چۆن سوپای عێراق خۆی رادەستی پێشمەرگە و خەڵکی راپەڕیو کرد؟

لە رانیەوە تا کەرکووک ڕاپه‌ڕینی ساڵی 1991ی خەڵکی کوردستان

14/03/2019 - 10:13 بڵاوکراوەتەوە لە ڕاپۆرت

بومه‌له‌رزه‌ی ڕاپه‌ڕین، شۆڕشێك بوو هه‌ر وه‌كوو شۆڕشی سپارتاكۆس، ئه‌و له‌ رۆما دایگیرساند! گه‌لی كوردیش له‌ كوردستان کڵپەیان پێ سەند.

ڕانیه‌... یەکەم بڵێسەی راپەڕین
من، ساڵی 1991 به‌ (ساڵی راپەڕین) ناو ده‌نێم، چونكه‌ ئه‌و ساڵه‌ ساڵێكی تایبەتە لە مێژووی ئێمەی خەڵکی کوردستاندا و دووباره‌ نابێته‌وه، راپەڕین دوو مێژوو لێك جیا ده‌كاته‌وه‌، هه‌ر وه‌كوو هه‌ردوو ساڵی (كۆچ) و (له‌دایكبوون) یان، ساڵی (مانگی) و ساڵی (خۆری).


سه‌ره‌تایه‌كه‌ له‌ (رانیه‌)وه‌ ده‌ستی پێ كرد، هه‌ر بۆیه‌ش ناوی لێ نرا (ده‌روازەی راپەڕین)، به‌ڵام بۆ رانیه‌؟
نازانم یان نامه‌وێ وردەکارییەکەی باس بکەم ئاخۆ بزانم چۆن بوو، به‌ڵام چاك ده‌زانم كه‌ (هەموو ئاگرێکی گەورە له‌ پریشكێكه‌وه‌ ده‌ست پێ ده‌كات)، هه‌ر بۆیه‌ش پریشکەکەی (رانیه‌) په‌ره‌ى سه‌ند و بوو به‌ (گڵپه‌) و ته‌نها پاش دوو رۆژ، لە گەورەشاراندا سلێمانییشی گرته‌وه‌ و شاری هەڵمەت و قوربانیی سه‌راو بن كرد ... به‌ (بوومه‌له‌رزه)‌یەكی به‌ پله‌ی حه‌وت و نۆ له‌سه‌ر پێوه‌ری رێخته‌ر.

 

