نەوەی نوێ دەیەوێ لە سلێمانی شوێنی تەڤگەری ئازادی بگرێتەوە

خەڵکی سلێمانی باجی موزایەدەی سیاسیی (نەوەی نوێ)ش دەدات

10/02/2019 - 15:07 بڵاوکراوەتەوە لە ڕاپۆرت

ماوەیەکە نەوەی نوێ (حزبەکەی شاسوار عەبدولواحید) و میدیا فەرمییەکەی، هاوشێوەی تەڤگەری ئازادیی باڵی سیاسیی پەکەکە، لە سلێمانی کار دەکات، پێشتریش کادیرێکی پەکەکە لەسەر لیستی نەوەی نوێ، توانیویەتی بە بڕینی کۆتای ژنان بگات بە پەرلەمانی عێراق و ببێت بە پەرلەمانتار، ئەوەش وای کردووە تورکیا بە چاوی گومان و کارکردن بۆ سیاسەتەکانی پەکەکە، لە نەوەی نوێ بڕوانێت. چاودێرانی سیاسیش وای دەبینن، دواجار خەڵکی هەرێمی کوردستان بە گشتی و بەتایبەتی سلێمانی باجەکەی بدەن.


سەرەڕای نیگەرانییەکانی تورکیا، دوای ئەوەی کادیرێکی ژنی پەکەکە لە رێگەی لیستی نەوەی نوێ، لە هەڵبژاردنی پەرلەمانی عێراق بە بڕینی کۆتای ژنان بوو بە پەرلەمانتار، لەدوای رووداوەکەی شیلادزێشەوە، میدیا فەرمییەکانی تورکیا کەناڵی (NRT)ی زمانحاڵی فەرمیی نەوەی نوێ و (شاسوار عەبدولواحید)یان وەکوو سەرۆکی نەوەی نوێ، بە هاندان و پشتگیری لە تیرۆر و توندوتیژی و بەلاڕێدابردنی خۆپیشاندەران تۆمەتبار کرد.


لەم بارەیەوە ماڵپەری رۆژنامەی ((YeniSafakی توركی، زمانحاڵی ئاكپارتی بە مانشێتی "شاسوار عەبدولواحید، ئاژاوەگێڕەكەی دهۆك" نووسیویەتی " شاسوار عەبدولواحید، كە كەسێكی گرنگە لە سپیكردنەوەی پارەی PKK و كەناڵەكەی، دەستیان هەبووە لە هێرشكردنە سەر بنكەی سەربازی توركیا لە دهۆك و هەندێك لە دەزگاكانی سەر بە حكوومەتی عێراق پشتگیرییان لێی كردووە".


پێوەند بەم پرسە، د. عەبدولحەکیم خەسرەو، چاودێری سیاسی بۆ (باس) رای گەیاند، پرسی پشتگیریکردنی پەکەکە و سیاسەتەکەی، یان ئەو موجامەلە و موزایەدەی، کە لەلایەن هەندێ لایەن و کەسەوە دەکرێ، هەمووی بۆ بەرژەوەندیی حزبی و پشتگوێخستنی بەرژەوەندیی گشتییە، چونکە پەکەکە هێزێکە ل دەرەوەی یاساکانی هەرێمی کوردستان سیاسەت دەکات و هێزی چەکداری هەیە و وەکوو حزب لە هەرێمی کوردستان تۆمار نەکراوە، گوتیشی: “کێشەکە زیاتر لەوەدایە، کە پەکەکە بەدرێژایی ئەو ماوەیە سیاسەتێکی هەڵەی لە هەرێمی کوردستان پیادە کردووە و ئێستاش بووەتە هۆی تۆپبارانی ناوچە سنوورییەکان، تەنانەت بوونی هێزەکانی تورکیا لەناو خاکی هەرێمی کوردستان، هەر پەیوەندیی بە بوونی پەکەکەوە هەیە. بە شێوەیەک بەردەوام هەوڵی ئیستغلالکردنی هەرێمی کوردستانی داوە، بۆ لێدان لە تورکیا، کە ئەوەش بەرژەوەندییەکانی هەرێمی کوردستانی خستووەتە مەترسییەوە، چونکە ئەو وڵاتانەش ئامادە نین لەسەر ئاسایشی نەتەوەیی خۆیان سازش بکەن، لەبەر ئەوە هەر جۆرە موزایەدە و پەیوەندییەک لەگەڵ ئەو هێزە، زیان لە بەرژەوەندییە گشتییەکانی هەرێمی کوردستان دەدات، ئەگەر لە دۆخێکدا چەند دەنگێکی خۆڵەمێشی هەڵبژاردن بۆ لایەنێک کۆ بکاتەوە”.


