لە زۆر لە گەڕەكەكان دابەش دووی خانووەکان دەكرێتەوە

 

18/06/2019 - 16:14 بڵاوکراوەتەوە لە ڕاپۆرت

لە 18ی 11ی 2018وە سەرۆكایەتیی شارەوانیی هەولێر بە بڕیارێك هەموو ئیفراز و تەقیسمێكی بۆ خانوو و زەوی لە سنووری شارەوانیی هەولێر راگرت، بەڵام لە 30ی 5ی 2019 سەرۆكایەتیی شارەوانی بڕیارەكەی پێشووی بە جۆرێكی ترهەموار كردووەتەوە.

بەپێی بڕیارەكە، کە كۆپییەكی دەست (باس) كەوتووە، لەبارەی دابەش دووی زەوی لارییان نییە، بەڵام بەپێی چەند مەرجێك، لەوانە: "داواکار موڵکی تری بەناوەوە نەبێت و لە هەمان گەڕەک و کۆڵاندا دابەش دووی هەبێت، هەروەها بە هیچ شێوەیەک ئەو گەڕەکانەی دیاری نەکراون، رێگە بە دابەش دوویان نەدرێت".

ئەندازیار بەشدار رەزا سەید گوڵ، بەڕێوەبەری شارەوانیی 5ی هەولێر، لە لێدوانێكدا بۆ (باس) روونكردنەوە لەبارەی مەرجەكانی كردنەوەی دابەش دووی زەوی و خانوو دەدات و دەڵێت: "لەو گەڕەكانەی 80%یان بووەتە دابەش دوو، رێگەیان پێ دەدرێت دابەش دوو تیایاندا بكرێتەوە، بۆ نموونە. ئەگەر لە كۆڵانێك زۆربەی خانووەكان دابەش دوو بن، ئەوە رێگەیان پێ دەدرێت، بەڵام لە كۆڵانێك رێگە نادرێت، كە تەنیا چەند خانووێك دابەش دوو كرابن".

ئەگەر لە كۆڵانێك چەند خانوویەكی 200 مەتری یان زەویی 200 مەتری مابن، ئەوە رێگەیان پێ دەدرێت دابەش دوو بكرێت.

روونیشی كردەوە، چەند گەڕەكێك بە هەموو جۆرێك دابەش دوو تیایاندا قەدەغەیە، وەكوو گەڕەكی ئەندازیاران و رووناكی، موفتی، بەشێك لە گەڕەكی موفتی، بەشێك لە گەڕەكی ئازادی، لەگەڵ چەند گەڕەكێكی تر، گوتیشی: "ئەگەر بڕیارەكە كەسێك بگرێتەوە، ئەوە نووسراوی بۆ دەكرێت بۆ هەرچوار تاپۆ، نابێت هیچ موڵكێكی تری بەناوەوە بێت، خانوو بێت یان زەویی بازرگانی و كشتوكاڵی، ئەوەش بۆ ئەوەیە كڕین و فرۆشتن بەو زەوی و خانووانە نەكرێت، تەنیا خەڵكی كەمدەرامەت لێی سوودمەند بن".

بەرپرسەكەی شارەوانی جەختی كردەوە، زەوییە دابەشكراوەكان بە هیچ جۆرێك رێگەیان پێ نادرێت دابەش دوو بكرێن، گوتیشی: "ئەو زەوییانەی ئیفرازاتیان نوێیە، بۆ نموونە 8ی حەسارۆك و هەندێك شوێنی تر ئەوانە دابەش دوویان تێدا ناكرێتەوە".

دووپاتیشی كردەوە خەڵكێكی زۆر لە هەمواركردنەوەی بڕیارەی شارەوانیی سوودمەند دەبن: "تەنیا لە سنووری شارەوانیی ئێمە لە ماوەی هەفتەیەكدا 30 مامەڵەمان رایی كردووە، لە شارەوانییەكانی تریش بە هەمان شێوە خەڵكێكی زۆر سوودمەند دەبن".

نەبەز مەحیەدین نافیز، بەڕێوبەری گشتیی شارەوانییەكانی هەولێر بە (باس)ی راگەیاند، ئەو مەرجانەی بۆ رێگەپێدانی دابەش دیاری كراوە، تەنیا بۆ ئەوەیە خەڵكێكی هەژار سوودمەند بێت و دوور بخرێتەوە لە بازرگانی.