راپەڕینی هەولێر
دەگەڕێمەوە بۆ 28 ساڵ لەمەوبەر، ئه‌مڕۆ 10ی مانگی ئاداری 1991، شه‌ش رۆژی تر یادی سێیه‌مین ساڵوەگەڕی کارەساتی کیمیابارانی هه‌ڵه‌بجه‌ دەکرێتەوە‌.
هه‌ر له‌ به‌یانییه‌وه‌ رادیۆی كوردی، به‌یاننامە و سروودی نیشتمانی و گۆرانیی سیاسی لێ ده‌دات و ناوه‌ ناوه‌ گۆرانییه‌كانی (شڤان)، ئاگری راپەڕین جۆش دەدات.
گشت سرووده‌كان، ئاماژه‌ی ئه‌وه‌ ده‌ده‌ن كه‌ ئه‌م (ئارامییه‌ی شاری هه‌ولێر) ره‌شه‌بایەكی توندی به‌دوادا دێ‌، داموده‌زگا و شوێنه‌ تایبه‌ته‌كانی رژێم، له‌و چه‌ند سەعاته‌ی دادێت، كاول ده‌كات! هه‌ر وه‌ك چۆن به‌ر له‌ چوار رۆژ، داموده‌زگاكانی رژێمیان له‌ سلێمانی، سه‌راوبن كرد.
ئاشكراشه‌، كه‌ پیاوانی رژێم باش ده‌زانن لێیان دەقه‌ومێت.
هه‌ر بۆیه‌ش هه‌وڵیان دا ‌پێش رووداوه‌كان بكه‌ون و بڕیاری قه‌ده‌غه‌كردنی هاتوچۆیان ده‌ركرد و به‌ ئۆتۆمبیل و (بڵندگۆ) به‌ناو شه‌قام و گه‌ڕه‌كه‌كانی هه‌ولێردا ده‌گه‌ڕان، بۆ دوورخستنەوەی جه‌ماوه‌ر له‌ پێشمه‌رگه‌كان، كه‌ گه‌یشتبوونه‌ ده‌روازەی شار.
له‌وانه‌شه‌ مه‌به‌ستی پیاوانی دامودەزگا سەرکوتکەرەکانی رژێم ئه‌وه‌ بووبێ كه له‌ناكاو هێرش بكه‌نه‌ سه‌ر ماڵه‌كان و هه‌زاران لاو و منداڵ و پیاو، به‌ر له‌ راپەڕینی هه‌ولێر، به ‌بارمتە بگرن، هه‌ر وه‌كوو شاری كه‌ركووك، كاتێ كه‌ هه‌زاران پیر و گه‌نجی بێ تاوانیان له‌ ماڵه‌وه‌ برده‌ زیندان، بەڵام، كورد گۆته‌نی (كار له‌ كار ترازا) و تاوە ئەوە داد نادات هه‌موو شتێك ته‌واو بوو.
له‌ لایه‌كی تریشه‌وه‌، دوور له‌ شه‌قام و بڵندگۆ، ده‌نگی ته‌قینه‌وه‌ی تۆپه‌كان كه‌ له‌ پاشنیوه‌ڕۆوه‌ ده‌ستی پێ كرد، ده‌بیسترا.
هه‌ندێك گه‌نج و لاو به‌ ئارامی و بێده‌نگی، به‌هۆی (پایسكیله‌كانیانه‌وه‌) به‌ناو ماڵ و شه‌قامه‌ میللیه‌كاندا ده‌گه‌ڕان و ده‌سووڕانەوە، له‌وانەیه‌ فه‌رمانی ده‌ستپێكرنی راپەڕین، یان دابه‌شكردنی رۆڵی (ئه‌كته‌ره‌كان)، یانیش بۆ ئه‌وه‌ی به‌ هاووڵاتییان بڵێن:
(ده‌رگاكان دامه‌خه‌ن بۆ كاتی پێویست)!
كاتێ كه‌ شه‌و داهات، هه‌ولێر له‌ناو تاریكییه‌كی ترسناكدا ده‌خنكا!
شار بێده‌نگه‌، كاره‌با له‌مێژه‌ بڕاوه‌ و هاتوچۆ قه‌ده‌غه‌یه‌، ده‌نگی تۆپه‌كانیش به‌رده‌وامه‌ و گشت هاووڵاتییان نه‌فه‌سیان بڕاوه‌ و به‌ته‌مای ته‌قینه‌وه‌ی رووداوه‌كانی ئه‌و چه‌ند سه‌عاته‌ی ئاینده‌ن.
ئه‌مشه‌و وه‌كوو شه‌وه‌كانی تر نین، زۆر كه‌س بڕیاریان دا تا به‌یانی نه‌خه‌ون، زۆریش هه‌وڵیان دا بخه‌ون و خه‌ویان لێ نه‌كه‌وت.
