حه‌شدى شه‌عبی و گرووپی خیانه‌تی 16ی ئۆكتۆبه‌ر به‌رده‌وامن له‌ بەقاچاخ بردنی نه‌وتى كه‌ركووك بۆ ئێران

وێڕای هۆشدارییەکەی سەرۆکی ئەمریکا

08/01/2019 - 14:52 بڵاوکراوەتەوە لە ڕاپۆرت

وێڕای ناردنی به‌شێك له‌ نه‌وتى كه‌ركووك به‌ ڕێگاى نه‌وتبه‌رى هه‌رێمى كوردستان بەفەرمی، میلیشیاكانی حه‌شدى شه‌عبی و گرووپی خیانه‌تی 16ی ئۆكتۆبه‌ری نیو یەکیتیی نیشتمانیی کوردستان، به‌رده‌وامن له‌ بەقاچاخ بردنی نه‌وتى كه‌ركووك بۆ ئێران. به‌رپرسێكی کوردیش ڕای ده‌گه‌یه‌نێت، سه‌رۆكی ئەمریکا كه‌ ده‌ڵێت كورد نه‌وت ده‌فرۆشێت به‌ ئێران و ئەمەش نیگەرانی کردووین، ئه‌وه‌ هه‌ڕه‌شه‌یه‌كى ڕاسته‌وخۆیه‌ و ده‌بێت سه‌رانی خیانه‌تى 16ی ئۆكتۆبه‌ر کە ئەو کارە دەکەن، حساب بۆ ئه‌و قسه‌یه‌ بكه‌ن.


دۆناڵد تڕرامپ، سه‌رۆكی ویلایەتە یەکگرتووەکانی ئه‌مەریكا، چوارشه‌ممه‌ى رابردوو ڕای گه‌یاند: ”كورد به‌شێكى كه‌م نه‌وتیان هه‌یه‌ و ئه‌وه‌ش ده‌فرۆشنه‌ ئێران و ئێمه‌ش به‌و كاره‌یان خۆشحاڵ نین“.


هه‌رچه‌نده‌ به‌شێك له‌ میدیاكانى سلێمانیی نزیک لە گرووپی خیانەتی 16ی ئۆکتۆبەر ئه‌و لێدوانه‌ى ترامپان به ‌شێوه‌یه‌ك لێك ده‌دایه‌وه‌، كه‌ مه‌به‌ستی نه‌وتى رۆژئاواى كوردستان بێت، به‌ڵام چاودێرانی دۆخی سیاسی ئاماژه‌ بۆ ئه‌وه‌ ده‌كه‌ن، كه‌ ئه‌و لێدوانه‌ى ترامپ زیاتر مه‌به‌ستی یه‌كێتییه‌ و له‌نێو یه‌كێتیشدا گرووپی خیانه‌تى 16ی ئۆكتۆبه‌ره‌، كه‌ ئێستا نه‌وتى كه‌ركووك به‌ هاوبه‌شیی له‌گه‌ڵ حه‌شدى شه‌عبی، له‌ رێگاى تانكه‌ره‌وه‌ ئاودیوی ئێران ده‌كه‌ن.


له‌ 16ی ئۆكتۆبه‌رى 2017، كه‌ میلیشیاكانى حه‌شدى شه‌عبی به‌ رێككه‌وتن له‌گه‌ڵ گرووپێكى خیانه‌تكارى ناو یه‌كێتی كه‌ركووكیان داگیر كرد، ئیدى ناردنی رەسمیی نه‌وتى كه‌ركووك له‌ رێگاى بۆڕیی هه‌رێمى كوردستانه‌وه‌ بۆ به‌نده‌رى جه‌یهانى توركیا ڕاگیرا و لەوەبەدوا نه‌وتى شاره‌كه‌ له‌ رێگاى تانكه‌ره‌وه‌ و له‌ سنوورى سلێمانییه‌وه نێردرا بۆ ئێران و داهاته‌كه‌یشی بۆ حه‌شدى شه‌عبی و خیانه‌تكارانى 16ی ئۆكتۆبه‌رى ناو یه‌كێتی بوو، به‌ڵام له‌ 15/11/2018دا، به‌سه‌رپه‌رشتیى به‌رپرسانى كۆمپانیای نه‌وتی باكوور، هه‌ستاون به‌ كردنه‌وه‌ى بۆڕیی نه‌وتی كه‌ركووك به‌ره‌و توركیا و له‌ ڕێگای بۆڕیی نه‌وتبه‌رى هه‌رێمى كوردستانه‌وه‌. پاشان حكوومه‌تى عێراق له‌ 16/11/2018 هه‌نارده‌كردنى نه‌وتی كه‌ركووكى له‌ ڕێگاى بۆڕیی نه‌وتی هه‌رێمى كوردستانه‌وه‌ ڕاگه‌یاند.


