چەکدارانی پەکەکە سەنگەرەکانیان چۆڵ کردووە و چوونەتە نێو ئاواییەکانەوە

له‌ هه‌فته‌یه‌كدا لە ئامێدی فڕۆكه‌ جه‌نگییه‌كانی توركیا 5 ئۆتۆمبێلی په‌كه‌كه‌یان كردووه‌ته‌ ئامانج

05/08/2019 - 16:16 بڵاوکراوەتەوە لە ڕاپۆرت

به‌هۆی بوونی بنكه‌ و باره‌گاكانی په‌كه‌كه‌ و داگیركردنی 800 گوند و ئاوایی‌ هه‌رێمی كوردستان له‌لایه‌ن چەکدارانی پەکەکەوە، فڕۆكه‌ جه‌نگییه‌كانی توركیا به‌رده‌وام ئه‌و ناوچانه‌یان كردووه‌ته‌ ئامانج و به‌هۆیه‌وه‌ زیانێكی زۆری گیانیی و ماڵی به‌ر خه‌ڵك و هاووڵاتییانی سڤیلی ئه‌و ده‌ڤه‌رانه‌ی هه‌رێمی كوردستان كه‌وتووه‌.


هه‌ر كه‌ باس له‌ بۆردومانی فڕۆكه‌كانی توركیا بۆ سه‌ر بنكه‌كانی په‌كه‌كه‌ ده‌كرێت، یه‌كڕاست ده‌ڤه‌ری ئامێدی دێته‌ به‌رچاوی خه‌ڵك، چونكه‌ تا ئێستا 148 گوندی سه‌ر به‌و قه‌زایه‌، له‌به‌ر بوونی باره‌گاكانی په‌كه‌كه‌، خه‌ڵكه‌كه‌ ناچار بووه‌ گونده‌كانیان جێ بهێڵن، به‌ جۆریك ئێستا ئه‌و ژماره‌ گونده‌ به‌ته‌واوی چۆڵ كراون و ژیانیان تیدا نه‌ماوه‌. به‌مه‌ش ئه‌و ناوچه‌یه‌ بووه‌ته‌ گۆڕه‌پانی شه‌ڕی نێوان په‌كه‌كه‌ و سوپای توركیا و ڕۆژانه‌ به‌یه‌كدادان و ئاڵۆزی له‌و ناوه‌ دروست ده‌بێت، نەخاسمە چەند مانگێکە چەکدارانی پەکەکە سەنگەر و بارەگاکانی خۆیان چۆڵ کردووە و چوونەتە نێو گوند و ئاواییەکان و خەڵکی سڤیلی ناوچەکەوە.


به‌ پشتبه‌ستن به‌و زانیارییانه‌ی لە خەڵکی ناوچەکەوە گه‌یشتوونه‌ته‌ ده‌ست هه‌فته‌نامه‌ی (باس)‌، فڕۆكه‌ جه‌نگییه‌كانی توركیا ڕۆژانه‌ و به‌ به‌رده‌وامی چاودێریێكی وردی جووڵه‌ و جموجۆڵی په‌كه‌كه‌ له‌ ناوچه‌كه‌ ده‌كه‌ن و ڕۆژ نییه‌ ده‌نگی بۆردومان و هێرشێكی ئاسمانیی ئه‌و فڕۆكانه‌ له‌ ده‌ڤه‌ری ئامێدی نه‌بیسترێ، كه‌ له‌ ئه‌نجامدا زیانێكی گه‌وره‌ به‌ په‌كه‌كه‌ و بنكه‌ و باره‌گاكانیان گه‌یاندووه‌، ئه‌مه‌و سه‌ره‌ڕای ئه‌و زیانه‌ زۆره‌ی، له‌ ژینگه‌ی ناوچه‌كه‌ و خەڵکی سڤیلی ده‌ده‌ن.


 په‌یوه‌ست به‌م ڕووداوانه‌، له‌ ڕێكه‌وتی 18/7/2019 فڕۆكه‌ جه‌نگییه‌كانی توركیا له‌ سنووری گوندی (سپیندارێ)ی سه‌ر به‌ ناحیه‌ی چه‌مانكێ، به‌ دوو مووشه‌ك ئۆتۆمبێلێكی په‌كه‌كه‌یان كرده‌ ئامانج و به‌گوێره‌ی زانیاریی خه‌ڵكی ناوچه‌كه‌، له‌م هێرشه‌دا (2) ئه‌ندامی په‌كه‌كه‌ گیانیان له‌ده‌ست دا و (5) هاووڵاتیی سڤیلی گونده‌كه‌ش بریندار بوون. هه‌ر هه‌مان ڕۆژیش له‌ سنووری ناحیه‌ی ئه‌ترووش فڕۆكه‌كانی توركیا ئۆتۆمبێلێكی دیكه‌ی په‌كه‌كه‌یان كرده‌ ئامانج، كه‌ به‌ هۆیه‌وه‌ (3) ئه‌ندامی ئه‌و حزبه‌ کوژران.