كه‌چی ئه‌و كه‌سانه‌ی هه‌روه‌كوو شه‌وه‌كانی تر بۆ خۆیان نووستن، بینینی هه‌ڵاتنی خۆره‌كه‌یان له‌ده‌ست چوو! ته‌قینه‌وه‌ی شۆڕشی هه‌ولێریان له‌ده‌ست چوو، له‌دایكبوونی راپەڕینه‌كه‌یان نه‌بینی.
خۆر تازه‌ هه‌ڵاتبوو، كاتێك كه‌ جه‌ماوه‌ر له‌ گه‌ڕه‌كی شۆڕش و گه‌ڕه‌كه‌كانی تر به‌ره‌و شه‌قامه‌كان هاتن، پێشمه‌رگه‌ش به ‌پێشیان كه‌وتبوون، كلاشنكۆف و ئار بی جی-یان بڵند كردبوو و هاواریان ئاسمانه‌كه‌ی شه‌ق ده‌كرد (بژی كوردستان....بژی كوردستان).
دیمه‌نه‌كه‌ له‌وه‌ گه‌وره‌تر بوو بڕوای پێ بكرێت، هەزاران کەس هاواریان ده‌كرد: ”بڕووخێ سه‌دام....بڕووخێ سه‌دام“ له‌سه‌ر جوگرافیایه‌ك هێشتا سه‌دام ده‌سه‌ڵاتی له‌سه‌ر مابوو، به‌ڵام وا دیاره‌ كه‌ هه‌موو شتێك ته‌واو بووبوو.
هاتوهاواری خه‌ڵكه‌كه‌ وه‌ك گولله‌ به‌ هه‌لهه‌له‌لێدانی ئه‌و ئافره‌تانه‌ تێكه‌ڵ بووبوو، كه‌ شه‌رواڵی پیاوانیان پۆشیبوو و به‌گه‌ڵ پێشمه‌رگه‌كانی راپەڕین كه‌وتبوون.
وێنه‌ گه‌وره‌كانی سه‌دام و په‌یكه‌ره‌ مه‌زنه‌كانی بوون به‌ ئامانجی جه‌ماوه‌ر، سه‌ر له‌ به‌ره‌به‌یانی راپەڕین، ئاگر و گولله‌ و زبل و خاشاكیان پێدا ده‌دان.
جه‌ماوه‌ر هیچ به‌ره‌نگاربوونه‌وه‌یەکیان لەگەل پیاوانی رژێم نەبوو له‌ناو شه‌قامه‌كاندا له‌ كاتی رۆیشتنیان بۆ ناو شار، چونكه‌ پیاوه‌كانی رژێم له‌ شوێنه‌ گشتییه‌كاندا نه‌بوون.
بۆ نموونه (رەفیق حزبییەکان)‌، ئه‌وه‌ی رایكرد رایكرد و هه‌ندێكیشیان خۆیان گه‌یانده‌ کەسایەتییە عەشایەرییە‌ كورده‌كان تا بیانپارێزن، كه‌چی به‌شێكیان خۆیان له‌ بنكه‌ی حزبه‌كان و رێکخراو و داموده‌زگا چه‌په‌ڵه‌كان حه‌شار دا بۆ ئه‌وه‌ی به‌رگری بكه‌ن هه‌روه‌ك پیاوه‌كانی ئەمن.
جاشەکان كه‌ چه‌كیان پێ بوو و له‌گه‌ڵ حكوومه‌تیش بوون، ناچار بوون به‌گه‌ڵ جه‌ماوه‌ر بكه‌ون و هه‌ندێكیشیان به‌گه‌ڵ پیاوه‌كانی رژێم كه‌وتن.
پیاوه‌كانی پۆلیسیش هه‌ووه‌ك و ئه‌وان، بۆ نموونه‌، ئه‌فسه‌ری پۆلیسی عینكاوه‌ به‌ر له‌ راپەڕین به‌ دوو رۆژ مۆڵه‌تی به‌ خۆی دا و شوێنه‌كه‌ی خۆی به‌ردا و بنكه‌ی پۆلیسی دا به‌ ئه‌فسه‌ر (ش).
(ش)یش هه‌موو شتێكی دا به‌ رئیس عوره‌فا (....) و به‌ خۆیشی به‌ر له‌ چه‌ند سه‌عاتیك له‌ راپەڕین هه‌ڵات بۆ مووسڵ!
گشتیان ده‌یانزانی بارودۆخه‌كه‌ ده‌ته‌قێته‌وه‌، بۆیه‌ش هه‌ر یه‌كه‌ و رێگاوشوێنێكی بۆ خۆی دۆزیبووەوه‌.