عاسم جیهاد، گوته‌بێژی ئه‌وكاته‌ى وه‌زاره‌تى نه‌وتى عێراق له‌ به‌یاننامه‌یه‌كدا ڕای گه‌یاند، ده‌ست كرا به‌ ڕه‌وانه‌كردنى نه‌وتى كه‌ركووك بۆ ده‌ره‌وه‌ و ئێستاش رۆژانه‌ له‌نێوان 50 بۆ 100 هه‌زار به‌رمیل نه‌وت له‌ كه‌ركووكه‌وه‌ ده‌نێردرێته‌ ده‌ره‌وه‌. ئه‌وه‌شی خستووه‌ته‌ ڕوو، پاڵاوتگه‌كانى باكوور، كه‌ له‌ كه‌ركووكه‌وه‌ نه‌وتیان پێ ده‌درا، لە ئێستا به‌دوا له‌ باشووره‌وه‌ قه‌ره‌بوو ده‌كرێنه‌وه‌.


عاسم جیهاد ئاماژەی بۆ ئه‌وه‌ش كردبوو، ئه‌و رێككه‌وتنه‌ له‌نێوان سه‌رۆك وه‌زیرانی عێراق و سامى غه‌زبان، وه‌زیری نه‌وت كراوه‌ و ئاماده‌ن له‌سه‌ر ئه‌و رێككه‌وتنه‌ كار له‌گه‌ڵ هه‌رێمى كوردستان بكه‌ن.


هه‌روه‌ها، هێزێر ناوێرت، گوته‌بێژی وه‌زاره‌تی ده‌ره‌وه‌ى ئه‌مەریكا له‌ پۆستێكیدا له‌ (تویته‌ر) سه‌باره‌ت به‌ ناردنى نه‌وتى كه‌ركووك بۆ به‌نده‌رى جه‌یهانى توركیا ئاماژه‌ى بۆ ئه‌وه‌ كردووه‌: "ناردنی نه‌وتى كه‌ركووك بۆ ده‌ره‌وه‌ گه‌شه‌سه‌ندێكى باش ده‌بێ و هه‌نگاوێكی گرنگیشه‌ بۆ كه‌مكردنه‌وه‌ى هه‌نارده‌ى نه‌وت بۆ ئێران".


هاوكات، برێت مه‌كگۆرك، نێرده‌ى تایبه‌تی ئه‌وكاته‌ى سه‌رۆكى ئه‌مەریكا بۆ هاوپه‌یمانیى نێوده‌وڵه‌تى دژ به‌ داعش له‌ به‌یاننامه‌یه‌كیدا ئاماژه‌ى بۆ ئه‌وه‌ كردووه‌، كه‌ هه‌واڵی دڵخۆشكه‌ر سه‌باره‌ت به‌ ناردنه‌وه‌ى نه‌وتى كه‌ركووك بۆ بازاڕه‌كانى جیهان هه‌یه‌ و ئه‌ویش به‌پێی بنه‌مایه‌كى نوێییه‌ له‌نێوان حكوومه‌تى هه‌رێم و به‌غدا كه‌ له‌سه‌رى رێك كه‌وتوون.


