جەهەپە لە ئۆپۆزسیۆنەوە بەرەو دەسەڵات هەنگاو دەنێت

02/07/2019 - 11:28 بڵاوکراوەتەوە لە ڕاپۆرت

پارتی گەلی كۆماری )جەهەپە( كە یەكەم پارتە لە توركیا دروست بووە و یەكەم سەرۆكیشی موستەفا كەمال ئەتاتورك بووە، دوای ئەو سەركەوتنە گەورەیەی لە هەڵبژاردنی شارەوانییەكانی ئیستەنبۆڵ بەدەستی هێنا، دەیەوێت لە ئۆپۆزسیۆنەوە بەرەو دەسەڵات بڕوات و چاوی لەوەیە وەكوو ئاكەپە حكوومەتی توركیا بگرێتە دەست.

 

چەند میدیایەكی توركیا بڵاویان كردوەتەوە، كەمال كلیچدارئۆغلو سەرۆكی جەهەپە، كۆبوونەوەی لەگەڵ سەركردایەتیی پارتەكەیدا كردووە و، پێیانی گوتووە لەمەودوا كاری جەهەپە قورستر دەبێت، چونكە ئیدی پێویستە بەرەو دەسەڵات بڕۆین و ئۆپۆزسیۆنبوون جێ بهێڵین.

 

كلیچدارئۆغلو گوتوویەتی پێویستە لە یەكەم هەڵبژاردنی پەرلەمانی و سەرۆكایەتی دوای هەڵبژاردنی شارەوانییەكانی ٢٣ی حوزەیران، جەهەپە ٥٠+١ بەدەست بهێنێت، چونكە ئەگەر ئەمجارەیان جەهەپە نەیەتە دەسەڵاتەوە، متمانەی خەڵك لەدەست دەدات.

 

لەلای خۆشییەوە ئەكەپە هەموو هەوڵێك دەدات تا بتوانێت ئەو شكستەی لە هەڵبژاردنی شارەوانییەكان دووچاریان بوەوە بەسەریدا زاڵ بێت، بۆیە چەند هەنگاوێكی گرتووەتە بەر.

 

بە گوێرەی زانیارییەكان، ئاكەپە بە نیازە لە مانگی ٩ی ئەمساڵدا پرسی چارەسەری بهێنێتەوە بەرباس، بەڵام بە ستراتیژییەتێكی‌تر، ئەمەش یەكەم هەنگاوی ئاكەپە دەبێت بۆ نزیكبوونەوە لە كورد و باكوورییەكان.

 

هەروەها ئیدی زمانی توند بەرامبەر بە كورد و هەدەپە بەكار ناهێنێت، چونكە لە پروپاگندەی هەڵبژاردندا ئەوەندە وشەی تیرۆری بۆ كورد بەكار هێنا، كوردەكان لەسەر سندووقی دەنگدان وەڵامیان دایەوە.

 

جگە لەوەش ئەردۆغان دەیەوێت ریفۆرمێكی گەورە لەناو پارتەكەیدا ئەنجام بدات و چەند كەسایەتییەكیش بە فەرمی لە پارت دوور بخاتەوە.

 

جەهەپە لە ئێستاوە خۆی ئامادە دەكات تا بتوانێت لە هەڵبژاردنی داهاتوودا بە سەركەوتوویی لێی بچێتە دەرەوە، چونكە دەركەوت هاوپەیمانیی (میللەت) لە نێوان جەهەپە و پارتی باش، هەروەها بە پاڵپشتیكردنی هەدەپەش دەتوانێت ٥٠+١ی دەنگەكان بهێنێت، بۆیە جەهەپەش ناتوانێت بە ئاسانی دەستبەرداری هەدەپە ببێت.

 

ئەنجامی هەڵبژاردنی شارەوانییەكانی توركیا و داهاتووی سیاسیی توركیا بۆ كورد زۆر قازانجی هەبوو، چونكە جگە لەوەی ٢ پارتە گەورەكەی توركیا ئاكەپە و جەهەپە بۆیان دەركەوت هیچ پارتێك لە توركیا بەبێ كورد ناتوانێت سەركەوتنی گەورە بەدەست بهێنێت، مەهەپە كە هاوپەیمانی ئاكەپەیە و نەژادپەرستە و بڕوای بە كێشەی كورد نییە، هەروەها پارتی باشیش كە هاوپەیمانیی جەهەپەیە و ئەویش بڕوای بە كێشەی كورد نییە، هەردوو پارت گەیشتوونەتە ئەو بڕوایەی ناتوانن بەبێ كورد لە مەیدانی سیاسەتدا ئەكتیڤ بن، بۆیە نەرمبوونە بەوەی مافەكانی كورد لە توركیا جێگیر بكەن و گرنگی بە باكوور بدەن.

 

دەكرێت بڵێین لە توركیا هەڵبژاردن دوای راگەیاندنی ئەنجامی هەڵبژاردنی شارەوانییەكانی ئیستەنبۆڵ دەستی پێكرد، چونكە لەوێدا دەركەوت پارتەكان قەبارەیان چەندە و بەخۆیان كەوتن بۆ ئەوەی لە هەڵبژاردنی پەرلەمانی و كۆماری داهاتوو بتوانن هەڵەكانیان راست بكەنەوە.

 

جەهەپە كە گەورەترین پارتی ئۆپۆزسیۆنی توركیایە، دەیەوێت ئۆپۆزسیۆنبوون جێ بهێڵێت و بەرەو لووتكەی دەسەڵات بڕوات، ئاكەپەش دەیەوێت پارێزگاری لە كورسیی دەسەڵات بكات. ئەمەش كێبڕكێ و ململانێی نێوان پارتە سیاسییەكانی توركیای توندتر كردووە و هاووڵاتییانی بەسەر ٢ جەمسەردا دابەش كردووە.