بێلایه‌نیی له‌شكر
سەدام حسینی دیکتاتۆر سوپای عیراقی تەواو ماندوو کردبوو بەتایبەتی دوای جه‌نگی دووه‌می كه‌نداو ئەو سوپایە داڕما، به‌ڵگه‌ش ئه‌وه‌یه‌، كه‌ گشت ئه‌و سه‌ربازانه‌ی كه‌ له‌ شارۆچکەی سه‌ڵاحه‌دین و شه‌قڵاوه‌ و هه‌ریر و دیانه‌ شۆڕ بووبوونه‌وه‌، دوای ئه‌وه‌ ته‌سلیمی پێشمه‌رگه‌ بوون. ئه‌مه‌ش به‌ڵگه‌ی ئه‌وه‌یه كه‌ سوپا ته‌واو بووە و حه‌زی نه‌ده‌كرد به‌رگری له‌ رژێم بكات، به‌تایبه‌ت كه‌ ركابه‌ره‌كه‌ گه‌ل بێت، ئه‌وه‌ بوو كه‌ سوپاكه‌ی رژێم له‌ هه‌ر شوێنێك با له‌ كوردستان، خۆی دەدا به‌ده‌سته‌وه‌ و چه‌كه‌كه‌ی رادەستی پێشمه‌رگه‌ دەكرد و كڵاوه‌كانیان له‌سەر دەكرده‌وه‌، كه‌ به‌ڵگه‌ی بێلایه‌نییانه‌، هه‌ر بۆیه‌ش بینینی هه‌زاره‌هان سەربازی سوپای رژێم، به‌بێ (كاسكێت‌) له‌ناو شه‌قامه‌كانی كوردستان، شتێكی ئاسایی بوو، هه‌ندێكیشیان هه‌روه‌كوو خەڵکی راپەڕیوی كوردستان هاواریان ده‌كرد: ”بڕووخێ رژێم....بڕووخێ رژێم“.
شۆڕشگێڕه‌كان رێزیان لە ئەندامانی سوپاکەی سەدام كرد و زۆر پێداویستییان پێ دان، نه‌مازه‌ كه‌ زۆریان برسی و تینوو بوون، ماندووش بوون، پاش سێ رۆژ به‌ پێ‌ رۆیشتن له‌گه‌ڵ راپەڕینی هه‌ولێر گه‌یشتنه‌ نێو شاره‌كه‌.
خۆبەدەستەوەدانی سوپا و هەروەها پەیوەندیکردنی زۆر لە چەکدارە کوردەکانی رژێم بە پێشمەرگە و خەڵکی راپەڕیوەوە، رژێمی به‌غدای شێت و هار كرد، هه‌ر بۆیه‌ش له‌ به‌غدا پیاوانی رژێم فه‌رمانیان دا به‌ هه‌ڵوه‌شاندنەوەی گشت فه‌وجه‌كانی خەفیفە کە بە لە راپەڕین بە (فەوجی جاش) ناودێر کرابوون، جگه‌ له‌ فه‌وجی یه‌كه‌م.
هه‌روه‌ها رژێمە فه‌رمانێكی ده‌ركرد به‌ لەسێداره‌دانی گشت ئه‌ندامانی فه‌یله‌قی (5 ، 1) له‌ سه‌رباز و ئه‌فسه‌ره‌كان، به‌ تۆمه‌تی خیانه‌ت!
به‌ر له‌ ده‌ركردنی ئه‌م فه‌رمانه‌، رژێمی بەعس ژماره‌یه‌كی زۆر له‌ سه‌ربازه‌كانی فه‌یله‌قی پێشووی له‌ ده‌روازەی مووسڵ و شارۆچکەی پردێ له‌سێداره‌ دا، پاش ئه‌وه‌ی له‌ رۆژی 11ی ئادار، له‌ هه‌ولێره‌وه‌ به ‌پێیان چوون به‌ره‌و مووسڵ.
به‌ڵام پیاوانی رژێمی به‌غدا پروپاگه‌نده‌یان بڵاو كرده‌وه‌ گوایە كورد ئەو سەربازە عیراقییانەی کوشتووە لە کاتێکدا ئەو سەربازانە بەناو خەڵکی راپەڕیوی کوردستاندا رۆیشتن و کەس هیچی لێ نەکردن تا گەیشتنەوە بەردەم پیاوانی رژێم، هەروەها هێشتا هه‌زاران سەربازی سوپای عێراق له‌و ده‌مه‌دا له‌ شاری هه‌ولێر ئازاد و سه‌ربه‌خۆ بوون و له‌ناو خه‌ڵكه‌كه‌ پێشوازییان لێ ده‌كرا.
هەر بەو هۆیەوە، هه‌زاران سەرباز و ئه‌فسه‌رانی سوپای سه‌دام، بڕیاریان دا له‌ هه‌ولێر بمێننه‌وه‌ و نه‌گه‌ڕێنه‌وه‌ شوێنه‌كانی خۆیان و ژماره‌یه‌كی زۆریان پاش تێكچوونی راپەڕین، له‌گه‌ڵ كورد به‌ره‌و ئێران و توركیا‌ چوون.
ئاخر ئه‌و سەربازانەی پێشتر رژێم کوشتنی، سه‌دان كیلۆمه‌تریان به‌ پێیان بڕی، بۆ ئه‌وه‌ی بگه‌نه‌ كه‌سوكاریان، بەڵام به‌ فه‌رمانی رژێم گوللە‌باران كران، پێش ئه‌وه‌ی بگه‌نه‌ ماڵه‌كانیان به‌ چه‌ند مه‌ترێك.