 هه‌ر له‌و چوارچێوه‌یه‌دا ڕۆژی 24/7/2019 له‌ سنووری هه‌ردوو ناحیه‌ی باتیفا و كانی ماسێ، به‌ دیاریكراویش له‌نزیك نزیك گوندی بێگۆڤا، فڕۆكه‌كانی توركیا ئۆتۆمبێلێكی په‌كه‌كه‌یان كرده‌ ئامانج. به‌گوێره‌ی لێدوانی قسه‌ی خه‌ڵكی ئه‌و ده‌ڤه‌ره‌، كه‌ له‌ ترسی په‌كه‌كه‌ نه‌وێران ناوی خۆیان بۆ (باس) بدركێنن، له‌و هێرشه‌دا (2) ئه‌ندامی ئه‌و حزبه‌ کوژراون، ئه‌مه‌ و جگه‌ له‌ برینداربوونی چه‌ند ئه‌ندامێكی دیكه‌یان. هه‌ر دوای ڕووداوه‌كه‌ش په‌كه‌كه‌ ئۆتۆمبێلی هاووڵاتیێكیان به‌ مه‌به‌ستی گواستنه‌وه‌ی ته‌رم و برینداره‌كان برد و تا ئێستاش لێیان زه‌وت كردووه و نه‌یانداوه‌ته‌وه‌‌.


له‌لایه‌كی دیكه‌وه‌، ڕۆژی 25/7/2019 له‌ گوندی كانی میسكای سنووری ناحیه‌ی كانی ماسێ، فڕۆكه‌كانی توركیا ئۆتۆمبێلێكی په‌كه‌كه‌یان بۆردومان كرد و به‌ هۆیه‌وه‌ (2) ئه‌ندامی ئه‌و حزبه‌ گیانیان له‌ده‌ست دا. هه‌ر هه‌مان ڕۆژ و له‌سه‌ر ڕێگای گوندی دێره‌شێ له‌ سنووری قه‌زای ئامێدی، فڕۆكه‌كان ئۆتۆمبێلێكی په‌كه‌كه‌یان به‌ مووشه‌كه‌كانیان پێكا و به‌ هۆیه‌وه‌ (4) ئه‌ندامی حزبه‌كه‌ گیانیان له‌ده‌ست دا.


 به‌م پێیه‌ش، ته‌نیا له‌ ماوه‌ی یه‌ك هه‌فته‌دا فڕۆكه‌كانی توركیا (5) ئۆتۆمبێلی په‌كه‌كه‌یان پێكاوه‌، كه‌ به‌ هۆیه‌وه‌ گیانله‌ده‌ستدانی (13) ئه‌ندامی ئه‌و حزبه‌ و برینداربوونی ژماره‌یه‌كی دیكه‌ی لێ کەوتەوە.


 ئه‌م چاودێری و بۆردومانانه‌ی فڕۆكه‌ جه‌نگییه‌كانی توركیا وایان كردووه‌، گه‌ریلاكانی په‌كه‌كه‌ بێنه‌ ناو گوند و ئاواییه‌ ئاوه‌دانه‌كان و تێكه‌ڵی خه‌ڵكی ئه‌و ده‌ڤه‌ره‌ ببن، به‌مه‌ش هاووڵاتییانی سڤیلی گوند و ئاواییه‌كانی ده‌ڤه‌ره‌كه‌ش ببنه‌ ئامانجی هێرشی ئاسمانیی و بۆردومانی فڕۆكه‌كانی توركیا، كه‌ به‌م هۆیه‌وه‌ زیانێكی زۆری گیانیی و ماڵی به‌ر خه‌ڵكی ئه‌م گوندانه‌ كه‌وتووه‌ و ترس و نیگه‌رانییه‌كانیان زیاتر بووه‌.


 به‌گوێره‌ی زانیارییه‌كان، له‌ ئه‌نجامی ئه‌و هێرشه‌ ئاسمانی و بۆردومانانه‌ی فڕۆكه‌كانی توركیا بۆ سه‌ر بنكه‌ و باره‌گاكانی په‌كه‌كه‌ له‌ناو گوند و ئاواییه‌ سنوورییه‌كانی هه‌رێمی كوردستان، سه‌نته‌ری قه‌زای ئامێدی و ناحیه‌كانی ئه‌و سنووره‌، له‌ ماوه‌ی كه‌متر له‌ ساڵێك (18) هاووڵاتیی سڤیل شه‌هید بوونه‌ و (15)ی تریشیان بریندار بوونه‌، ئه‌مه‌و جگه‌ له‌وه‌ی، كه‌ زیاتر له‌ سێ مانگه‌ (2) هاووڵاتیی دیكه‌ بێ سه‌روشوێنن.