پەرلەمانتارێکی عێراق: زۆرترین کەیسی گەندەڵی لەسەر وەزارەتی نەوت و کۆمپانیای سۆمۆ هەیە

"ساڵانە 35 ترلیۆن دیناری بودجە بۆ كەسانێك کە لە دەرەوەی عێراقن دەڕوات"

11/04/2019 - 15:03 بڵاوکراوەتەوە لە ڕاپۆرت

سەعد حوسەینی، ئەندامی لیژنەی نەزاهەی پەرلەمانی عێراق، لە گفتوگۆیەكی تایبەتی (باس)دا، چەندین پرسی گرنگی تایبەت بە گەندەڵی دەخاتە ڕوو. ئاشكراشی دەكات، لە عێراق مافیایەكی زۆر هەن و گەندەڵكاران دەپارێزن. راشی دەگەیەنێت، وێڕای هەبوونی گەندەڵی لە دامودەزگاكان، بە تایبەت لە نەوت و كارەبا و خاڵە گومرگییەكان، زۆر فەرمانبەری وەهمی و بندیواریش هەن و مووچە و پارەی گشتی دەچێتە گیرفانیان.


سەرەتا ئەوەی خستە ڕوو، گەورەترین مەترسی لەبەردەم عێراقدا گەندەڵییە، گوتی: "ئەوەی كە ئەمڕۆ گەورەترین هەڕەشە و مەترسییە لەبەردەم عێراق و ئابووریی عێراق، ئەو گەندەڵییە بەرفراوانەیە، كە لە هەموو دامودەزگاكانی دەوڵەتی عێراقدا بڵاو بووەتەوە".


ئێستا ئەنجومەنی باڵای بەرەنگاربوونەوەی گەندەڵی لە لایەن حكوومەتی عێراقی پێکهێندراوە، لەم بارەیەوە ئەو پەرلەمانتارە گوتی: "دەبێ سەرۆك وەزیرانی عێراق جدی بێت لەسەر دژایەتیكردنی گەندەڵی و بە دەستێكی پۆڵایینەوە لە گەندەڵكاران بدات، ئەگەرچی ئەو گەندەڵكارانە پشت و پەناشیان هەبێت، ئێمەش هاوكار دەبین بۆ سەرخستنی ئەو بابەتە".


حوسەینی ئەو رێگایانە ئاشكرا دەكات، كە بەهۆیەوە لە عێراق سامانی گشتی تیایدا بەفیڕۆ دەدرێت، گوتی: "بەفیڕۆدانی پارە و سامانی گشتی، بابەتێكە لە هەموو دامودەزگاكانی دەوڵەتدا هەیە، بەڵام زۆرترین گەندەڵی و بەفیڕۆدانی سامانی گشتی لە وەزارەتی نەوتدا هەیە، هەروەها ئەگەرچی گەلی عێراق بەدەست كێشەی كارەباوە دەناڵێنێت، بەڵام گەندەڵییەكی زۆر لە وەزارەتی كارەباشدا هەیە، بەگشتی هەموو وەزارەت و فەرمانگەكان بەشی خۆیان لەو گەندەڵییەدا هەیە".


ئەندامەكەی لیژنەی نەزاهەی پەرلەمانی عێراق ئاشكراشی دەكات: "بە هەزاران دۆسێی گەندەڵی لە دەستەی نەزاهە و دادگاكاندا هەیە، سەدان دۆسێش لەلای لیژنەی نەزاهەی پەرلەمان هەیە، دۆسێكانی گەندەڵی لەنێو دۆڵابەكان تۆزیان لەسەر نیشتووە، ئێمە بەڕژدی كار لەسەر ئەو دۆسێیانە دەكەین و دووبارە داوای لێكۆڵینەوەیان تێدا دەكەینەوە، بە تایبەت ئەو دۆسێیانەی بەهۆی هەڕەشەی سیاسییەوە داخراون".


سەعد حوسەینی، پێی وایە: "لەپشت گەندەڵكارانەوە لە عێراق خەڵكێكی خاوەن دەسەڵات و مافیا هەن، كە پشتیوانییان لێ دەكات، بەڵام ئێمە بەرەنگاری ئەو كەسانە دەبینەوە و لە كەس ناترسین".


ئەو ئاشكرای دەكات، لە كۆمپانیای نیشتمانیی نەوتی عێراق ناسراو بە (سۆمۆ)، گەندەڵییەكی زۆر هەیە، گوتیشی: "بەهۆی زۆریی گرێبسەتەكانی نەوت و رێگەپێدان بە كۆمپانیاكان، گەندەڵی و ناشەفافیەتێكی زۆر لە كۆمپانیای سۆمۆدا هەیە، لەو كۆمپانیایەدا دۆسێی زۆر و نیشانەی زۆری پرسیار لەسەر كارەكانیان هەیە، بۆیە هەوڵی لێپرسنەوەی ئەو بەرپرس و كارمەندانی كۆمپانیایەکە دەدەین، كە سامان و دارایی گشتییان بەفیڕۆ داوە".


لەمیانەی قسەكانیدا، ئەو پەرلەمانتارە شیعەیەی عێراق دووپاتی دەكاتەوە: "لە چەند ساڵێکی رابردوودا بە ملیاران دۆلاری عێراق بەهۆی گەندەڵیییەوە بەفیڕۆ چووە و چووەتە گیرفانی گەندەڵكارانەوە".


لە سەرێكی ترەوە، حوسەینی، ئەوەش دەخاتە ڕوو: "لە هەموو وەزارەت و فەرمانگەكان كەسانی بندیوار و فەرمانبەری وەهمی هەیە و مووچە و پارەی گشتی دەچێتە گیرفانیان و دەوامیش ناكەن، تەنانەت لە سوپای عێراقیشدا سەربازی وەهمی هەیە، بەم سەربازە وەهمییانە زۆر شوێنی عێراق كەوتە ژێر دەستی داعش، تەنانەت لەنێو حەشدی شەعبی و دامودەزگا ئەمنییەكانیشدا بندیوار و چەكداری وەهمی هەن".


ئەندامەكەی لیژنەی نەزاهە دووپاتی دەكاتەوە: "بەدواچوون بۆ ئەو زانیارییە دەكەین، كە باس لەو دەكات ساڵانە 35 ترلیۆن دیناری بودجەی عێراق دەڕوات بۆ كەسانێك، كە لەدەرەوەی عێراقدا دەژین، بۆ ئەوە لێكۆڵینەوە دەكەین و داوای بەڵگە دەكەین".


سەعد، ئاشكراشی دەكات، لە خاڵە سنووری و گومرگییەكاندا گەندەڵیی زۆر هەیە، گوتیشی: "دۆسێی گەندەڵی لە خاڵە گومرگییەكاندا هەیە، چونكە ئەو شوێنانە بە پێدانی پارە و بەرتیل ئاسانكاری بۆ هاتنە ژوورەوەی كاڵا و خۆراكی خراپ دەكەن، هەروەها پارەیەكی زۆریش لەو خاڵە سنوورییانە دیار نییە و پێویستیان بە لێكۆڵینەوەی ورد و رژد هەیە".


دواجار نایشارێتەوە، كەوا مەترسییەكانی گەندەڵی زۆر زیاترە لە مەترسییەكانی داعش و گرووپە تیرۆریستەكان، چونكە پێی وایە داعش دوژمنێكی دیار و ئاشكرایە، بەڵام گەندەڵی دوژمنێكی نادیارە و خەڵكێكی مافیاش لەپشتیەوەن.