 

چۆن سوپای سه‌دام ته‌سلیمی پێشمه‌رگه‌ بوون؟
ئه‌مه‌ پرسیارێكه‌ دێته‌ كایه‌وه‌. با گوێ له‌ سه‌ربازێك بگرین، كه‌ له‌و بارودۆخه‌دا ژیا، چۆن باسی خۆبه‌ده‌سته‌وه‌دانی سه‌ربازگه‌كه‌ى خۆی ده‌كات بۆ پێشمه‌رگه‌:
(ع.ف.ع)، كه‌ سەربازه‌ و خه‌ڵكى به‌غدایه‌ و ده‌ ساڵى ره‌به‌ق بووە لە خزمەتی سەربازیدا بووە، ده‌ڵێت:
”رۆژی 8- 3 شتیکی سەیر رووی دا، ئۆتۆمبێلێكی لاندگرۆزه‌ر له‌پێش سه‌ربازگه‌كه‌مان له‌ چۆمان وه‌ستا و ژماره‌یه‌ك پێشمه‌رگه‌ی تێدابوو، ویستیان ئه‌فسه‌ره‌كه‌مان ببینن، پاش جێبه‌جێكردنى داواكه‌یان و گفتوگۆیه‌كى كورت له‌گه‌ڵ ئه‌فسه‌ره‌كه‌، فه‌رمانمان بۆ هات كه‌ چه‌كه‌كانمان فڕێ بده‌ین، ئه‌وه‌بوو چه‌كه‌كانمان فڕێ دایە ناو ئه‌و دۆڵه‌ى كه‌ لێی بووین، بێ ئه‌وه‌ى بزانین چیمان به‌سه‌ر هاتووه‌.
كاتێ كه‌ زانیمان له‌ هه‌موو لایه‌كه‌وه‌ به‌ پێشمەرگه‌ گه‌مارۆ دراوین، ئیدی هه‌موو شتێكمان زانى!
وا دیاره‌ كه‌ پێشمه‌رگه‌كان، ئه‌وانه‌ى ده‌وره‌ى شاخه‌كانیان دابوو، پەیامیان بۆ ئێمە ئەمە بوو:
یان چه‌كه‌كانتان فڕێ ده‌ده‌ن و ده‌تانپارێزین، یانیش كۆتاییتان پێ دێنین!“.
ئه‌فسه‌ره‌كه‌مان به‌ ژیریی رەفتارى كرد، كاتێ كه‌ به‌ ئێمه‌ى گوت، چه‌كه‌كانتان فڕێ بده‌ن.


(ع.ف.ع) پێدا ده‌چێ و ده‌ڵێ:
”له‌ ژیانى خۆم خۆشیی وه‌كوو ئه‌وده‌مه‌م نه‌دیوه‌، كاتێ كه‌ ئه‌و چه‌كه‌ى ده ‌ساڵ به‌ شانمه‌وه‌ بوو، فڕێم دا... پاش خۆڕزگاركردن له‌ چه‌كه‌كانمان، ئه‌فسه‌ره‌كه‌مان له‌ ژووره‌كه‌ی خۆی هاته‌ ده‌ره‌وه‌، به‌ سمێڵ تاشراوی و به‌ جلى كوردی کە له‌ یه‌كێك له‌ پێشمه‌رگه‌كانى وەرگرتبوو، له‌گه‌ڵ هه‌شت هه‌زار سەربازی عێراقى بەبێ چەک شۆڕ بووینه‌وه‌ ناو ئه‌و جه‌ماوه‌ره‌ی كه‌ به‌ گوێز و مێووژ و كولیچه‌ پێشوازییان لێ كردین!“.


