زۆربەی نووسەرانی توركیا نامەكەی ئۆجەلان ڕەت دەكەنەوە

22/06/2019 - 12:51 بڵاوکراوەتەوە لە ڕاپۆرت

ئەو نامەیەی عەبدوڵا ئۆجەلان ٢ رۆژ بەرلە هەڵبژاردنی شارەوانیی ئیستەنبۆڵ بڵاو كرایەوە، كە داوای لە دەنگدەری كورد كردووە، بێلایەن بێت و بە شێوەیەكی ناڕاستەوخۆش پێی باش بووە كاندیدی ئاكەپە بیناڵی یڵدرم ببێتە سەرۆكی شارەوانیی ئیستەنبۆڵ، نامەكە دەكەوێتە بەر رەحنەی نووسەرە توركەكان و داوا دەكەن كورد بەو نامەیە هەڵنەخەڵەتێن.

 

نووسەرە توركەكان، بەتایبەت ئەو نووسەرانەی سەر بە ئۆپۆزسیۆن و بێلایەنن، پێیانوایە ئەمەش یارییەكی‌تری پارتی دەسەڵاتە و دەیانەوێت دیسان كورد هەڵبخەڵەتێنن.

 

ئۆیا بایدار نووسەری دیاری توركیا، ئەمڕۆ ٢٢_٦_٢٠١٩ وتارێكی لە ماڵپەڕی (T24)ی توركی بڵاو كردوەتەوە دەڵێت: "پێویست ناكات كورد بەو نامەیەی ئۆجەلان هەڵبخەڵتێت".

 

نووسەر گومانی لەو نامەیەیە هەیە و پێیوایە ئۆجەلان نەیگوتووە پشتگیری لە كاندیدی ئاكەپە بكەن، بەڵام ئەمەش هەر یارییەكی تری ئەكەپەیە بۆ راكێشانی دەنگی كورد.

 

بایدار دەنگدەری كوردی پێ لە دەنگدەری تورك زیرەكترە، بۆیە دەڵێت ئەستەمە لە ماوەی ٢ رۆژدا بە یارییەكی لەو شێوەیەی دەسەڵات هەڵبخەڵەتێن، چونكە هەرگیز ئەو زوڵم و زۆری و رووخاندنی شارەكانیان لەبیر ناكەن".

 

جگە لە بایدار، چەندین نووسەری‌تری توركیا بە هەمان شێوەیە پێیانوایە ئەم یارییەی دەسەڵات بەرامبەر بە دەنگدەری كورد دەیكات، یارییەكی بێ ئەنجام و خراپە.

 

تانەر ئاكچام، وتارێكی بۆ هەمان ماڵپەڕی نووسیوە و ئەویش پێی وایە دەبێت ئەم یارییە نهێنییەكی تێدا بێت، ئەگەر نا بۆچی ئۆجەلان پشتگیری لە ئاكەپە دەكات؟

 

نووسەر ئاماژە دەدات، كە ئەو نامەیەی ئۆجەلان تەنیا بەرلە ئەنجامدانی هەڵبژاردن نابێتە جێی گقتوگۆ، بەڵكوو دوای هەڵبژاردنیش گفتوگۆی زۆری لەسەر دەكرێت و یارییەكە لێرە كۆتایی پێ نایەت، بەڵام پرسیار ئەوەیە، بۆچی دەزگای هەواڵگریی توركیا ئۆجەلانیان بەكار هێناوە بۆ ئەم هەڵبژاردنە و پەیامی ئەو بڵاو دەكەنەوە؟

 

هاوکات ئاماژە بەوەش دەدات، ئەگەر ئاكەپە هێڵێكی باشی كێشابایە بۆ چارەسەركردنی كێشەی كورد، هەروەها ئەو نامەیەی ئۆجەلانیشی٢٠ رۆژ بەرلە ئێستا بڵاو بكردایەتەوە، ئەوكات نامەكە رێگەی سیاسییانەی وەردەگرت.