هەشت تەقینەوە مەسیحییەکانی سریلانکایان کردە ئامانج

21/04/2019 - 13:12 بڵاوکراوەتەوە لە ڕاپۆرت

 

هەشت تەقینەوە مەسیحییەکانی سریلانکایان کردە ئامانج و سەدان کەس بوونە قوربانی.

 

سەرلەبەیانیی ئەمڕۆ یەکشەممە 21-4-2019، شەش تەقینەوە لە یەک کاتدا لە سێ کەنیسە و سێ هۆتێلی شاری کۆڵۆمبۆی پایتەختی سریلانکا، روویان دا.

 

پێش نیوەڕۆی ئەمڕۆ دوو تەقینەوەی دیکەش لە نزیک شاری کۆڵۆمبۆ یەک بە دوای یەک روویان دا.

 

بەهۆی ئەو هەشت تەقینەوەیە، لانی کەم 156 کەس گیانیان لەدەست داوە زیاتر لە 650 کەسی دیکەش بریندار بوون.

 

هێرشەکان، کە حکوومەتی سریلانکا بە هێرشی تیرۆریستی ناوی بردوون، هاوکات بوون لەگەڵ جەژنی قیامەی مەسیحییەکان.

 

له‌ هه‌ر هەشت هێرشه‌كه‌دا، كه‌ لانی كه‌م دوویان خۆكوژی بوون، كه‌نیسه‌ و هۆتێله‌ ناسراوه‌كانی ئه‌و وڵاته‌ كراونه‌ته‌ ئامانج. به‌ پێی ڕاپۆرته‌ جیهانییه‌كان، چه‌ندین هاووڵاتی به‌ریتانی، ئه‌مریكی و یابانیش له‌ ناو قوربانییه‌كاندا هه‌ن.

 

حكومه‌تی سریلانكا باری له‌ناكاو و قه‌ده‌غه‌ی هاتووچۆی له‌ سه‌رتاسه‌ری ئه‌و وڵاته‌ ڕاگه‌یاندووه‌ و زۆربه‌ی ماڵپه‌ڕه‌كانی سۆشیال میدیا و پەیوەندییەکانی بلۆك كردووه‌.

 

سریلانكا وڵاتێكی بچووكی دوورگه‌ییه‌ كه‌ ده‌كه‌وێته‌ باشووری هیندستان و له‌ ناو زه‌ریای هینده‌. ئایینی زیاتر له‌ ٨٢% ی دانیشتوانی سریلانكا بوودی و هیدۆزه‌. ٩%ی خه‌ڵكه‌كه‌ی په‌یڕه‌وی ئایینی ئیسلامه‌ و زیاتر له‌ ٧%ی كریستیانن.

ئەلبوومی وێنەکان