پڕۆژەی پێوەری كارەبا بۆ مۆڵ و شوێنە بازرگانیيەكان دەست پێ دەكا

وەزارەتی كارەبا: مۆڵ هەیە بەقەد 10 هەزار ماڵ كارەبا سەرف دەکات

12/03/2019 - 14:32 بڵاوکراوەتەوە لە ڕاپۆرت

وەزارەتی كارەبا وردەكاريی سیستەمێكی تازەی كارەبا و پێدانی كارەبا لە رێگەی پێوەری زیرەك ئاشكرا دەكات. بەرپرسێكی وەزارەتەكەش رای دەگەیەنێت، سەرەتای پڕۆژەكە ئەمساڵ لە مۆڵ و شوێنە بازرگانییەكانەوە دەست پێدەكات.


محەمەد ئەمین هەورامی، گوتەبێژی وەزارەتی كارەبا بە (باس)ی راگەیاند، حكوومەت بڕی 250 ملیۆن دۆلاری بۆ دانانی پێوەر و سیستەمی زیرەكی كارەبا تەرخان كردووه، گوتی: "بەپێی گرێبەست، بەشێكی كەرەستە و پێوەرەكانی سیستەمەكە گەیشتووەتە كۆگاكانی وەزارەتی كارەبا، تەنیا پێوەری كارەبا نییە، بەڵكوو سیستەمێكی تەواوكەری زیرەكی كارەبا دەبێت".


لەبارەی سیستەمەكه‌وه‌ گوتیشی: "سیستەمەكە بە جۆرێكە، لەو كاتەی كارەبا لە محەویلە دەردەچێت، چاودێریی دەكات لە هەر شوێنێك سەرپێچی و دزین هەبێت، ئاماژەی بۆ دەكات، بەكاربردنی كارەبا لە ماڵان و شوێنە گشتی و تایبەتەكان دیاری دەكات، سیستەمەكە زۆر پێشكەوتووە".


چەند كۆمپانیایەك گرێبەستیان لەگەڵ كراوە بۆ هێنانی كەرەستەكان، كۆمپانیایەكیش سۆفتوێری سیستەمەكە دادەنێت، بەپێی قسەكانی هەورامی: "گرێبەستێكیش لەگەڵ كۆمپانیای پەیوەندیی زەین كراوە بۆ گواستنەوەی داتاكان لە رێگەی سیم كارتەوە بۆ ئینتەرنێت و كارەكە زۆر گەورە و گرنگە".


بەرپرسەكەی وەزارەتی كارەبا جەختی كردەوە، بەشێكی باش لە پڕۆژەكە لەمساڵدا جێبەجێ دەكرێت، گوتیشی: "پڕۆژەكە لە بەشدارە گەورەكانی كارەبا دەست پێ دەكات، بۆ نموونە لە مۆڵەكانەوە، چونكە مۆڵ هەیە دوو فیدەری كارەبای هەیە، كە بەقەد 10 هەزار ماڵ كارەبایان هەیە، هەروەها لە ناوچە بازرگانی و پیشەسازی و هۆتێلەكان، پاش ئەوە هاوبەشی ماڵانیش دەگرێتەوە".


بەپێی داتای وەزارەتی كارەبا، ئێستا هاوبەشانی كارەبا لە هەرێمی كوردستان زیاتر لە یەک ملیۆن و 550 هەزار هاوبەشە و بەردەوامیش لە زیادبوونە.


محەمەد ئەمین هەورامی پێی وایە، دانانی سیستمی پێوەری زیرەك هاوكارییەكی باشه بۆ وەزارەتی كارەبا و زیادكردنی بڕی بەرهەمهێنان، هەروەها داوەری له دابەشكردنی وزەی كارەبادا دروست دەكات.