له‌و چوارچێوه‌یه‌دا و به‌پێی ڕاگه‌یاندراوێكى ئه‌و كاته‌ی باره‌گاى بارزانی، كه‌ وێنه‌یه‌كى ده‌ست (باس) كه‌وتووه‌ و تێیدا هاتووه‌، سه‌رۆك بارزانی له‌میانی پێشوازیی له‌ ئه‌ندرۆ پییك، جێگری یاریده‌ده‌رى وه‌زیری ده‌ره‌وه‌ى ئه‌مەریكا بۆ كاروبارى رۆژهه‌ڵاتى ناوه‌ڕاست، په‌یوه‌ندییه‌كانى نێوان هه‌ولێر و به‌غدا تاوتوو كراوه‌ و له‌و دیداره‌دا، پێشوازیش له‌ بڕیارى حكوومه‌تى عێراق كرا بۆ دووباره‌ هه‌نارده‌كردنه‌وه‌ى نه‌وتى كه‌ركووك له‌ ڕێگه‌ى هه‌رێمى كوردستانه‌وه‌ و به‌ بڕیارێكى دروست له‌ قه‌ڵه‌م درا و شاندی میوان سوپاسی هه‌ڵوێستی سه‌رۆك بارزانی و حكوومه‌تى هه‌رێمى كرد، له‌ ناردنه‌وه‌ى نه‌وتى كه‌ركووك له‌ ڕێگه‌ى بۆڕییه‌كانى هه‌رێمى كوردستانه‌وه‌.


ناردنى نه‌وتى كه‌ركووك له‌ رێگاى بۆڕیی هه‌رێمى كوردستانه‌وه‌ به‌ گرنگ زانرا و به‌شێك له‌ شاره‌زایانی بوارى ئابوورى پێیان وابوو، كه‌ ده‌بێته‌ هۆی ئه‌وه‌ى كه‌ ئیتر نه‌وتى كه‌ركووك به‌ره‌و ئێران بەقاچاخ نەبرێت و داهاته‌كه‌یشی دیار بێت بۆ کوی دەڕوات.


به‌ڵام سه‌رچاوه‌یه‌كى ئاگادار له‌ كه‌ركووك بۆ (باس) ڕای گه‌یاند: "ڕاسته‌ رۆژانه‌ بڕێكى دیاریكراو له‌ نه‌وتى هه‌ردوو کێڵگوکانى هاڤانا و بای حه‌سه‌نى كه‌ركووك له‌ رێگاى بۆڕیی نه‌وتبه‌رى هه‌رێمى كوردستانه‌وه‌ ڕه‌وانه‌ى ده‌ره‌وه‌ ده‌كرێت، به‌ڵام نه‌وتى كێڵگه‌كانى دیكه‌ ده‌دزرێت و بردنى نه‌وتی كه‌ركووك له‌لایه‌ن حه‌شدى شه‌عبی و به‌ هاوكاریى گرووپێكى ناو یه‌كێتی بۆ ئێران هه‌ر به‌رده‌وامه‌ و ئه‌و كاره‌یان سه‌ره‌ڕای فشاره‌ ئابوورییه‌كانى ئه‌مەریكا بۆ سه‌ر ئێران هه‌ر به‌رده‌وام كردووه‌.


سه‌رچاوه‌كه‌ ئه‌وه‌شی خسته‌ ڕوو، هه‌روه‌ها كونكردنى بۆڕییه‌كانى نه‌وت له‌ سنوورى پارێزگاى كه‌ركووك له‌لایه‌ن میلیشیاكانى حه‌شدى شه‌عبییه‌وه‌ له‌ حاڵه‌ته‌وه‌ بووه‌ته‌ دیارده‌ و به‌دیاریكراوى چه‌ندین بۆڕییان له‌ سنوورى کێڵگه‌ نه‌وتییه‌كانى جه‌مبوور، كه‌ ده‌كه‌وێته‌ باشوورى كه‌ركووكه‌وه‌ كون كردو‌وه‌ و رۆژانه‌ تانكه‌رى لێ پڕ ده‌كه‌ن و له‌ بازاڕی ڕه‌شدا ده‌یفرۆشن و داهاتى ئه‌و نه‌وته‌ش ده‌درێته‌ پله‌داره‌ مامناوه‌نده‌كانى حه‌شدى شه‌عبی.


