دەستەی دەسپاکی بڕیارێك بۆ فەرمانبەران دەردەكا

 

20/08/2019 - 16:41 بڵاوکراوەتەوە لە ڕاپۆرت

بەپێی نووسراوی دەستەی دەسپاکی هەرێمی كوردستان، كە لە مانگی رابردوو دەرچووە و كۆپییەكی نووسراوەكەش دەست (باس) كەوتووە، ئاماژە بە بڕیارێك كراوە بۆ فەرمانبەران.


لە نووسراوەكەدا هاتووە: "نابێت فەرمانبەر لە كاتی دەوامی فەرمی كارێكی تر بكات، بە تایبەت ئەوانەی هەڵگری بڕوانامەی باڵان".


وەكوو بەشی یاسایی دەستەی دەسپاکی ئاماژەی بەوە داوە، ئەو بڕیارە بە مانای قەدەغەكردنی كاركردنی فەرمانبەر نایەت، بەڵكوو لەدوای دەوامی فەرمی بۆی هەیە كاری تایبەتی خۆی بكات.
جەختیش كراوەتەوە، لە كاتی دەوامی فەرمیدا دەبێ فەرمانبەر پابەند بێت بە كاری دەوامی فەرمانگەكەی.


مشیر رەشید ئیبراهیم، بەڕێوەبەری گشتیی فەرمانگەی كاروباری یاسایی و لێكۆڵینەوە، لە دەستەی دەسپاکی بە (باس)ی راگەیاند، ئەو بابەتەیان گەیاندووە بە فەرمانگەكان، بۆ ئەوەی فەرمانبەران پابەند بكرێن لە كاتی دەوامی فەرمی، تەنیا كاری فەرمانگەكەی بكات، گوتی: "دەركردنی ئەو بڕیارە پشتی بەستووە بە یاسا، بەشێك لە فەرمانبەران دەوامی فەرمیی خۆیان جێ هێشتووە و خەریكی دەوام و كاری تر بوونە، ئەوەش كاریگەریی لەسەر دەوام كردووە".


لە سەرەتای كاركردنیەوە، كابینەی نۆیەمی حكوومەتی هەرێمی كوردستان، زۆر جەخت دەكاتەوە لەسەر دەوامی فەرمانبەران و بەرپرسانی فەرمانگەكان، بۆ ئەوەی مامەڵەی هاووڵاتییان بەخێرایی رایی بكرێت.


پێشووتر ئانۆ جەوهەر، وەزیری گواستنەوە و گەیاندن بە (باس)ی راگەیاندبوو "لایەن سەرۆكی حكوومەت فەرمانمان پێ كراوە، كە ئامانجی ئەو كابینەیە خزمەتكردنی هاووڵاتییانە، دەبێت فەرمانبەر چاوی لەسەر راییكردنی مامەڵەی هاووڵاتییان بێ".


حاكم هیوا دزەیی، ئەندامی داواكاری گشتی و ئەندامی داوای مافی گشتی بە (باس)ی راگەیاند، لە كاتی دەوامی فەرمیدا، دەبێ فەرمانبەر پابەندی كاری خۆی بێت و كاری تر نەكا، گوتی: "بەپێی یاسای بەرزەفتی فەرمانبەران، ئەگەر لە كاتی دەوامدا بڕوات بۆ كارێكی تر، دەبێ رەزامەندیی فەرمانگەكەى هەبێت، بەپێچەوانەوە دەبێت لیژنەی لێكۆڵینەوەی لە دژدا پێك بێت، ئەگەر سەلمێندرا كاری نایاسایی كردووە، دەبێ سزا بدرێت".


روونیشی كردەوە، ئەگەر فەرمانبەر دوای دەوام كاری تر بكات، نابێ پێچەوانەی یاسا و رێنماییەكان بێت، گوتی: "بەپێی یاسا فەرمانبەر تاوەكوو پلە 7 بۆی هەیە بە رەزامەندیی فەرمانگەكەی لەدوای دەوام كاری تر بكات، بەو مەرجەی كاریگەریی لەسەر وەزیفەكەی نەبێت".