ئەو چاودێرە ئاماژەی بەوە دا، ئەوەی تێبینی دەکرێت، ئێستا نەوەی نوێ و میدیاکەی هاوشێوەی تەڤگەری ئازادی، وەکوو باڵێکی پەکەکە لە سلێمانییە، گوتی: “هەر هێزێکی فەرمی لە هەرێمی کوردستان بیەوێ کار بکات، دەبێت خۆی لەگەڵ یاسا کارپێکراوەکانی هەرێمی کوردستان بگونجێنێت و ناکۆک نەبێت لەگەڵ بەرژەوەندییە گشتییەکانی خەڵکی کوردستان، نەوەی نوێش کە بەشداری لە هەڵبژاردندا کردووە و ئێستا نوێنەری لە پەرلەمانی کوردستاندا هەیە، دەبێ نەچێتە دەرەوەی سنوورەکانی یاساکانی هەرێمی کوردستانەوە، چونکە هەروەکوو لە رابردووشدا بە هۆی هەمان موزایەدەی سیاسیی لایەنێک و چەند کەسێکەوە، سلێمانی باجێکی زۆری دا و بە گشتی زیانەکە بەر هەموو خەڵکی کوردستان کەوت، کە دەبوو نەوەی نوێ وانەی لەوە وەرگرتایە”.


گوتیشی: “پێشبینی دەکرێت، تورکیا هاوشێوەی تەڤگەری ئازادی، داوای داخستنی میدیا و بارەگاکانی نەوەی نوێ لە یەکێتی بکات، بەشێوەیەک، نەوەی نوێ بکەوێتە ژێر هەڕەشەی تورکیا و ئەو وڵاتانەی لە دژی سیاسەتەکانی پەکەکەن، چونکە ئێستا تورکیاش ئەو هێزە سیاسییە لە هەرێمی کوردستان هاوشێوەی تەڤگەری ئازادی بە هەڕەشە بۆ سەر خۆی دەزانێ، ئەوەش لە کاتێکدایە، کە هەرێمی کوردستان بە هیچ شێوەیەک پێویستی بەو جۆرە لە سیاسەت و سەرئێشەیە نییە”.


لای خۆشیانەوە، هەر پەیوەست بەو بابەتە و سیاسەتی نەوەی نوێ بە قازانجی پەکەکە و زیانگەیاندن بە هەرێمی کوردستان، بورهان رەئوف، چاودێری سیاسی لە سلێمانی بۆ (باس) رای گەیاند، سیاسەت بە موزایەدە ناکرێت، گوتی: “نابێت هەرێمی کوردستان بکرێتە شانۆ و قوربانیی یەکلابوونەوەی ناکۆکی و ململانێی وڵاتان و حزب و لایەنی بەشەکانی دیکەی کوردستان، چونکە خەڵکی هەرێمی کوردستان زۆر ماندووە و بێزارە لەو موزایەدە و هەڕاجکردنە، لەبەرئەوە، پێویستە لەسەر لایەنەکان پێچەوانەی ئەوە، تا دەکرێت ململانێ و ناکۆکییەکان لە هەرێمی کوردستان دوور بخەنەوە و بەرژەوەندییەکانی خەڵکی بەگشتی نەخەنە مەترسییەوە”.