له‌م باره‌یه‌وه‌، عه‌لی عه‌ونى، ئه‌ندامى ئه‌نجومه‌نى سه‌ركردایه‌تیی پارتی، بۆ (باس) ڕای گه‌یاند: "فه‌لسه‌فه‌ى خیانه‌تى 16ی ئۆكتۆبه‌رى گرووپێكى ناو یه‌كێتی، كه‌ دیارن بۆ به‌رژه‌وه‌ندی و دزینی نه‌وت بوو، ئیتر وڵات چی به‌سه‌ر دێت لای ئه‌وان ئاساییه‌ و هیچ كاتێك تێكۆشانی نه‌ته‌وه‌یی بۆ ئازادی و سه‌ربه‌خۆیی لای ئه‌وان گرنگ نه‌بووه‌، به‌داخه‌وه‌ ئه‌و هه‌نگاوه‌ش واى كردووه‌ كه‌ دۆستانى ئێمه‌ له‌ مه‌سه‌له‌ی ده‌ستپاكى و شه‌فافییه‌ت له‌ دونیادا له‌به‌رامبه‌ر وڵاتان زمان كورت بن، كه‌ ئێمه‌ تووشی ئه‌و كێشانه‌ ده‌بین، بمانه‌وێت و نه‌مانه‌وێت دزینی نه‌وت سه‌روه‌تى ئه‌و میلله‌ته‌یه‌، كه‌ به‌هه‌ده‌ر ده‌درێت و هه‌رزانفرۆش ده‌كرێت، بشمانه‌وێت و نه‌شمانه‌وێت، ئه‌مەریكا هێزێكى باڵاده‌سته‌ و ناكرێت ئه‌م وڵاته‌مان بخرێته‌ گۆشه‌نیگایه‌كى تاریكه‌وه‌، وه‌ك ئه‌وه‌ى كه‌ركووك و ناوچه‌كانى دیكه‌یان خسته‌ ژێر ده‌ستی میلیشیاكانى حه‌شدى شه‌عبی و قه‌واره‌ى هه‌رێمى كوردستان، كه‌ ئێستا به‌ پشتیوانیى نێوده‌وڵه‌تى ماوه‌ته‌وه‌، نابێ ئه‌و گرووپه‌ خیانه‌تكاره‌ گاڵته‌ به‌ پشتیوانییه‌ نێوده‌وڵه‌تییه‌كان بكه‌ن، من پێم وایه‌ ئه‌گه‌ر ئه‌و گرووپه‌ دزینى نه‌وت بۆ ئێران ڕانه‌گرن، له‌كۆتاییدا تووشی لێدانێكى گه‌وره‌ ده‌بنه‌وه‌".


روونیشى كرده‌وه‌، چه‌ند ساڵێك پێش ئێستا، كاتێك كه‌ ئیسلامییه‌ توندڕه‌وه‌كان له‌ سنوورى هه‌ڵه‌بجه‌ حوكمیان ده‌كرد و ده‌سه‌ڵاتیان پێكهێنا و ده‌ستیان كردبوو به‌ كرده‌وه‌ى توندوتیژی، ئه‌وه‌ بوو له‌ ئه‌مەریكا و له‌ ده‌ریای سپیی ناوەڕاسته‌وه‌ له‌و ده‌سه‌ڵاته‌ ئیسلامییه‌ توندڕه‌وه‌یان دا و كۆتاییان پێیان هێنا، ئێستاش سه‌رۆك ترامپ هه‌ر ئه‌وه‌نده‌ی‌ گوتووه‌ كه‌ كورد نه‌وت نه‌فرۆشن به‌ ئێران، به‌ڵام ئه‌و قسه‌یه‌ى هۆشدارییه‌كه‌، هه‌روه‌ها هه‌ڕه‌شه‌یه‌كى ڕاسته‌وخۆشه‌ كه‌ ئێوه‌ نه‌وت ده‌فرۆشنه‌ ئێران و فرۆشتنی نه‌وت له‌ دونیادا حیساب و كیتابی خۆی هه‌یه‌ و كه‌م و زیادبوونى به‌ده‌ر ده‌كه‌وێت و ئاشكرا ده‌بێت، بۆیه‌ ده‌بێت سه‌رانى 16ی ئۆكتۆبه‌ر حیساب بۆ ئه‌و قسه‌یه‌ى سەرۆکی ئەمریکا بكه‌ن، كه‌ قسه‌یه‌كى جدی بوو“.


پێوه‌ند به‌م باسه‌، ئه‌دهه‌م جومعه‌، شاره‌زا له‌ دۆسێى نه‌وتى كه‌ركووك و به‌رپرسی بزووتنه‌وه‌ى مافی كورد له‌ كه‌ركووك، بۆ (باس) ڕای گه‌یاند: "لێدوانه‌كه‌ى دۆناڵد ترامپ، كه‌ ناخۆشحاڵه‌ له‌سه‌ر ئه‌وه‌ى كه‌ كورد نه‌وت نه‌فرۆشێت به‌ ئێران، هه‌ڵبه‌ته‌ ترامپ زیاتر مه‌به‌ستی ناردنى نه‌وتی ئه‌و ناوچانه‌یه‌، كه‌ یه‌كێتیی تێیدا باڵاده‌سته‌، چونكه‌ هاوسنوورن پێكه‌وه‌ و ئێستاش نه‌وت هه‌ر ده‌نێرن بۆ ئێران و ئه‌و نه‌وته‌ له‌ سنوورى پارێزگاى سلێمانییه‌وه‌ ده‌نێرن بۆ ئێران".


