ناکۆکی کۆماری چین له‌گه‌ڵ کۆماری چینی میللی چیه‌؟

 

25/08/2019 - 16:24 بڵاوکراوەتەوە لە ڕاپۆرت

تایوان، دوورگه‌یه‌که‌ ده‌که‌وێته باشووری ڕۆژهه‌ڵاتی ئاسیا، له‌ناو زه‌ریای هیندیدا، کە 140کم له‌ کۆماری چینی میللی هاوسێی دووره‌.

ناوه‌ فەرمییەکەی تایوان، کۆماری چینه‌، له‌ساڵی 1949ـه‌وه‌ نیمچه‌ سه‌ربه‌خۆییه‌کی تایبه‌تی به‌خۆی وه‌رگرتووه‌، به‌ڵام تا ئێستا ناکۆکییه‌کی قوڵی چه‌ندین ساڵه‌ له‌نێوان تایوان و چیندا هه‌یه‌، که‌ ده‌گه‌ڕێته‌وه‌ بۆ جه‌نگی ناوخۆی چین له‌ ساڵانی 1927 - 1949.

جه‌نگی ناوخۆیی چین، له‌نێوان پارتی کۆمێنتانگی ده‌سه‌ڵاتدار و حزبی شیوعی چیندا ڕوویدا، که‌ به‌سه‌رکه‌وتنی حزبی شیوعی کۆتاییهات، سه‌رانی پارتی کۆمێنتانگ به‌ره‌و دوورگه‌ی تایوان هه‌ڵاتن و حکوومه‌تێکی کاتیان به‌سه‌رکردایه‌تی شیانگ کای شیک پێکهێنا.

دوای ته‌واوبوونی جه‌نگی ناوخۆیی چین، تایوان به‌ کۆماری چین ناسرا، چینی گه‌وره‌ش به‌ سه‌رکردایه‌تی حزبی شیوعی به‌ کۆماری چینی میللی ناسرا، له‌مه‌وه‌ ناکۆکییه‌کان قوڵتربوونه‌وه‌، چونکه‌ تایوان خۆی به‌ حاکمی شه‌رعی هه‌موو چین داده‌نا و شیوعییه‌کانی به‌ کوده‌تاچی ده‌ناساند، شیوعییه‌کانیش به‌هه‌مان شێوه‌ حکوومه‌تی تایوانیان به‌ ده‌سه‌ڵاتێکی کوده‌تاچی له‌ جیهاندا ده‌ناساند.

به‌پێی بڕیاری 2758ی ساڵی 1971 نه‌ته‌وه‌یه‌کگرتووه‌کان، ئه‌ندامێتی تایوان هه‌ڵپه‌سێردراو، کۆماری چینی میللی جێگاکه‌ی گرته‌وه‌ و بوو به‌ نوێنه‌ری چین، ئه‌مه‌ش گورزێکی گه‌وره‌ی دیپلۆماسی بوو له‌ تایوانییه‌کان درا.

به‌پێی داتایه‌کی که‌ناڵی (بی بی سی) به‌ریتانی، له‌ ئێستادا که‌متر له‌ 20 وڵات، دانیان به‌سه‌ربه‌خۆیی تایواندا ناوه‌.