با بگه‌ڕێینه‌وه‌ سه‌ر راپەڕین، ئه‌وه‌ى كه‌ گوتمان هیچ به‌ره‌نگاربوونه‌وه‌ى نه‌بوو له‌ پیاوانى رژێم، ئه‌وانه‌ى هه‌ر له‌ سه‌ره‌تای راپەڕین شۆڕ بوونه‌وه‌ ناو خه‌ڵك، به‌ڵام دیاربوونى هه‌ندێك له‌ ئۆتۆمبێلى پۆلیس و ئاسایش له‌ناكاو له‌ناو شه‌قامه‌كاندا ، زه‌وقی خه‌ڵكه‌ سڤیله‌كه‌ى تێكدا و ترسی له‌ناو دڵیاندا زیندوو كرده‌وه‌، به‌ڵام هێنده‌ى نه‌برد، خه‌ڵكه‌كه‌ دڵخۆش بووه‌وه‌، كاتێ كه‌ زانییان ئۆتۆمبێلى پۆلیس و ئاسایش له‌ ده‌ستى پێشمه‌رگه‌دایه‌ و ئێستا له‌گه‌ڵ جه‌ماوه‌رى راپەڕیودانه‌.


پاشان دوو هلیكۆپته‌ر له‌ ئاسماندا به‌ده‌ر كه‌وتن و بێ به‌زه‌ییانه‌ ده‌ستیان به‌ بۆردومانی خه‌ڵكه‌كه‌ كرد، كاتێ كه‌ هه‌ڵگری (ئار بی جی)یه‌كان ته‌قه‌یان لێ كرد، هلیكۆپته‌ره‌كان به‌رز بوونه‌وه‌ و ده‌ستیان به‌ بۆردومان كرد له‌ ئاسمانه‌وه‌، پاشان تۆپ و هاوه‌نیش ده‌ستیان پێ كرد و ژماره‌یه‌كى زۆر شه‌هید و برینداری لێ کەوتەوە، نه‌خۆشخانه‌كانى هەولێر پڕ بوون له‌ ئافره‌ت و منداڵی بریندار.


هه‌ر له‌و كاته‌ ژماره‌یه‌كى زۆر له‌ پێشمه‌رگه‌ له‌گه‌ڵ سه‌دان له‌ هاووڵاتییان هێرشیان بۆ ‌سه‌ر بنكه‌كانى رژێم ده‌كرد، یه‌ك به‌دواى یه‌ك. داموده‌زگاكانى رژێمیش ئه‌وه‌نده‌ زۆرن ناژمێردرێن! بیست و سێ ساڵه‌ رژێمى به‌عس داموده‌زگاى نوێ و تازه‌ دروست ده‌كات، (مه‌نزوومه‌) جودایه‌ له‌گه‌ڵ (مونه‌زه‌مه‌) و (موخابه‌رات) فه‌رقى هه‌یه‌ له‌گه‌ڵ (ئیستخبارات) و داموده‌زگاى (ئه‌من) هیچ په‌یوه‌ندییه‌كى به‌ (ئه‌من)ه‌وه‌ نییه‌ و ناوى هه‌ر یه‌كه‌ له‌م داموده‌زگایانه‌ ترس له‌لاى هاووڵاتى دروست ده‌كه‌ن.
ئه‌ندامانى ئه‌و داموده‌زگایانه‌ش گشتیان (ره‌فیق)ن و (ره‌فیقه‌كان)یش زۆر دوورن له‌ (ره‌فیق)!


ئه‌وانیش ته‌نها به‌شێكن، كه‌ به‌ كه‌یفی خۆیان له‌ناو كۆمه‌ڵگه‌ ره‌فتار ده‌كه‌ن و دروشمى (به‌عسی یه‌كه‌م كه‌سه‌ كه‌ قوربانى ده‌دات و دوا كه‌سه‌ كه‌ سوود وه‌رده‌گرێت) به‌پێچه‌وانه‌یه‌! چونكه‌ به‌عسی یه‌كه‌مین كه‌س و دوایین كه‌سه‌ كه‌ سوود وه‌رده‌گرێ و به‌عسییه‌كان پتر له‌ بیست ساڵه‌ له‌سه‌ر سنگى گه‌ل پاڵكه‌وتوونه‌ و كاتێ كه‌ ده‌رفه‌ت رێك كه‌وت، پاش 23 ساڵ ناخۆشی و ئازاردان، گه‌ل ناچار بوو تۆڵه‌ى خۆى له‌ به‌عس و داموده‌زگاكانى بسێنێته‌وه‌، به‌ چه‌ندین رێگا و به‌ حه‌ق و حسابێكى دوور و درێژ.


- هەندێ لە وێنەکان لە رۆژی راپەڕیندا بە کامێرای نووسەر گیراون و هەندێکی ئەرشیفین