ڕاشی گه‌یاند: "ده‌سه‌ڵاتى سه‌ربازى له‌ كه‌ركووك به‌ هاوبه‌شیی له‌گه‌ڵ به‌رپرسانی زۆنی سلێمانى نه‌وتى كه‌ركووك ده‌نێرن بۆ ئێران، ئه‌مه‌ش ئه‌وه‌یه‌ كه‌ كاتێك خاوه‌نى ستراتیژی نه‌ته‌وه‌یی نه‌بێ و حیسابی بۆ نه‌كرێت، ئیتر به‌رژه‌وه‌ندی و پاره‌ كۆكردنه‌وه‌ ده‌بێته‌ هه‌موو شتێك، ئه‌وه‌ش به‌ زیانى دۆزی نه‌ته‌وه‌ییمان ده‌گه‌ڕێته‌وه‌، خه‌ڵكیش ئێستا بووه‌ته‌ قوربانیی به‌رژه‌وه‌ندییه‌كانی كه‌سانى نابه‌رپرس".


له‌باره‌ى ئه‌وه‌ى كه‌ ماوه‌یه‌كه‌ به‌پێی رێككه‌وتنێكى نێوان هه‌ردوو حكوومه‌تى هه‌رێمى كوردستان و عێراق به‌شێك له‌ نه‌وتى كه‌ركووك له‌ رێگاى بۆڕیی نه‌وتى هه‌رێمى كوردستانه‌وه‌ ره‌وانه‌ى به‌نده‌رى جه‌یهانى توركیا ده‌كرێت، ئایا ئه‌و هه‌نگاوه‌ نه‌بووه‌ته‌ هۆی ئه‌وه‌ى ئیتر نه‌وتى كه‌ركووك نه‌دزرێت و به‌ تانكه‌ر نه‌نێردرێت بۆ ئێران، ئه‌ده‌هه‌م جومعه‌، گوتی: "هه‌ڵبه‌ته‌ ئه‌و هه‌نگاوه‌ش نه‌بووه‌ته‌ رێگر له‌ ناردنى نه‌وت بۆ ئێران، به‌ڵام ئه‌و هه‌نگاوه‌ گرنگ بوو، چونكه‌ دواجار وه‌زارتى نه‌وتى عێراق مانگانه‌ ئامارێك له‌سه‌ر ناردنى بڕه‌ نه‌وتى كه‌ركووك بۆ ده‌ره‌وه‌ بڵاو ده‌كاته‌وه‌، مانگى ڕابردوو رۆژانه‌ 70 بۆ 80 هه‌زار به‌رمیل نه‌وتى كه‌ركووك ده‌نێردرایه‌ ده‌ره‌وه‌ و ئێستاش كار ده‌كه‌ن بۆ ئه‌وه‌ى له‌ رۆژێكدا 100 هه‌زار به‌رمیل نه‌وتى كه‌ركووك له‌ رێگاى بۆڕیى هه‌رێمى كوردستانه‌وه‌ بنێرینه‌ ده‌ره‌وه‌، هه‌وڵێك هه‌یه‌ بۆ ئه‌وه‌ى رێژه‌ی ناردنى نه‌وت زیاتریش بكه‌ن، به‌ڵام به‌هۆی هه‌ندێك كێشه‌ى تەکنیکییه‌وه‌ نه‌توانراوه‌ رێژه‌كه‌ زیاتر بكه‌ن و دزینی نه‌وتیش له‌ كه‌ركووك به‌ئاسانى بنه‌بڕ ناكرێت، له‌به‌ر ئه‌وه‌ى کێڵگه‌ نه‌وتییه‌كان له‌ سنوورى كه‌ركووك زۆر به‌ربڵاوه‌، چونكه‌ له‌ زۆر شوێن بیر و بۆڕیی نه‌وت هه‌یه‌ و ئیتر هه‌ر تاقمێكی چه‌كدار له‌ شوێنێكه‌وه‌ دزی له‌و نه‌وته‌ ده‌كه‌ن، جارێك میلیشیا شیعه‌كانى حه‌شدى شه‌عبی نه‌وتى شاره‌كه‌ ده‌دزن و جارێك هێزه‌كانى دژه‌ تیرۆری عێراق له‌ كه‌ركووك، كه‌ ئێستا دۆسێى ئه‌منیى شاره‌كه‌یان له‌ ده‌سته‌ و هه‌روه‌ها گرووپی 16ی ئۆكتۆبه‌ریش له‌به‌ر ئه‌وه‌ى ئه‌وان له‌ كه‌ركووكن و رێگاى كه‌ركووك تاوه‌كوو سلێمانى به‌ده‌ست ئه‌وانه‌وه‌یه‌، بۆیه‌ له‌ ناردنى نه‌وتى شاره‌كه‌ بۆ ئێران هاوبه‌شن له‌گه‌ڵ میلیشیا چه‌كداره‌كان".


