی بەریتانیا بڵاو كراوەتەوە، بەهۆی لەشکرکێشیی توركیا بۆ سەر ڕۆژئاوای کوردستان،زیاتر لە 100 هەزار هاووڵاتیی سڤیل بە ناچاری مال و حاڵیان بەجێ هێشتوە و ئاوارە بوون.

 هاوکات ئاشكرای دەكەن ئەو ئاوارانە پێویستیان بە هاوكاریی مرۆییە، چونكە خۆراك و ئاویان وەكوو پێویست پێ نییە.

لەمبارەوە رۆژنامەی (گاردیەن)ی بەریتانی وتەیەكی رەجەب تەییب ئەردۆغان دەهێنێتەوە كە هەڕەشەی لە ئەورووپا كردووە بەوەی ٣ ملیۆن ئاوارەیان بۆ دەنێرێت، ئەمەشی بە مەترسی بۆ ئەورووپا وەسف كردووە.

 هاوکات ڕۆژنامەی (فاینانشیال تایمز) مەترسی دووبارە سەرهەڵدانەوەی گرووپی تیرۆرستی داعش دەخاتە روو و دەڵێت ئەگەری دروستبوونەوەی داعش بەهێزە.

گاردیان ئاشكرای دەكات، لە ٣ رۆژی هێرشی تورکیا ١٠٠ هەزار هاووڵاتیی سڤیل ئاوارە بوون، هەروەها ئەوەشی لەو هێرشانەدا زیانی زۆری بەر كەوتووە، خەڵكی سڤیلە و زۆرترین رێژەی مردنیش لە خەڵكی سڤیلە.

حوسێن رامۆ خەڵكی رۆژئاوای كوردستانە و قسەی بۆ گاردیان كردووە و دەڵێت: "خیانەت ناخۆشترین ئازارە، تەمەنم بووەتە ٦٣ ساڵ بە زۆر نەهامەتیدا رۆیشتووم، پێشتریش فشاری رژێممان لەسەر بووە، بەڵام ئەوەی لە هەمووی خراپتر بوو ئەو خیانەتە بوو كە لێمان كرا".

رۆژنامەی (تایمز) شڕۆڤەیەكی نووسەر (گاسرینا فیلپ)ی بڵاو كردووەتەوە و، ئەو ئاماژەی داوە كە ئەردۆغان بۆ چارەسەركردنی كێشەی ئاوارەكان دەیەوێت ناوچەیەكی ئارام دروست بكات، بەڵام هەموو دنیا دەزانێت ئەو بەو هەنگاوەی دەیەوێت كورد بسڕێتەوە، ئەمەش تووڕەیی و كارەسات بە دوای خۆیدا دەهێنێت.

ئەو نایشارێتەوە كە ئەردۆغان دەیەوێت لە شوێنی ١ ملیۆن كورد، عەرەب نیشتەجێ بكات، چونكە ئەو شوێنەی ئەو دەیەوێت ناوچەی ئارامی تێدا دروست بكات، یەك ملیۆن كوردی لێییە و بە ئاوارەبوونی ئەوان عەرەب جێگەیان دەگرێتەوە.

نووسەر دەنووسێت: "چەكدارە كوردەكان بۆ رووبەڕووبوونەوەی هێزی توركیا ئاگایان لە شەڕی داعش نامێنێت و ئەو چەكدارانەش لەلای ئەوان زیندانی كراون، رەنگە رابكەن و ئەمەش كارەسات بە دوای خۆیدا دەهێنێت و ئەگەری دروستبوونەوەی داعش بەهێز دەكات".

رۆژنامەی (دەیلی تەلەگراف) لە راپۆرتێكدا باس لە بوونی ١٠٠ هەزار خانەوادەی داعش دەكات لە كەمپەكانی رۆژئاوا، هەروەها ئاماژە دەدات كە مانگی رابردوو كاتێك ئەبوبەكر بەغدادی سەرۆكی داعش داوای لە ئافرەتەكان كرد لەو كەمپە رابكەن و بەرگری بكەن، ئەوان هەوڵی راكردنیاندا بەڵام سەری نەگرت، بۆیە ئەم ئۆپەراسیۆنەی توركیا دەرفەتێكی زێڕینە بۆ ئەو خانەوادانەی داعش تا بتوانن رابكەن و دووبارە خۆیان زیندوو بكەنەوە.