هه‌روه‌ها، فوئاد حوسێن، ئه‌ندامى لێژنه‌ى نه‌وت و وزه‌ له‌ ئه‌نجومه‌نى پارێزگاى كه‌ركووك، پێشتر بۆ (باس) ڕای گه‌یاند: "به‌ حوكمى ئه‌وه‌ى له‌دواى 16ى ئۆكتۆبه‌ره‌وه‌ كاره‌كانى ئه‌نجومه‌نى پارێزگاى كه‌ركووك راوه‌ستێنراوه‌ و ئێستاش هیچ جۆره‌ زانیارییه‌ك به‌ ئێمه‌ نادرێت، له‌باره‌ى چۆنیه‌تیی ناردنی نه‌وتی كه‌ركووك، پێشتر ئێمه‌ له‌ ڕێگاى سه‌رچاوه‌كانمانه‌وه‌ یان ڕاسته‌وخۆ خۆمان كارمان له‌سه‌ر چۆنیه‌تیى ناردنى نه‌وتى كه‌ركووك ده‌كرد، به‌ڵام ئێستا بارودۆخه‌كه‌ گۆڕاوه‌ و زانیارییه‌كانمان له‌ مه‌ڕ چۆنیه‌تیى ناردنى نه‌وتى كه‌ركووك لێ ده‌شارنه‌وه‌، به‌ڵام ئێستا نه‌وتى كه‌ركووك كه‌س سوودى لێ نابینێ، به‌ڵام پێشتر به‌ تایبه‌ت ئه‌وه‌ى كه‌ له‌ ڕێگاى حكوومه‌تى هه‌رێمى كوردستانه‌وه‌ ده‌ڕۆیشته‌ ده‌ره‌وه‌، له‌به‌رامبه‌ردا بودجه‌ى پترۆدۆلار ده‌درا به‌ شاره‌كه‌، كه‌چی ئێستا ئه‌وه‌ نه‌ماوه‌ و حكوومه‌تى عێراق ئێستاش پترۆدۆلارى شاره‌كه‌ نانێرێت و له‌دواى 16ى ئۆكتۆبه‌ره‌وه‌ خه‌ڵكى كه‌ركووك سوود له‌ نه‌وته‌كه‌یان نابینن و ته‌نیا ئه‌و ده‌سه‌ڵاتدارانه‌ی ئێستای كه‌ركووك ئه‌وان ته‌خشان و په‌خشان به‌ بردن و داهاتى نه‌وتى كه‌ركووكه‌وه‌ ده‌كه‌ن، به‌بێ گه‌ڕانه‌وه‌ بۆ سه‌رچاوه‌ فه‌رمییه‌كانی حكوومه‌ت یان بۆ ئه‌و حكوومه‌ته‌ لۆكاڵییه‌ى كه‌ركووكیش".


گوتیشی: "هۆكارى شاردنه‌وه‌ى زانیارییه‌كان له‌سه‌ر چۆنیه‌تیى نه‌وتى كه‌ركووك له‌ ئێمه‌ بۆ ئه‌وه‌ ده‌گه‌ڕێته‌وه‌، ئه‌و ده‌سه‌ڵاتدارانه‌ى كه‌ ئێستا له‌ كه‌ركووكن به‌ ئاره‌زووى خۆیان مامه‌ڵه‌ به‌ نه‌وتى كه‌ركووكه‌وه‌ بكه‌ن و ئێمه‌ لایه‌نێكى چاودێرین و ده‌یانه‌وێت ئێمه‌ بێ ئاگا بین له‌وه‌ى، كه‌ ئه‌و نه‌وته‌ چی لێ ده‌كرێت و چۆن ده‌برێت، هه‌روه‌ها حكوومه‌تى عێراق و وه‌زاره‌تى نه‌وتیش زانیارییه‌كان له‌سه‌ر چۆنیه‌تیى ناردنى نه‌وتى كه‌ركووك له‌ ئێمه‌ ده‌شارێته‌وه‌، هه‌روه‌ها به‌رپرسانى كۆمپانیای نه‌وتى باكووریش ئێستا زانیاری له‌سه‌ر چۆنیه‌تیى ناردنى نه‌وتى كه‌ركووكمان پێ ناده‌ن".


له‌باره‌ى ئه‌وه‌ى واتا میلیشیاكانى حه‌شدى شه‌عبی و گرووپی خیانه‌تكارانى 16ى ئۆكتۆبه‌ریش ڕه‌نگه‌ سوود له‌و بارودۆخه‌ى ئێستاى كه‌ركووك ببینن بۆ بردنى نه‌وتى شاره‌كه‌ به‌ نایاسایی، فوئاد حوسێن، گوتی: "حه‌تمه‌ن ئه‌و ده‌سه‌ڵاته‌ نامۆیه‌ی، كه‌ ئێستا له‌ كه‌ركووك حوكم ده‌كات، كه‌ پێكهاته‌وه‌ له‌ حه‌شدى شه‌عبی و پۆلیسی فیدڕاڵی، به‌ تایبه‌ت حه‌شدى شه‌عبی، كه‌ له‌ 16ى ئۆكتۆبه‌ر به‌ ناده‌ستوورى هاتنه‌ ناو كه‌ركووكه‌وه‌، بۆ ئه‌وه‌ى خۆیان سوود له‌ نه‌وته‌كه‌ى ببینن و خه‌ڵكى كه‌ركووكیشی به‌ هه‌موو پێكهاته‌كانییه‌وه‌ لێی مه‌حرووم بكه‌ن".


فوئاد حوسێن، ڕاشی گه‌یاند: "به‌شێكى ئه‌و دۆخه‌ خراپه‌ى كه‌ هێنرایه‌ سه‌ر كه‌ركووك، له‌ 16ى ئۆكتۆبه‌ره‌ ده‌گه‌ڕێته‌وه‌ بۆ ئه‌وه‌ی كه‌ چۆن بتوانن کۆنتڕۆڵی كێڵگه‌ نه‌وتییه‌كانى كه‌ركووك بكه‌ن و حكوومه‌ته‌ یه‌ك له‌دواى یه‌كه‌كانى عێراق سوودیان له‌ نه‌وتى كه‌ركووك بینیوه‌، كه‌چی كه‌ركووكییه‌كان خۆیان سوودیان لێ نه‌بینیوه‌ و هه‌موو عێراق له‌سه‌ر داهاتى نه‌وتى كه‌ركووك بەڕێوە ده‌چوو، تاكوو نه‌وت له‌ باشوورى عێراق دۆزرایه‌وه‌، كه‌ زیاتر له‌ 30 ساڵی پێ چوو، ئینجا له‌ شوێنه‌كانى تر نه‌وت دۆزرایه‌وه‌ و كه‌ركووكییه‌كان سوودیان لێ‌ نه‌بینی و به‌پێچه‌وانه‌وه‌ داهاته‌كه‌ى زۆرجار بۆ سه‌ركوتكردنى كه‌ركووكییه‌كان خه‌رج كراوه‌".


پێشتر (باس) بڵاوى كرده‌وه‌، كه‌ له‌به‌رامبه‌ر دزینى نه‌وتى كه‌ركووك له‌لایه‌ن حه‌شدى شه‌عبییه‌وه‌، رۆژانه‌ گرووپی خیانه‌تكارى 16ى ئۆكتۆبه‌ر، كه‌ كه‌ركووك و خورماتوو و ناوچه‌ كوردستانییه‌كانى ئه‌و سنووره‌یان به‌ رێككه‌وتن راده‌ستی حه‌شدى شه‌عبی كرد، بڕی یه‌ك ملیۆن دۆلار وه‌رده‌گرن.